Jesuspa sacrificio ruwasqanmantan agradecekunanchis

1, 2. ¿Imata ruwanapaqmi yanapawasun Jesuspa sacrificio ruwasqanpi piensay? (2 Corintios 5:​14, 15; qhaway kay parrafokunapaq dibujota).

JUJ wasis urmaykuspa ñit’ipusunkiman. Chayllamansi juj runa jamuspa chaymanta orqosunkiman, chhaynapitaq salvasunkiman. ¿Imatan ruwawaq chhayna yanapasqasuykita rikuspa? “Gracias” niwaqchá vidaykita salvasqanmantaqa. Chay ruwasqantaqa manachá jayk’aqpas qonqawaqchu.

² Ñaupaq kaq yachachikuypi rimamusqanchis jina, runakunaqa juchaman wañuyman iman vendesqa karqanchis, chaymi jujpa librawananchista necesitarqanchis. Chay juchamanta wañuymantawan librawananchispaqmi Jehová Diosqa wawan Jesusta kay pachaman wañunanpaq kachamurqan. Paypa wañusqanqa allinninchispaqmi karqan. ¿Imaraykun chayta ninchis? 1) Jesuspa wañusqanraykun juchanchiskunamanta librasqa kapunchis. 2) Paypa wañusqanraykun jamuq tiempopi qhali ch’uya runakuna kapusunchis 3) Jesuspa wañusqanraykun Jehová Dioswan allinpi kapunchis. Arí, Jesuspa wañusqanraykun qhepa tiempomanqa juj sumaq paraisopi wiñaypaq kausakusunchis. Jesusqa runakunata munakusqanraykun wañurqan. Payqa manaraq kay pachaman jamushaspan runakunataqa munakurqanña (Prov. 8:​30, 31). Runakunata munakuspa wañusqanmanta rimaspan apóstol Pablo nirqan: “Cristoq munakuyninmi tanqawanku chayta ruwanaykupaq”, nispa (leey 2 Corintios 5:​14, 15). Apóstol Pabloq nisqan jina llapanchismi Jesuspa sacrificio ruwasqanpiqa piensarinanchis. Chayta piensaymi yanapawasun Jesuspa sacrificio ruwasqanmanta agradecido kasqanchista rikuchinanchispaq.

3. ¿Imaraykun nisunman “sapankanchismi jujniraymanta rikuchinanchis kanqa Jesuspa sacrificio ruwasqanmanta agradecido kasqanchistaqa” nispa?

³ Ichaqa, ¿imakunata ruwaspan rikuchisunman Jesuspa sacrificio ruwasqanmanta agradecido kasqanchista? Chaytaqa sapankanchismi jujniraymanta rikuchinanchis kanqa. Chaypaq juj chhikanta piensarisun kinsa runakunapi. Paykunaqa juj llaqtamansi riyta munashankuman. Ichaqa paykunaqa manas kaq llaqtallapichu tiyankuman. Chhaynaqa chay munasqanku llaqtaman chayanankupaqqa manachá kaq ñannillantachu rinqaku. Chhaynatan Bibliata estudiaqkunapas, bautizasqa kaqkunapas, Diospa llaqtanmanta t’aqakuqkunapas jujniraymanta rikuchinanchis kanqa Jesuspa sacrificio ruwasqanmanta agradecido kasqanchista. Chaykunamantan kaypi yachasun.

BIBLIATA ESTUDIAQKUNA

4. ¿Imaynatan Jehová Dios qhawarin Biblia estudiaqkunata?

⁴ Bibliata estudiashanki chayqa, ¡may allinmi! Jehová Diosqa munanmi payman asuykunaykita paywan allin amigontin kanaykita (Juan 6:44; Hech. 13:48). Bibliapin nin: “Jehová Diosmi ichaqa sonqokunata t’aqwin”, nispa. Biblia estudiaqkuna, chay textopi nisqan jina Diosqa sonqoykitan qhawashan. Payqa yachanmi payta reqsinaykipaq imaymana ruwasqaykita, rikumushanmi kamachikuyninkunata kasukunaykipaq kallpachakusqaykitapas (Prov. 17:3; 27:11). Jesuspa wañusqanraykun Jehová Dioswanqa amigontin kayta atinki (Rom. 5:​10, 11). Chhaynaqa amapuni Jesuspa wañusqantaqa jayk’aqpas qonqaychu, aswanpas agradecido kasqaykita rikuchiy.

