¿Imaraykun librasqa kananchis karqan?

1, 2. ¿Imaraykun libranata necesitashanchis? (Romanos 7:​22-24; qhaway kay parrafokunapaq fotota).

JUJ wasis urmaykapunman, jinaspas juj runata ñit’ipunman. Payqa kausashallanmansi, chaysi chaymanta orqonata munashanman. Manataq kuyuriyta atinmanchu chayqa auxiliota mañakuspallas kashanman, chhaynapi pillapas chaymanta orqonanpaq.

² Noqanchispas sapankanchismi chhaynapi tarikushanchis. ¿Imarayku? Adanpa wawankuna kasqanchisrayku, payqa manan Diosta kasukurqanchu chhaynapin juchasapa kapurqan. Llapa runakunataq paypa wawankuna kanchis chayqa, noqanchispas juchasapan kanchis. Wasiq urmasqanpi ñit’isqa runa jinan kashanchis, chayraykun jujpa librananta necesitashanchis. Roma llaqtapi iñiqkunaman carta apachisqanpin apóstol Pablo chaymanta sut’ita willan (leey Romanos 7:​22-24). Chaypin juj partepi nin: “¿Pitaq kay wañuyman aysaqniy cuerpomantari librawanqa?”, nispa. Pabloqa juchaq ñit’isqan jinan kasharqan, allintan yacharqan imaynas wañuymanqa chayananpuni karqan chayta (Rom. 6:23). Noqanchispas Pablo jinan kashanchis, chaymi juj libraqta necesitashanchis.

3. ¿Imakunan kanqa Jesús noqanchisrayku wañusqanmanta?

³ Imaynapichus tarikusqanta willakusqan qhepamanmi Pabloqa juj munay willakuyta qelqallarqantaq. “¿Pitaq kay wañuyman aysaqniy cuerpomantari librawanqa?” nisqan qhepamanmi nirqan: “¡Diostan gracias nini Señorninchis Jesucristowan librawasqanmanta!”, nispa (Rom. 7:25). Chaypi nisqan jina Jesuspa sacrificio ruwasqanwanmi Diosninchisqa librawarqanchis.a Jesús vidanta entregasqanraykun 1) Juchanchis perdonasqa kapun, 2) qhalilla kasunchis, mana imamantapas llakikusunñachu 3) Dioswanpas allinpi kapunchis. Chaykunamantan sapankamanta kaypi yachasunchis. Chayqa allintachá yanapawasun Diosta astawan munakunanchispaq, Jesustapas tukuy sonqomanta gracias ninanchispaq, paymi vidanwan noqanchistaqa librawarqanchis (Rom. 15:13; Col. 1:14).

JUCHANCHISMI PERDONASQA KAPUN

4, 5. ¿Imaraykun llapanchispas necesitanchispuni librasqa kayta? (Eclesiastés 7:20).

⁴ Juchanchiskuna perdonasqa kananpaqqa kananpunin juj libraq o kacharichiq. Runakunataq kanchis chayqa juchapakunchispunin imata rimaspapas otaq ruwaspapas (leey Eclesiastés 7:20). Wakin juchakunaqa nishu jatunmi. Chay juchakunamanta wakinmi kanman jujwan pantay, runamasita wañuchiy ima. Kamachikuy Simipi nisqanman jinaqa pipas chay juchakunaman urmaqqa wañunanmi karqan (Lev. 20:10; Núm. 35:​30, 31). Wakin juchakunaqa manapaschá nishu jatunchu, chaywanpas juchapunin chaykunaqa. Rey Davidmi nirqan: “Maymanchus sarusqaytan allinta qhawarikusaq, chhaynapin qalluyqa mana juchallikunqachu”, nispa (Sal. 39:1). Chaypi nisqan jina mayninqa hasta rimasqanchiswanpas juchapakusunmanmi (Sant. 3:2).

⁵ Ñaupaqkunapi imachus rimasqanchispi, ruwasqanchispi ima piensarisun. Yaqapaschá mayqenmantapas nishanchis: “¿Imaraykutaq chaytari rimarurqani? ¿Imaraykun chayta ruwarqani?”, nispa. Rikusqanchis jina llapanchispas imapipas pantanchispunin. Bibliapipunin nin: “Mana juchayoqmi kayku nisunmanchus chayqa, noqanchis kikillanchistaqmi engañakushasunman, manataqmi cheqaq kaqqa noqanchispichu kashanman”, nispa (1 Juan 1:8).

6, 7. ¿Imaraykun Jehová Dios perdonayta atiwanchis? (Qhaway kay parrafokunapaq dibujota).

