10 MOISÉS
Tukuy imata saqespan Diosta servirqan
¿PIN Moisesman sutinta churanman karqan? Manan tayta-mamanchu churarqan. Chay sutitaqa churarqan faraonpa ususinmi. Paymi mayumanta orqospa Moisés nispa suticharqan, chay sutiqa “unumanta orqosqa” ninantan nin. Faraonpa ususinqa maytachá munarqan Moisés allin autoridadniyoq Egiptopi kanantaqa. Chayraykun Bibliapi nishan: “Moisesqa Egipto runakunaq tukuy yachayninman jinan uywasqa karqan”, nispa. Chaymantapas faraonpa ususinqa maytachá kusikurqan Moisés allin educación chaskisqanmantaqa.
Moisesqa allin educaciontataq chaskirqan chayqa, allin qhawarisqachá karqan juj waynamasinkunamantaqa. Chaychá Bibliapipas nin: “Payqa allintapuni rimaq, allintataqmi imatapas ruwaq”, nispa. Chaymantapas Moisesqa atinmanmi karqan atiyniyoq, qhapaq kayta, imaymana kusirikuykunapi puriytapas. Ichaqa allintan yacharqan chaykunata ruwaspa Jehová Diosmanta t’aqakunanta, chayraykun allinta piensaykunan karqan vidanwan imata ruwananpaq.
Tawa chunka watanpi kashaspan Moisesqa decidikurqan vidanwan imachus ruway munasqanta. Bibliapin nishan: “Iñisqanraykun Moisespas jatunña kaspa mana munarqanchu faraonpa ususinpa wawan nisqa kayta. Aswanmi payqa juchapi purispa juj ratu kusirikunanmantaqa Diospa llaqtan runakunawan kuska ñak’arichisqa kayta ajllakurqan”, nispa. Chayta ruwasqanwanmi rikuchirqan Dios sonqo mana manchakuq kasqanta. Chaywanpas mayninpiqa mana allinkunatan ruwarqan.
Moisespaqqa Israel runakunaqa “wayqenkunan karqan”, payqa manan munarqanchu Egipto runakuna paykunata nishuta sufrichinankuta, chaymi paykunata yanapayta munarqan. Juj p’unchaymi Moisesqa wayqenkuna qhawaq purirqan. Chaypin rikurqan Egiptomanta runa juj Israel runata maqashaqta, chay Egipto runaqa yaqapaschá capataz karqan. ¿Imatan Moisés ruwarqan? ¿Amaña maqaychu ninmanchu karqan? Manan chaytaqa yachakunchu. Bibliapin ichaqa willashan “Moisés lliu ladota qhawakachakusqanmanta”, yaqapaschá chayta ruwarqan wayqenta pillapas yanapananta munaspa. Ichaqa manan pitapas rikurqanchu, chaymi Moisesqa wayqenta defiendeyta munaspa “chay Egipto runata wañuchirqan”. Ichaqa, ¿yuyaypichu wañuchinman karqan, icha mana piensayllachu chayta ruwanman karqan? Manan Bibliapiqa willanchu. Moisesqa allintan yacharqan chay ruwasqanta jujkuna yacharuqtin wañuchisqa kananta. Chayraykun payqa chay wañusqa runata aqopi p’amparqan.
Paqaristinmi Moisesqa jujmanta purillarqantaq wayqenkunata qhawaq. Chaypin rikurqan iskay Israel runakuna maqanakushaqta, jinaspa tatichirqan amaña maqanakunankupaq. Jinan jujnin Israel runaqa Moisesta nirqan: “¿Pitaq qantari umalliyku kanaykipaq juezniyku kanaykipaqpas churarqasunki? ¿Egipto runata jinachu wañuchiyta munashawanki?”, nispa. Chaypin Moisesqa repararqan Egipto runa wañuchisqanta jujkuna yacharusqankuta. Chaymi Moisespa vidanqa peligropi kasharqan.