5. Biblia estudiaqkuna, ¿imaynatan rikuchiwaqchis Filipenses 3:16 textopi apóstol Pabloq nisqanta kasukusqaykichista?

⁵ Biblia estudiaqkuna, ¿imaynatan Jesuspa wañusqanmanta agradecido kasqaykichista rikuchiwaqchis? Chaypaqqa apóstol Pabloq yuyaychasqanta kasukuychis. Paymi Filipos llaqtapi tiyaq iñiqkunata nirqan: “Maykamachus iñiyninchispi wiñarqanchis chayman jinapuni allinta purisun”, nispa (Filip. 3:16). ¿Imata ruwanankupaqmi apóstol Pablo iñiqkunata kallpachashanman karqan? Iñiyninkupi wiñarishanallankupaqmi kallpacharqan. Chhaynaqa Bibliata estudiaqkuna, kallpachakuychis iñiyniykichispi wiñarinaykichispaq, estudiashallaychis Bibliatapas. Amapuni lloqsiychischu wiñay kausayman apaq ñanmantaqa (Mat. 7:14; Luc. 9:62).

6. Biblia estudiaqkuna, ¿imatan ruwawaqchis Diospa cheqnisqan ruwaykunata mana saqeyta atishankichischu chayqa? (Deuteronomio 30:​11-14; qhaway kay parrafopaq fotota).

⁶ Chaymantapas Bibliapi ima yachachikuytapas mana entiendeyta atishankichu chayqa, Jehová Diospa yanapayninta mañakuy yachachikuyninkunata allinta entiendenaykipaq. Chaymantapas chaykunamanta rimaq qelqakunata estudiay (Sal. 86:11). Chaywanpas manapuni entiendeyta atishankichu chayqa, qhepakunamanña chayta jujmanta estudiay. Ichaqa amapuni Biblia estudiaytaqa saqeychu. Chaymantapas sichus Jehová Diospa cheqnisqan ruwaykunata mana saqeyta atishankichu chayqa, ama chaywanqa pisipaychu. Aswanpas kayta yuyariy: Jehová Diosqa entiendewanchismi, yachanmi juchayoq runa kasqanchista. Chaymi payqa atinallanchista imatapas mañawanchis. Chhaynaqa atillankin kamachikuyninkuna kasukuytaqa (leey Deuteronomio 30:​11-14). Chay ruwaykunata saqenaykipaqqa Jehová Diosmi yanapasunki (Isa. 41:​10, 13; 1 Cor. 10:13). Chhaynaqa ama pisipaychu. Aswanpas imakunatachá Jehová Dios qanpaq ruwapurqasunki chaypi piensariy. Imaynas wawan Jesustapas qanrayku wañunanpaq kachamurqan chaypi ima piensariy. Chayta ruwanki chayqa astawanmi Jehová Diosta munakapunki, faciltan kamachikuyninkunatapas kasukunki (1 Juan 5:3).a

7. Wawakuna, wayna-sipaskuna, ¿imata ruwaspan rikuchiwaqchis Jesuspa sacrificio ruwasqanmanta agradecido kasqaykichista?

⁷ Diospa llaqtanpi tayta-mamakunaqa anchatan wawankuta munakunku, chaymi tukuy atisqankuta kallpachakunku wawankuta Bibliamanta yachachinankupaq. Qankunatapas wawakuna wayna-sipaskuna, tayta-mamaykichis Bibliamanta yachachishasunkichis chayqa estudiashallaychis. Bibliapin nin: “Diosman asuykuychis, jinan paypas asuykamusunkichis”, nispa (Sant. 4:8; 1 Crón. 28:9). Chay textopi nisqan jina, sichus Diosman asuykunkichis chayqa, paypas astawanmi qankunaman asuykamusunkichis. Jehová Diosqa manan tayta-mamaykichis payta servisqankuraykullachu munakusunkichis. Payqa piensanmi qankunapipas munakusunkichismi, munanmi paywan amigontin kanaykichistapas. Ichaqa paywanqa Jesuspa wañusqanraykullan amigontin kayta atinkichis. Chaymi Jesuspa ruwasqantaqa manapuni qonqanaykichischu (Rom. 5:​1, 2). Ichaqa, ¿imata ruwaspan rikuchiwaqchis Jesuspa sacrificio ruwasqanmanta agradecido kasqaykichista? Jesuspa wañusqanta yuyarina p’unchaykunapi Jesuspa sacrificio ruwasqanpi piensariychis. Chaypi piensaymi yanapasunkichis iñiyniykichispi wiñarinaykichispaq.b

