14 RAHAB
Jehová Diostan llaqtanmantapas ñaupaqman churarqan
RAHABQA ramera warmin karqan, paypa wasinqa Jericó llaqta perqa patapin kasharqan. Payqa allintachá ventananmanta rikuq imaynatas “askha palmera sach’akunayoq” Jericó llaqta muyuriqta inti munayta k’anchaykusharqan chayta (Deut. 34:3). Llaqta ukhuman jaykuspataqchá rikuq runakunata manchasqa llakisqata ima. Jericó llaqtayoq runakunaqa allintan yacharqanku Israel runakunata Jehová Dios yanapananta, paykunapas wañuchisqa kanankuta.
Israel runakunaqa Jericó llaqta qayllapin karpakusharqanku. 40 wata ñaupaqllatan Jehová Diosqa chay llaqtanta librarqan faraonpa makinmanta, faraontataq soldadokunantinta Puka lamar-qochapi wañuchirqan. Chaymantapas ch’inneq ladopiña purimushaqtinkun atiyniyoq reykunata Israel runakunawan guerrapi atipachirqan, chay reykunan karqanku amorreo runakunaq reynin Sheón, Og ima. Kunantaq Israel runakunaqa listoña kasharqanku Jericó llaqta runakunaman Jehová Diospa castigonta chayachinankupaq, chay runakunaqa sinchi millaykunatan ruwaqku.
Rahabqa yacharqanmi llaqtanpi runakunaqa sinchi millayta kausasqankuta. Paypas ramera warmiña karqan chaypas munarqanmi cambiayta. Chayraykun Jehová Diospa imakunachus ruwasqanta uyarispa mana manchakurqanchu, aswanpas paypin iñiyta qallarirqan. Rahabqa allintan yacharqan imaynatas Jehová Diosqa llaqtanta cuidarqan, sumaqta qhawarirqan chayta. Jehová Diosqa manan Canaán llaqtapi dioskuna jinachu karqan, payqa munakuq, ch’uya, chanin Diosmi karqan. Chaymi Rahabqa payta serviyta munarqan.
Juj tutan iskay mana reqsisqa runakuna Rahabpa wasinman alojakuq chayarqanku. Payqa usqhayllan repararqan Israelmanta qhamiyaq runakuna kasqankuta. Ichaqa manan Rahabllachu chaytaqa yacharqan, Jericó llaqtamanta reypas yacharurqanmi chay runakunamantaqa. Chaymi chay reyqa runankunata kacharqan Rahabpa wasinmanta chay iskay qhamiyaq runakunata apamunankupaq. ¿Imatan Rahab ruwanman karqan? ¿Jehová Diostachu apoyarqan icha chay llaqtanpi reytachu?
Rahabqa mana manchakuspan Jehová Diosta apoyarqan. Chaymi chay iskay qhamiyaq runakunata wasinpi pakarqan, reypa runankunatataq juj ñanninta kachapurqan. Chay runakunaq ripusqanku qhepatan Rahabqa chay iskay Israel runakunata nirqan: “Noqaqa allintan yachani Jehová Dios kay llaqtata qopunasuykichista”, nispa. Payqa Jehová Diospin iñirqan. Chaymantapas willarqanmi Jericó llaqta runakuna Israel runakunata manchakusqankuta, chaywanmi chay qhamiyaq runakunata kallpacharqan. Chaymantapas valekurqanmi chay llaqtata thuniqtinku ama wasinta thuninankupaq.
¿Iman Rahabta yanaparqan qhelli kausayninta saqepuspa Jehová Diosman asuykunanpaq?
Rahabqa Jehová Diosta munakuspan chay iskay qhamiyaq runakunata pakarqan. Chaymi chay runakunaqa jurarqanku Rahabpas familianpas ama wañuchisqa kanankupaq. Ichaqa wasi ventananmantan Rahabqa puka waskhata warkumunan karqan, manataqmi paypas ni mayqen familianpas wasimanta lloqsinanchu karqan. Chayta ruwaspan salvakunanku karqan.
