6 REBECA
Mana manchakuspan mana reqsisqan llaqtaman ripurqan
TARDEYAYKUYTA jinan Rebecaqa familianpaq unu orqoq lloqsimurqan, payqa rijranpi p’uyñu apaykusqan unu pozo ladoman rirqan. Rebecaqa yaqapaschá sapa p’unchay chayta ruwaq. Juj p’unchaymi ichaqa pozoq ladonpi rikurqan mana reqsisqa runakunata, paykunaqa camellokunantinmi kashasqaku, chaywanpas payqa mana manchakuspan chay pujyuman asuykurqan, jinaspa p’uyñunman unuta junt’achirqan.
Rebeca unu apaykusqa kutipushaqtinmi chay runakuna ukhumanta juj kuraq runa payman phawarqan, jinaspa nirqan: “Ama jinachu kay, juj chhikan unuykita qoykuway”, nispa. ¿Imatan Rebeca ruwarqan? Payqa rijranmanta p’uyñu apasqanta uraychikuspan unuta qorqan “kayqa wiraqochay” nispa. Chhaynapin rikuchirqan munakuq kasqanta khuyapayakuq kasqantapas.
¿Imatawanmi Rebeca ruwanman karqan? Chay runakunaq camellonkunamanmi chunkantinman sajsanankukama unuta tomachirqan. Chayta rikuspan chay kuraq runaqa admirasqa paywan kasharqan. Rebecaqa phawayllan chaypi camellokunaman unuta apasharqan. Jinan chay kuraq runaqa Rebecata tapurqan: “¿Piqpa ususintaq kankiri? ¿Kashanchu papaykiq wasinpi campo kunan tuta alojakunaykupaq?”, nispa. Jinan Rebecaqa wasinman pusarqan chaypi qhepakunankupaq, nirqanmi “camellokunapaqpas kashanmi mijunaqa” nispa.
Rebecaqa manan cuentatapas qokurqanchu imaraykuchus chaykuna pasasharqan chaymantaqa, ichaqa Diospa munayninman jinan chaykunaqa kasharqan. Chay kuraq runaqa Eliezerchus jina kashanman karqan. Abrahanqa confiarqanmi chay kamachinpi, chaymi wawan Isaacpaq juj esposata maskhamunanpaq kamachirqan. Chaypaqqa karu llaqtatan payqa viajanan karqan. Chaymantapas chay sipasqa Jehová Diosta adoraq familiamantan kanan karqan. Chayta ruwananpaqqa Diospa yanapaynintan Eliezerqa mañakurqan. Ichaqa, ¿imanispan mañakunman karqan? Payqa mañakurqan Isaacwan casarakunanpaq sumaq sonqo sipasta tarichinanpaqmi. Rebecaqa chhayna mañakusqanman jinan karqan.
Yachamusqanchis jina Rebecaqa mana manchakuspan chay mana reqsisqa runakunata yanaparqan. Chay tiempopi runakunaqa jujniraymi karqanku kay tiempopi runakunamantaqa. Kay tiempopi runakunamantan Biblia nin: “Sinchi k’araq sonqokuna, allin kaqta mana munakuqkuna”, nispa (2 Tim. 3:1, 3). Jaqay tiempopin ichaqa Rebecaqa allin ejemplo karqan runamasin munakuypi, mana manchakuq valiente kaypi ima. Chhayna kasqantaqa imaymana formapin Rebecaqa rikuchirqan.
Chay runakuna wasinman chayaqtinku jinan Rebecaqa yacharqan imaraykus karumantaraq jamurqanku chayta. Rebecaq taytan Betuel, turan Labán iman Eliezerta wasinkupi mijunankupaq invitarqanku. Ichaqa manaraq mijushaqtinkun Eliezerqa paykunaman willarqan imaraykus chaypi kasharqanku chayta. Willarqanmi imaynatas Jehová Diosqa Rebecata tarisqanwan bendecirqan chaytapas. Chaypin Rebecaq taytan Betuelqa turan Labanpas sut’ita yacharqanku imaynas chaykunaqa Jehová Diospa munayninman jina kasharqan chayta.
¿Imatan Rebeca ruwarqan wasinmanta karu llaqtaman ripuspa mana reqsisqan runawan casarakunanta yachaspa?