BAUTIZASQA KAQKUNA

8. Bautizasqa kaqkuna, ¿imakunata ruwaspan rikuchirqankichis Jesuspi iñisqaykichista?

⁸ Bautizasqaña kashanki chayqa, ñachá imaymanamantaña rikuchirqanki Jesuspi iñisqaykitaqa. Qanqa imaymanatachá ruwarqanki Bibliata estudiashanallaykipaq Diospa kamachikuyninkunata kasukunaykipaqpas. Chaymantapas kallpachakurqankichá Jesuspa kamachisqanman jina Diosmanta willamunaykipaq. Chaymantaqa Diosman prometekuspachá bautizakurqanki familiaykiña jark’akurqanku chaypas (2 Tim. 3:12). Chaykunata ruwaspaqa Jehová Dios munakusqaykita, Jesuspa sacrificio ruwasqanmanta agradecido kasqaykita iman rikuchirqanki (Heb. 12:​2, 3).

9. Bautizasqaña kashanchis chaypas, ¿imaynatan yaqapas Jehová Diosta servishasunman?

⁹ Unayña bautizasqa kashanchis chayqa, manan qonqananchischu Jesuspa sacrificio ruwasqanmanta agredecido kasqanchista rikuchiytaqa. Mayninqa mana reparakuspan chay ruwayta qonqapusunman. Chaymi pasarqan Éfeso llaqtapi iñiqkunatapas. Jesusmi paykunata nirqan: “Kusatan qanqa aguantashanki, imaymanakunatan sutiyraykupas aguantashanki”, nispa. Chay qhepamanmi ichaqa nirqan: “Chhaynaña kaqtinpas, munakuyniykiqa manañan qallariypi jinañachu kashan”, nispa (Apo. 2:​3, 4). Jesuspa nisqan jina chay tiempopi iñiqkunaqa manan ganaswanñachu Jehová Diosta servisharqanku. Chayqa noqanchistapas pasawasunmanmi. Mañakushasunmanña, juñunakuykunamanpas rishasunmanña, predicaqpas lloqsishasunmanña chaypas, manapaschá chaytaqa ganaswanñachu ruwashanchis, obligasqa jinapaschá ruwashanchis. Manaña ñaupaqkunapi jinachu chaykunata kusisqa ruwashanchis chayqa, ¿iman yanapawasunman?

10. ¿Imata ruwananchispaqmi 1 Timoteo 4:​13, 15 texto kallpachawanchis?

¹⁰ Apóstol Pablon Timoteota kallpacharqan imaynatas Jehová Diosta servisharqan chaypi piensananpaq. Chaymantapas kallpacharqanmi Dios serviypi yuyayninta churananpaq (leey 1 Timoteo 4:​13, 15). ¿Imaynatan noqanchispas apóstol Pabloq yuyaychasqanta kasukusunman? Imakunata ruwaychá kusisqalla Jehová Diosta servinanchispaq yanapawasunman chaykunapin piensarinanchis (Rom. 12:11). ¿Imakunatan chaypaq ruwasunman? Juñunakuykunatan tukuy yuyaywan uyarinanchis, chaypi comentanapaqpas allintan preparakunanchis. Chaymantapas mana distraekuspan sapallanchispi Bibliata allinta estudiananchis, chay yachasqanchispitaq yuyaymanananchis. Chaykunata ruwaymi yanapawasun kusisqalla Jehová Diosta servinanchispaq, Jesuspa sacrificio ruwasqanmanta agradecido kasqanchista ima rikuchinanchispaq. ¿Imatawanmi ruwasunman? Ima bendicionkunatachá Jehová Dios qowarqanchis chaypin Jesuspa wañupusqanta yuyarina p’unchaykunapi piensarinanchis. Chaypas yanapawasunmi Jesuspa wañusqanmanta agradecido kasqanchista rikuchinanchispaq.