Rahabqa juj waskhatan mañarqan chay iskay qhamiyaqkuna ventananta uraykuspa ayqekunankupaq. Payqa imatachus chay runakuna nirqan chaytan ruwarqan, puka waskhatan wasi ventananmanta warkuykurqan. Chaymantapas manan pimanpas willarqanchu chay runakuna imachus ruwasqankumantaqa. Sichus Jericó runakuna yacharunkuman karqan chay iskaynin runakuna imachus ruway munasqankuta chayqa, Rahabtan wañuchipunkuman karqan. Chaymantapas Rahabqa llapa familiantan wasi ukhullapi kanankupaq nirqan. Payqa yacharqanmi imaynatas Jehová Diosqa Jordán mayuta sayachispa israelitakunata chimpachimurqan chayta. Chaykunan paytaqa yanaparqan astawanraq Diosman asuykunanpaq. Jericó llaqtapi runakunaqa manchasqachá kasharqanku qanchis kutita llaqtankuta israelitakuna muyuykusqankuta rikuspaqa. Qanchis p’unchaypi sacerdotekuna waqrakunata tocaqtinku, israelitakunapas fuerteta qapariqtinkun chay llaqtaq jatun perqankunaqa thunikuyta qallarirqan. Rahabpa wasinmi ichaqa manan thunikurqanchu, chhaynapin llapa familiantin salvakurqanku.
Jinan Jericó llaqta thunikusqan qhepaman qhamiyaqkunaqa Josuepa kamachisqanman jina Rahabta familiantawan wasinmanta orqomurqanku. Chay qhepamantaq Rahabqa Israel nacionmanta kapurqan, jinaspa juj Israel runawan casarakapurqan, wawakunayoq iman kapurqan. Rahabpa mirayninmantan jamurqan Señorninchis Jesucristopas (Mat. 1:5, 16). ¡Maytapunin Jehová Diosqa Rahabta bendecirqan paypi confiasqanmanta mana manchakuq kasqanmanta ima!
Kay textokunata leey
¿Imaniwaqmi?
¿Imakunata ruwaspan Rahab rikuchirqan mana manchakuq kasqanta?
Astawan t’aqwiriy
1. ¿Imaynan Rahabpa kausaynin kanman karqan Jericó llaqtapi? (w13 1/11 12, 13).
2. ¿Imaraykun nisunman “iskay qhamiyaq runakunaqa manan Rahabwan puñuqchu rirqanku” nispa? (it “Prostituta” párr. 16).
3. ¿Imaraykun Rahab wasin patapi lino chhallata tauqarayachirqan, imatan chaymanta ruwaqku? (it “Lino” párrs. 2-4). A
Thanks for your interest in my photos/Moment Open via Getty Images
Imagen A: Lino chajra.
4. ¿Imaraykun allin karqan reypaq runankunata Rahabpa engañasqan? (w04 1/12 9 párr. 1). B
Imagen B
Imakunapin yanapawasunman
¿Imaraykun Rahab mana manchakuq valiente kanan karqan qhelli kausayninta saqepunanpaq, jinaspa israelitakunawan kuska Jehová Diosta servinanpaq? ¿Imatan yachankuman Rahabpa ejemplonmanta chayllaraq Bibliata estudiaqkuna?
Bibliapiqa ninmi llullakuy jucha kasqanta. Ichaqa mayninpiqa Diospa enemigonkunan iñiqmasinchiskunamanta mana willana kaqkunata willananchista munankuman. Chaykuna pasaqtin, ¿imaynatan qatikusunman Rahabpa ejemplonta? (Prov. 11:13; Ecl. 3:7; Efes. 4:25). C
Imagen C
Imagen C
¿Imakunata ruwaspan rikuchiwaq Rahab jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Rahab kausarimpuqtin?
Astawan yachanapaq
¿Imaynatan Rahabmanta yachachikuy yanapawasunman Jehová Diospa p’unchaynin chayamuqtin salvakunanchispaq?
Kay willakuymanta wawaykikunawan yachashaspa “Bibliamanta dibujokunawan yachanapaq” nisqawan yanapachikuy.
“Rahabqa llapa kamachisqankutan kasukurqan” (ijwis yachachikuy 11)