Predicanapaq yanapaykuna: ¿Imaynatan maypi kaspapas predicayta qallariwaq?

Imarayku allinpuni. Wasin-wasinta predicaspaqa pisitan runakunata wasinkupi tarinchis. Ichaqa, ¿maypin paykunawan tupashallanchis? Paraderokunapi, llank’anapi, escuelapi otaq doctorta suyakuspa. Jehová Diosqa munanmi llapa runakuna allin willakuykuna yachanankuta (1 Tim. 2:3, 4). Chaymi kallpachakunanchis paykunawan imallamantapas rimayta qallarinapaq, chay hinapi Diosmanta willananchispaq.

Imaynata ruwasunman:

Allinta qhawariy. ¿Uyarisunkichu rimaykuqtiyki? ¿Parlarinaykichispaq hinachu kashan tiemponpas maypi kasqaykichispas? Wakin iñiqmasikunan ñawpaqta kusisqa uyawan runata qhawaykunku. Sichus chay runa kusisqa uyawan qhawarillantaq chayqa, rimayta qallarinku.
Sichus rimayta qallarinaykipaq manchapakunki chayqa, sonqollaykipi Diosmanta mañakuy (Neh. 2:4; Hech. 4:29).
Rimayta qallarinaykipaqqa yaqapaschá napaykuwaq otaq imallatapas niwaq. Jesuspas Samaria llaqtamanta warmiman predicananpaqqa unumantan rimayta qallarirqan (Juan 4:7). Chay hinatan ruwawaq, yaqapaschá niwaq: “Kay wawaykikunaqa ancha respetoyoq kasqaku”, nispa. Otaq tapuriwaq: “¿Uyarirqankichu noticiakunata?”, nispa.
Imamantapas rimayta qallarisqaykichis qhepamanqa, allillamantan Bibliamanta willayta qallariwaq. Ichaqa reqsisqayki runakunawan imayna rimanaykita hinalla rimay. Yaqapaschá tapukunanpaq hina imatapas niwaq. Familiamanta rimashankichis chayqa, niwaqmi: “Wawakunata imayna uywanamantan huk sumaq qelqata leerqani”, nispa. Noticiakunamanta rimashankichis chayqa, niwaqmi: “Qayninpakunallan ancha sumaq noticiakunata yacharurqani”, nispa. Sichus manaraq Bibliamanta willashaqtiyki pasapunqa chayqa, ama llakikuychu.
Apay tratadokunata huk qelqakunatapas munaqkunaman qonaykipaq.

Killantin kayta ruway:

Kallpachakuy sapa semana hukllamanpas predicanaykirayku ima tumpallapas parlayta qallarinaykipaq.