11, 12. Maynin p’unchaykunaqa manapaschá ganasninchis ni kallpanchispas kanqachu, ¿chaywanchu nisunman “manañachá Jehová Diosqa yanapawanñachu” nispa? (Qhaway kay parrafokunapaq fotota).

¹¹ Mayninpi mana ganasninchis kanqachu Jehová Diospa munayninta ruwanapaq chayqa, manan nishutaqa llakikunachu. Manan ninachu: “Jehová Diosqa manapaschá yanapawanñachu, chaypaschá chhayna kashani”, nispaqa. Chhayna kaqtinqa apóstol Pabloq nisqantan yuyarinanchis. Paypaqpas mayninqa manan ganasnin karqanchu Diosmanta willananpaq. Chaymi nirqan: “Manaña noqachu chay ruwayta ajllakurqani chaypas, ruwanaypunin chaytaqa, chaypaq churasqa kasqayrayku”, nispa (1 Cor. 9:17).

¹² Nimusqanchis jina, apóstol Pabloqpas mayninqa manan ganasnin karqanchu Diosmanta willananpaq. Chhaynaña mayninpi kasharqan chaypas, riqpunin Diosmanta willaqqa. Noqanchispas chaytan ruwananchis. Maynin p’unchaykunaqa manapaschá ganasninchis ni kallpanchispas kanqachu. Chhayna kaqtinqa Jehová Diospa yanapaynintan mañakunanchis paypa munayninta ruwashanallanchispaq (Filip. 2:13). Chaymantapas Diosta serviypin yuyayninchista churananchis. Chaykunata ruwasun chayqa, jujmantan kusisqa Jehová Diosta servisun.

13. ¿Imakunatan ruwananchis allinchus iñiyninchispi kashanchis icha manachus chayta reparakunanchispaq?

¹³ Chaymantapas 2 Corintios 13:5 textopi nisqantan kasukunanchis. Chaypin nishan: “Qankuna kikiykichista allinta t’aqwikuychis allinchus iñiypi kashankichis icha manachus chayta yachanaykichispaq, allintataq qhawarikuychis imayna runachus kashankichis chayta”, nispa. Chaypaqqa tapukunanchismi: “¿Imatan ñaupaqpi churashani, Jehová Dios serviytachu icha juj ruwaykunatachu? ¿Imakunawanmi kusirikuni, allin ruwaykunawanchu icha Diospa cheqnisqan ruwaykunawanchu? ¿Kallpachakunichu iñiq t’aqapi hermanokunawan allinta apanakunaypaq?”, nispa (Sal. 97:10; Mat. 6:33; Efes. 4:​2, 3). Chaykunapiqa Jesuspa wañupusqanta yuyarina p’unchaykunapin piensarisunman. Chaymantapas imakunatachus Jehová Diospas Jesuspas noqanchisrayku ruwarqanku chaykunapin piensarinallanchistaq. Chaykunapi piensaymi yanapawasun paykunata agradecekunanchispaq, Cristollapaqña ima kausananchispaq.c

DIOSPA LLAQTANMANTA KARUNCHAKUQKUNA

14. ¿Imaraykun wakin hermanonchiskuna Diospa llaqtanmanta karunchakapurqanku?

¹⁴ Askha hermanonchiskunan unayña Jehová Diosta servishaspa paymanta karunchakapurqanku. ¿Imarayku? Wakinqa imaymana sasachakuypi llakikuypi tarikuspan karunchakapurqanku (Luc. 21:34). Wakintaq juj hermanowan phiñachinakuspa Diosmanta karunchakapurqanku (Sant. 3:2). Wakintaq jatun juchaman urmaspa Diosmanta karunchakapurqanku. Qanpas Diosmanta karunchakapurqanki chayqa, ¿imatan ruwawaq Diospa llaqtanman kutimpunaykipaq?

