Profetakunaq ruwasqanqa allinninchispaqmi: Sofonías
1. ¿Imayna tiempopin Sofonías predicayta qallarirqan? ¿Imaynatan Sofoniaspa ruwasqanta qatikusunman?
1 Rey Amón kamachikusqan tiempopin (650 watakunapi, m.J.h.) Judá llaqtapi yaqa llapa runakuna Baal diosta yupaycharqanku. Ichaqa Amón reymi qonqaylla wañuchisqa karqan, paypa rantintataq churin Josiasta reyta churarqanku (2 Crón. 33:21-34:1). Chaykuna kashaqtinmi Diosqa Sofoniasta kamachirqan phiñakuynin p’unchaymanta willananpaq. Payqa reypa familianmantan kanman karqan, chaywanpas Diosta kasukuspan llaqtapi kamachikuqkuna contra willarqan (Sof. 1:1; 3:1-4). Ñoqanchispas Sofonías hinan mana manchakuspa Diospa juicionmanta runakunaman willamunanchis, manataqmi familianchiskunatachu ñawpaqman churananchis hark’akuwaqtinchis (Mat. 10:34-37).
2. ¿Imatan ruwananchis “Diospa k’arak phiñakusqan p’unchaypi” pakaykusqa kanapaq?
2 “Diosman kutirikuychis”. Jehová Diosllan k’arak phiñakuynin p’unchaypi runakunata wañuymanta qespichiyta atinqa. Chaymi Sofoniaspas Judá llaqtapi runakunata kallpacharqan Diosman kutirikunankupaq, chaninkaqta ruwanankupaq, huch’uyyaykukuq kanankupaq ima (Sof. 2:2, 3). Pay hinan kunanpas runakunata kallpachashanchis Diosman kutirikunankupaq. Ichaqa chaytan ñoqanchispas ruwananchis (Sof. 1:6). ¿Imaynatan Diosman kutirikusunman? Tukuy yuyaywan Bibliata leespa, chaypi yachasqanchisman hina imatapas ruwaspa. ¿Imaynatan chaninkaqta ruwasunman? Ch’uyata kawsaspa. ¿Imaynatan huch’uyyaykukuq kasqanchista rikuchisunman? Diospa llaqtanpi ima kamachikuykunatapas sonqomanta kasukuspa.
3. ¿Imaraykun predicay llank’ayninchista kusisqa sonqowan aparinanchis?
3 Kanqapunin uyarikuqkuna. Sofoniaspa predicasqanqa manan yanqapaqchu karqan. Karqanmi Diospa siminta uyarikuqkuna, Josiaspas uyarikurqanmi. Chaymi Judá llaqtapi idolokuna yupaychayta chinkachinanpaq anchatapuni kallpachakurqan (2 Crón. 34:2-5). Kunanpas Diospa Gobiernonmanta wakin t’akasqanchis muhun allin hallp’aman chayashan, chaykunataq allinta rurushan (Mat. 13:18-23). Jehová Diospa yanapayninwanqa astawanraqmi chay sumaq llank’ayta aparisun (Sal. 126:6).
4. ¿Imaraykun Diospa p’unchayninta ‘suyakushanallanchis’?
4 Judá llaqtapi runakunaqa thakmi kasharqanku ‘manan imapas kanqachu’ niqman rikch’akuqta. Chaymi Diospuni willachirqan: “Diospa hatun p’unchayninqa qayllaykamushanñan”, nispa (Sof. 1:12, 14). Diosman kutirikuqkunallan chay p’unchaymantaqa qespichisqa kananku karqan (Sof. 3:12, 17). Chayrayku llapa iñiqmasinchiskunawan kuska Diospa p’unchayninta ‘suyakuspa’, kusisqa sonqowan predicashallasun (Sof. 3:8, 9).