⁶ Juchanchis perdonasqa kananpaqmi Jehová Diosqa Jesusta kachamurqan. Paymi noqanchisrayku wañurqan (Efes. 1:7). Ichaqa chayraykuchu nisunman: “Jehová Diosmanqa manan imapas qokunchu juchapakunchischu manachus chayqa”, nispa. Manapunin, Jehová Diosqa cheqnikunmi juchata, manapunin munanchu pipas juchallikunanta (Isa. 59:2). Chayraykun Jesustapas kachamurqan juchanchisrayku wañunanpaq.

⁷ Moisespa chaskisqan kamachikuyman jinaqa Israel llaqtapiqa pipas juchallikuqqa juj animaltan sacrificiopi jaywanan karqan, chhaynapi juchan pichasqa kananpaq (Lev. 4:​27-31; 17:11). Chay ruwasqankuqa llanthu jinallan karqan; Jesuspa sacrificio ruwasqanmi cheqaq sacrificioqa karqan, chaywanmi imaymana bendicionkuna jamunan karqan. Jesuspa wañusqanraykun Jehová Diospas perdonayta atiwarqanchis. Apóstol Pablopas Corinto llaqtapi iñiqkunaman apachisqan cartapin Jesuspa chay sacrificio ruwasqanmanta allintapuni rimarqan. Ñaupaqpi mana allinkuna ruwasqankuta yuyarichisqan qhepamanmi nirqan: “Chaywanpas ñan maqchisqaña ch’uyanchasqaña kankichis, ñan Señor Jesucristoq sutinpi Diosninchispa espiritunwan chaninchasqaña kankichis”, nispa (1 Cor. 6:​9-11).

8. ¿Imapin piensananchis Jesuspa wañupusqanta yuyarinapaq juñunakuyman manaraq rishaspanchis?

⁸ Kay watapi Jesuspa wañupusqanta yuyarinapaq juñunakuyman manaraq rishaspa, allinta piensarisun imaynas Jehová Diosqa perdonawarqanchis chaypi. Jesuspa wañupusqanraykun manaña piensanchischu ñaupaqkunapi juchapakusqanchispiqa, ñataq arrepientekurqanchisña chayqa manañan chaykunataqa yuyarinchischu. Ichaqa yaqapaschá nishasunman: “Jehová Diosña perdonawan chaypas, noqaqa manan perdonakuymanchu”, nispa. Ichaqa Jehová Diosmantan perdonasqachus kanchis manachus chayqa. Jesustan churarqan juzgawananchispaqpas. Chhaynaqa manan noqanchismantachu pitas Jehová Diosqa khuyapayanqa pitas mana chayqa. Bibliapin nin: “K’anchaypichus purisun chayqa, churin Jesuspa yawarninmi tukuy ima juchamantapas limpiawasun”, nispa (1 Juan 1:​6, 7). Bibliaq chay yachachisqanpiqa tukuy sonqon confiananchis, imaynan juj yachachikuykunapi confianchis chhaynatan chaypipas confiananchis. Jesuspa wañusqanraykun Jehová Diosqa khuyapayawanchis, Bibliaq nisqan jina “liston payqa kashan juchanchista perdonawananchispaq” (Sal. 86:5).

MANAÑAN ONQOYPAS LLAKIKUYPAS KANQACHU

9. ¿Imatan Bibliapi nishan jucha nispa? (Salmos 51:5).

⁹ Bibliapiqa jucha nispaqa nishan manan mana allin ruwaykunallatachu, aswanpas juchayoqña nacesqanchista iman. Arí llapapas juchasapañan nacenchis (leey Salmos 51:5). Chay juchan tanqawanchis mana allin ruwayman, ichaqa manan chayllachu, chay jucha kasqanraykun onqonchis, machuyanchis, payayanchis wañupunchispas. Chayraykun wawakunapas manaña juchallikurqankuchu chaypas onqopunku mayninqa wañupunku. Chayraykun allin runakunapas mana allin runakunapas nak’arinku wañupunku ima, llapa runakunan chhaynapi tarikushanchis.

10. ¿Imaynan tarikurqanku Adanwan Evawan juchallikusqanku qhepaman?

¹⁰ Juchallikusqanku qhepaman Adanwan Evawan imaynachus tarikurqanku chaypi piensasun. Diospa kamachisqanta mana kasukusqanku qhepamanmi sonqonku sinchita nanarqan (Rom. 2:15). Manañan paykunaqa igualñachu kapurqanku, cuerponkutapas raphikunawanmi tapakurqanku, kamaqninku Diosmantapas suwa jinan pakakurqanku (Gén. 3:​7, 8). Paykunataqa sonqonkun juchacharqan, llakisqa, manchasqa, nanasqa p’enqasqa iman kasharqanku. Manan jayk’aqpas chhaynapiqa tarikurqankuchu, wañupunanku p’unchaykaman paykunaqa chhayna kapurqanku (Gén. 3:​16-19).