15. ¿Imaynatan Jehová Dios qhawarin llaqtanmanta karunchakuqkunata? (Ezequiel 34:​11, 12, 16).

¹⁵ Imaynatas Jehová Dios qhawarin llaqtanmanta karunchakuqkunata chaypi piensariy. Bibliapi willasqan jina, Jehová Diosqa paykunataqa chinkasqa ovejachankunata jinan qhawarin. Payqa imaymanatan ruwashan llaqtanman kutimpunankupaq (leey Ezequiel 34:​11, 12, 16). Jehová Diosqa manan qantapas qonqasunkichu, yanapaytan munashasunki. Kay qelqata leespan rikuchishanki Jehová Dios munakusqaykita. Kayta yuyariy: Jehová Diosqa allin sonqoyoq kasqaykita rikuspan llaqtanman pusamurqasunki. Kunanpas maytan munashan llaqtanman kutimpunaykita.

16. ¿Imatan Diosmanta karunchakuqkuna ruwankuman Diospa llaqtanman kutimpunankupaq? (Qhaway kay parrafopaq fotota).

¹⁶ Jehová Diosqa maytan munashan kutimpunaykita nisqa folleton Diosmanta karunchakuqkunata kallpachashan Diospa llaqtanman kutimpunankupaq. Chaypin nin: “Jehová Diosmi yanapasunki llaqtanman kutimpunaykipaq. Paymi yanapasunki llakikuyniykikunata atipanaykipaq, paymi jampinqa k’irisqa sonqoykita, paymi ch’uya concienciayoqman tukuchipusunki. Chhaynapin wajmanta Diosta serviyta atinki”, nispa. Umalliqkunapas yanapaytan munashasunkichis. Paykunaqa “wayramanta pakakuna jinan kanku, sinchi paramanta pakakuna jinan kanku” (Isa. 32:2). Chhaynaqa, ¿imakunatan ruwawaq Diospa llaqtanman kutimpunaykipaq? (Isa. 1:18; 1 Ped. 2:25). Kallpachakuy juj juñunakuyman rinaykipaq. Chaymantapas juj umalliqwan rimay, jinaspa willay imaynas Diospa llaqtanman kutimpuyta munashanki chayta. Payqa yaqapaschá nisunki juj hermano Bibliamanta estudiota qonasuykipaq. Chaykunata ruwaspan rikuchinki Jesuspa wañusqanmanta agradecido kasqaykita. Chay ruwasqaykimantaqa askha bendiciontan Jehová Diosqa qosunki.

¿IMATAN RUWANKI?

17, 18. ¿Imakunatan ruwasunman Jesuspa wañupusqan p’unchayta yuyarina semanakunapi?

¹⁷ Jesusmi nirqan: “Diosqa anchatapunin runakunata munakurqan, chaymi sapallan Churinta kachamurqan, pipas paypi iñisqanta rikuchiqqa ama wañunanpaq aswanpas wiñay kausayniyoq kananpaq”, nispa (Juan 3:16). Arí, Jehová Diosqa juchamanta wañuymantawan salvawananchispaqmi wawan Jesusta kachamurqan kay pachapi wañunanpaq. Chay ruwasqantaqa manapunin qonqananchischu (Rom. 3:​23, 24; 2 Cor. 6:1). Jehová Dioswan Jesuswanqa munakuwaspanchismi chaytaqa ruwarqanku. Chaypin Jesuspa wañupusqanta yuyarinapaq semanakunapi yuyaymanananchis. Chayta ruwaymi yanapawasun agradecido kananchispaq.

¹⁸ ¿Imata ruwaspan rikuchiwaq Jesuspa sacrificio ruwasqanmanta agradecido kasqaykita? Yachamusqanchis jina sapankanchismi jujniraymanta chaytaqa rikuchinanchis. Ichaqa imataña chaypaq ruwasun chaypas, Jehová Diosqa bendeciwasunpunin. Payqa anchatan kusikun pachantinpi serviqninkuna “Cristollapaqña kausasqankuta” rikuspaqa (2 Cor. 5:15).