¿Imatan Rebeca ruwanman karqan? Mayqen sipaspaqpas manapaschá facilchu karqan Canaán llaqtaman riyqa, Abrahanqa allintan chayta yacharqan. Chaywanpas Rebecan decidinan karqan Canaán llaqtata rinanpaq mana rinanpaqpas. Paqaristinmi Eliezerqa Rebecaq familianta tapurqan: “¿Apaymanchu kunan Rebecata?”, nispa. Jinan paykunaqa Rebecata tapurqanku rinmanchus icha manachus chayta. Rebecaqa “Arí, risaqmi” nispan nirqan. Chayta nispan payqa rikuchisharqan wasinta familianta saqenanpaq listo kashasqanta. ¿Imanaqtinmi mana manchakuspa chay decisionta ruwanman karqan? Payqa sut’itan repararqan imaynas chaykunaqa Jehová Diospa munayninman jina pasasharqan chayta.
Askha p’unchaykuna purimusqankuman jinan paykunaqa tardeyaykuyta jina Abrahanpa tiyasqan campamentoman chayarqanku. Jinan Rebecaqa juj runata campopi purishaqta rikurqan. Chay runaqa Isaacmi karqan, chayta yacharuspan Rebecaqa k’umuykukuspa uma p’istukunanwan tapakurqan. Chaytaqa ruwarqan Isaacta respetasqanraykun. Isaacqa 40 watanpin kasharqan, payqa mamitan Sara wañukapusqanraykun llakisqa kasharqan. Saraq wañukapusqanqa kinsa watañan pasarurqan. Chhaynapiña Isaac tarikusharqan chaypas, ¿Rebeca Isaacta munakunmanchu karqan? ¿Yanapanmanchu karqan Diosta servinanpaq, familiapi allin umalliq kananpaqpas? Yachamusqanchis jina Jehová Diosmi paymanqa chay munay llank’ayta qosharqan. Chhaynaqa, ¿atinmanchu karqan Rebeca chaykuna junt’ayta? Bibliaq willasqanman jinaqa allintan payqa chayta junt’arqan. Chaymantapas imaynachus casado kausayninku qallarirqan chaymanta willaspan Bibliapi nin: “Isaacqa anchatan Rebecata munakapurqan, chhaynapitaq manaña nishutachu llakikurqan mamanpa wañupusqanmanta”, nispa.
Kay textokunata leey
¿Imaniwaqmi?
¿Imakunata ruwaspan Rebeca rikuchirqan mana manchakuq kasqanta?
Astawan t’aqwiriy
1. ¿Imaynan Eliezer kasharqan Abrahán wawayoq kapuqtin, ichaqa imanaqtinmi mana phiñakurqanchu? (Gén. 15:2-4; 24:12; w97 1/1 30 párr. 2).
2. Abrahanqa Canaán llaqtaman Rebeca astakamunantan munarqan, ichaqa manan munarqanchu Isaac Rebecaq llaqtanman astakunantaqa, ¿imarayku? (w97 1/1 30 párr. 3).
3. ¿Imanaqtinmi Rebecamanpas familianmanpas regalokunata aparqanku? (it “Rebeca” párr. 4).
4. Rebecaqa Harán llaqtamantan Isaacpa tiyasqan Négueb llaqtakama purimurqan, ¿imaynan chay purimusqan kanman karqan? (wp16.3 14 párr. 9). A
www.LifeintheHolyLand.com
Foto A: Ñaupaqpiqa Négueb nisqa parteqa munaymi tiyanapaq karqan, chaypin Abrahanqa animalninkunata michiq.
Imakunapin yanapawasunman
Casarakuyta munashanchis chayqa, ¿imaraykun Abrahán jina Rebeca jina Isaac jina chayta qhawarinanchis? (Gén. 24:2, 3; 27:46-28:1).
Rebecaqa allin llank’aq, qoykukuq, respetoyoq warmin karqan, ¿imaynatan kay tiempopi hermanakuna Rebeca jina kankuman? B
Foto B
¿Imakunata ruwaspan rikuchiwaq Rebeca jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Rebeca kausarimpuqtin?
Astawan yachanapaq
Kaypin astawan yachasun imaynatas Rebeca esposaña wawayoqña karqan chaypas mana manchakuq kasqanta rikuchirqan chayta.
“Rebecaqa Diospa munayninman jinan imatapas ruwarqan” (w04 15/4 8-11)
¿Imaynatan wawakuna Rebeca jina kankuman?
“Rebecaqa sumaq warmin karqan” (jw.org nisqapi “Dibujokunawan yachanapaq”)