11. ¿Imakunapin tarikunchis juchayoq runa kasqanchisrayku?

¹¹ Noqanchispas juchasapa runakunataq kanchis chayqa Adán Eva jinan tarikushanchis. Juchasapa runakuna kasqanchisraykun imaymanapi sufrinchis, llakikunchis. Tukuy atisqanchistaña kallpachakunchis allin kananchispaq chaypas kanpunin llakikuypas nanaypas. Chaymanta rimaspan Bibliapipas nin: “Kamasqakunaqa yanqa kausaymanmi jap’ichisqa karqanku”, nispa (Rom. 8:20). Autoridadkunapas tukuy atisqankutan ruwashanku suwakuyta, wajchayayta, guerrakunata, contaminación nisqatapas tukuchinankupaq, ichaqa ¿Atishankuchu? Manan atinkuchu, wakinta atirqankuña chaypas yaqa llapanpin fracasapunku. Diospa gobiernonpin ichaqa llapa chaykuna allichakapunqa, Jesuspa wañusqanraykun chaykunaqa kanqa.

12. ¿Imaynan kausay kanqa Jesuspa wañusqanrayku?

¹² Jesuspa wañusqanraykun “kamasqakunaqa ismusqa kayman watasqa kasqankumanta kacharichisqa kanqaku” (Rom. 8:21). ¿Imaninantaq chayri? Diospa gobiernonpi ch’uya cuerpoyoq mana ima juchayoq kaspaqa manañan imawanpas onqosunchu, manañan imatapas manchakusunchu, manañan llakikuypas sonqo nanaypas, p’enqakuypas ni ima nanaypas kanqañachu. Chaymantapas “thaj kaywan kamachiq” Jesustaq gobiernapuwasun chayqa manañan kay pachataqa qhellichasunchu, aswanmi thaj chaypi tiyapusunchis (Isa. 9:​6, 7).

13. ¿Imapin piensanallanchistaq Jesuspa wañupusqanta yuyarinapaq juñunakuyman manaraq rishaspa?

¹³ Jucha chinkapuqtinqa may munaychá vidaqa kanqa, chaypi astawan piensarisunchis. Chay tiempopiqa mana imamanta llakikuspan rijch’arisunchis, manan jayk’aqpas yarqaypiqa kasunchu, manan onqosunchu ni wañusunpaschu. “Chay suyakuyman qaqata jap’ipakusun chayqa”, kunanpas thajmi kasunchis, yachasqanchis jinapas “chay suyakuyqa ancla jinan vidanchispaqqa, cheqaqpunitaqmi mana kuyuriqtaqmi kanpas” (Heb. 6:​18, 19). Imaynan anclaqa barcota qaqata sayachin chhaynatan chay kausaypi piensasun chayqa iñiypi qaqata sayasunchis, ima llakiña jamunqa chaypas manan atipawasunchu. Chhaynaqa amapuni Jehová Diosmantaqa iskayasunchu payqa “tukuy sonqowan maskhaqninkunaman premiota qoq Diosmi” (Heb. 11:6). Llapa chay yachasqanchisqa, jamuq tiempopi sumaq kausay suyakusqanchispas Jesuspa wañusqanraykun kanqa.

DIOSWANMI ALLINPI KAPUNCHIS

14. ¿Imaynan Jehová Dioswan kapurqanchis Adán Evaq juchallikusqanku qhepaman, imarayku?

¹⁴ Adanwan Evawan juchallikusqankumantapachan runakunaqa Diosmanta t’aqasqa kashanchis (Col. 1:21). Bibliapi nisqan jina Diospa enemigonmi kapunchis (Rom. 8:​7, 8). ¿Imaynataq chayri? Jehová Diosqa ch’uya Diosmi, manapunin payqa juchataqa allinpaqchu qhawarin. Chaymanta rimaspan Bibliata qelqaq runa nirqan: “Diosníy, qanqa ch’uyay-ch’uyan kanki, mana allin ruwaytaqa manan jinallataqa qhawankichu, manan rikuytapas munankichu”, nispa (Hab. 1:13). Rikusqanchis jina juchaqa nishutapunin Diosmanta karunchawarqanchis. Manan paywanqa allinpi kasunmanchu manachus juj allipunachiq yanapawasunman chayqa. Chay allipunachiqqa Jesusmi.

15. ¿Imaynapin Jesuspa wañusqan Jehová Diospa sonqonta tiyaykachirqan?