Imapas manan Moisespa piensaykusqanman jinachu kasharqan. Payqa piensaykusharqanchá “paywanchá Diosqa salvawasun ninqakuchá wayqeykunaqa” nispan. Moisesqa yaqachus jina nisharqan “noqawanmi Jehová Diosqa Egiptomanta Israel runakunata salvanqa” nispa. Ichaqa manan payqa yacharqanchu Jehová Dios Egiptomanta Israel runakunata jayk’aqchus orqomunantaqa, chaymantapas manan entienderqanchu imaraykuchus Israel runakuna pay contra jatarisharqanku chaytapas. Israel runakunaqa manan Moisespiqa confiarqankuchu Egipto runakunaq tukuy yachayninman jina uywasqa kasqanrayku.
¿Ima ruwaytan Moisés ajllakurqan: allin reqsisqa kaytachu, qhapaq kaytachu icha Jehová Diosta serviytachu?
Chaymantapas Moisesqa manan cuentata qokurqanchu Egiptomanta Israel runakunata orqomunanpaq manaraq listochu kashasqanta. Jehová Diospas chaytaqa allintan yacharqan. Egiptopi kashaspaqa Moisesqa mana manchakuspaña imatapas ruwarqan chaypas, kallpasapa, “allin rimaqña” karqan chaypas, paymanqa k’umuykukuq kaymi faltasharqan. Jinan juj kutinpas sinchi phiñasqa kaspan juj runata wañuchirqan.
Faraonqa yacharurqanmi Egipto runata Moisés wañuchisqanta, chaymi sinchita phiñakuspa Moisesta wañuchiyta munarqan. Chaymi Moisesqa Egiptomanta ripurqan. Payqa mana imata manchakuspan saqepurqan qhapaq kayta, allin wasiyoq kayta, autoridadniyoq kayta ima. Moisesqa tukuy chaykunata saqespan Madián llaqtaman ripurqan. Chay “waj llaqtapin forastero jina” unay watakuna tiyanan karqan. Chhaynapi tarikuspa, ¿cambianmanchu karqan Moisés imayna runa kasqanta? ¿Atinmanchu karqan Jehová Diospa munasqanman jina k’umuykukuq kayta? Chaytan qatiqnin yachachikuypi yachasun.
Kay textokunata leey
¿Imaniwaqmi?
¿Imakunata ruwaspan Moisés rikuchirqan mana manchakuq kasqanta?
Astawan t’aqwiriy
1. Bibliapi nisqanmantapas, ¿iman rikuchillantaq Israel runakuna Egiptopi esclavo kasqankuta? (w20.03 30). A
Courtesy Brooklyn Museum, gift of Theodora Wilbour
Imagen A: Ñaupa tiempopi Egipto runakunaq qelqasqanku lista, chaypin rijurin Sempa mirayninmanta 40 más esclavokunaq sutin. Chaywanmi yachakun Egiptopi Israel runakuna kasqanta.
2. ¿Imakunatan Moisés yaqapas yachanman karqan tayta-mamanmanta? Moisesqa “Egipto runakunaq tukuy yachayninman jinataq uywasqa karqan” chayqa, ¿imakunatan yaqapas yachallanmantaq karqan? (Hechos 7:22; w02 15/6 10 párrs. 2-5).
3. ¿Imatan Egipto runakuna ruwaqku wañusqaq cuerponwan? ¿Imaynan Egipto runakuna kashankuman karqan Moisés Egipto runata wañuchisqanta yacharuspa, chay ruwasqanta pakasqanmantapas? (it “Egipto, egipcio” párr. 28). B
Imagen B: Egiptomanta warmiq ch’akisqa cuerpon.
4. Moisesqa Madián llaqtamanmi ayqekurqan, ¿imapin Israel runakuna Madián runakunawan kaqlla karqan? (it “Madián, madianitas” núm. 2 párrs. 1, 2).
Imakunapin yanapawasunman
¿Imaynatan Moisespa ejemplon yanapawasunman controlakuq kananchispaq?
Moisesqa yacharqanmi imatachus vidanwan ruwananta, ¿imatan wayna-sipaskuna yachankuman Moisesmanta? C
Imagen C
¿Imakunata ruwaspan rikuchiwaq Moisés jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Moisés kausarimpuqtin?
Astawan yachanapaq
¿Imaynatan Moisesta qatikusunman sasachakuykunapi tarikuspa?
Moisesqa imaymana qhapaq kaykunatan saqerqan Jehová Diosta servinanrayku, ¿allinchu kanman kay tiempopi chayta ruway?