¹⁵ Bibliapin Jesusmanta nin: “Paymi juchanchista perdonachiq Dioswan allipunachiq sacrificioqa”, nispa (1 Juan 2:2). Griego rimaypiqa kaypiqa “allipunachiy” nispaqa nishan “sonqota tiyaykachiymantan”. ¿Imaynapin Jehová Diospa sonqonta tiyaykachirqan Jesuspa wañusqan? Chaypiqa sonqota tiyaykachiymanta rimaspaqa manan cheqaqtapuni Diospa sonqonta tiyaykachiymantachu rimashan, aswanpas chanin kamachikuyninman jina imapas ruwakusqanmantan. Chaywanmi Jehová Diosqa jujmanta runakunawan allinpi kapurqan (Rom. 3:​23-26). Jesuspa wañusqanraykun ñaupa tiempopi Diosta serviqkunapas allinpaq jap’isqa karqanku (Gén. 15:​1, 6). Ichaqa, ¿imaraykun paykuna chaninpaq jap’isqa karqanku? Diosqa yacharqanpunin wawan Jesús llapa runakunata librananta (Isa. 46:10). Rikusqanchis jina, Jesuspa wañusqanraykun runakunaqa Dioswan allinpi kayta atinchis.

16. ¿Imapin piensallasunmantaq Jesuspa wañupusqanta yuyarinapaq juñunakuyman manaraq rishaspanchis? (Qhaway kay parrafopaq dibujota).

¹⁶ May allinpunin Jehová Dioswan allinpi kasqanchisqa, chayraykun paytaqa Jesuspa yachachisqan jina “Taytáy” ninchis (Mat. 6:9). Chaymantapas yaqapaschá paytaqa sapa kutilla amigoymi ninchis. Ichaqa paymanta rimaspaqa respetowan k’umuykukuywan iman rimananchis. ¿Imarayku? Juchasapa runakuna kasqanchisrayku. Chaymantapas Jehová Dioswanqa allinpi kashanchis, amigontinpas kashanchis manan imatapas ruwasqanchisraykuchu aswanpas Jesuspa wañusqanraykun. Bibliaq nisqan jina “ñak’arina k’aspipi Cristoq jich’asqan yawarwanmi” Diosqa pay kikinwan allipunachiwarqanchis (Col. 1:​19, 20). Chaykunata ruwasqanraykun kunanqa juchasapaña kanchis chaypas Dioswanqa allinpi kashanchis.

JEHOVÁ DIOS KHUYAPAKUQ KASQANTAN RIKUCHIN

17. ¿Imaraykun nisunman Jesuspa wañupusqanmi rikuchin Jehová Diosqa khuyapayakuq kasqanta nispa? (Efesios 2:​4, 5).

¹⁷ Jesuspa wañusqanmi rikuchin imaynas Jehová Diosqa “may khuyapayakuq chayta”, paymi “juchanchis jawa wañusqa kashaqtinchis kausarichiwarqanchis” (leey Efesios 2:​4, 5). “Wiñay kausayman apaq ñanninta llapa puriyta munaqkunaqa” qallariypi rimamusqanchis wasiq ñit’isqan runa jinan kashanku, paykunaqa allintan yachanku juj libraqta necesitasqankuta (Hech. 13:48). Chaymi paykunaqa yanapayta mañakuspa wajakushanku. Jehová Diostaq paykunata uyarispa gobiernonmanta willachishan paykunaman, chhaynapi payta Jesustawan reqsinankupaq (Juan 17:3). Satanasqa yaqapaschá piensasharqan Adán Evaq juchapakusqanwan Diospa munayninqa manaña junt’akapunanta, ichaqa manan piensasqanman jinachu imapas karqan.

18. ¿Imatan mana qonqananchischu Jesuspa wañupusqanta yuyarispanchis?

¹⁸ Jesuspa wañusqan allinninchispaqña karqan chaypas, karqanmi juj jatun razón pay jamunanpaqqa. Jehová Diosqa paytaqa kachamurqan Satanaspa rimasqan yanqa kasqanta rikuchinanpaqmi (Gén. 3:​1-5, 15). Jesuspa wañusqanwanmi Jehová Diosqa sutinta ch’uyancharqan. Chaywanmi juchamantapas wañuymantapas librawarqanchis. Chhaynapin Diosqa mayta munakuwasqanchista rikuchiwarqanchis. Chaymi noqanchisqa sut’ita rikuchinanchis Satanasqa Diosmanta rimaspaqa yanqata rimasqanta. Diosqa munakuq kayninpin chay ruwananchistapas jinallata qhawan (Prov. 27:11). Diostaqa ¡gracias ninanchispunin! Jesús noqanchisrayku wañusqanmanta. ¿Imaynatan chayta rikuchisunman? Chaytan qatimuq estudiopi yachasun.