15 NOEMÍ, RUT
Sasachakuypi tarikuspapas kuskallan kasharqanku
NOEMIQA imaymana ñak’ariykunapin tarikurqan. Juj kutinmi Israel llaqtapi sinchi yarqay karqan, chaymi qosanqa Belén llaqtamanta Moab llaqtaman ripunankupaq nirqan. Moab llaqtapi kashaqtinkun ichaqa Noemipa qosanqa wañukapurqan, jinan payqa iskaynin wawakunallantinña qhepakapurqan. Chaymantataq wawankunaqa Diosta mana serviq Moab warmikunawan casarakapurqanku. Chunka wata qhepamantaqmi Noemiqa sinchi ñak’ariypi tarikullarqantaq: ¡Iskaynin wawankunan wañukapurqanku! Paykunaqa manaraq wawayoq kashaspan wañukapurqanku. Chaymi Noemiqa mana qosayoq, mana wawakunayoq, mana nietokunayoq ima qhepakapurqan.
Manañataq familian karqanñachu chayqa Noemiqa manañan Moab llaqtapiqa qhepakuyta munarqanchu, Belén llaqtanmanmi kutipuyta munasharqan. Chaymantapas payqa kuraqñataq karqan chayqa juj semana jinan purinan karqan llaqtanman chayananpaqqa. Paywan kuskan Rutpas Orpapas puriyta qallarirqanku. Noemí ichaqa mana munarqanchu qhachuninkunata familianmanta llaqtanmanta karunchayta, aswanmi payqa munarqan jujmanta casarakuspa wawakunayoq kanankuta. Chaymi qhachuninkunata nirqan mamankuq wasinman kutipunankupaq. Noemiqa liston kasharqan sapallan llaqtanman kutipunanpaq. Chayta ruwaspaqa mana manchakuq valiente warmi kasqantan rikuchisharqan. Ichaqa, ¿imatan qhachuninkuna ruwankuman karqan? Iskayninkun waqayta qallarirqanku, chaymantataq Orpaqa wasinman kutipurqan, Rutmi ichaqa Noemiwan qhepakurqan.
Rutmi Noemita nirqan: “Amaña qanta saqenaypaq [ . . . ] rogakuwayñachu. Maymanchus rinki chaymanmi noqapas risaq, maypichus puñunki chaypin noqapas puñusaq. Llaqtaykin llaqtay kanqa, Diosniykin Diosniy kanqa. Maypichus wañunki chaypin noqapas wañusaq, chaypin p’ampasqapas kasaq”, nispa. Rutqa Noemí jinan Jehová Diosllata yupaychayta munarqan.
Iskay warmikunan qosankuq wañukapusqanwan sinchi sonqo nanasqa kasharqanku, jinan Diospa llaqtanpi sonqochasqa karqanku
Chaymi Rutqa llaqtanta, familianta, Moab llaqtapi diosninkunata saqespa Noemiwan kuska Israel llaqtata ripurqan. Belén llaqtaman chayaqtinku jinan chaypi warmikunaqa Noemí imayna kashasqanta rikuspanku admirakurqanku. Chaymi Noemiqa nirqan: “Tukuy atiyniyoq Diosmi sinchita sufrichiwan [ . . . ] ch’usaq makintintan kutichimpushawanpas”, nispa. Chayta nispaqa yaqapaschá Noemiqa Rutpa sonqonta k’irirqan, ¿imaraykun chayta ninchis? Rutqa imaymanatan ruwasharqan Noemita yanapananpaq. Bibliapiqa manan willanchu Rut phiñakurqanchus icha manachus chaytaqa. Rutqa cebadata pallapakuspan llank’ayta qallarirqan, chhaynapi mijuyninku kananpaq.
Cebada pallapakuypi Rut llank’ashaqtinmi juj runa allin llank’aq kasqanta repararqan, chay runan karqan Boaz. Chay runaqa Rahabpa wawanmi karqan, qhapaqtaqmi karqanpas. Chaymantapas payqa Jehová Diosta yupaychaspan kausaq. Paymi tapukurqan pichus Rut karqan chayta, chaypin yacharqan Noemita yanapananpaq imaymana ruwasqanta. Chaymi Boazqa Rut-ta felicitarqan Jehová Diospi confiasqanmanta. Chaymantapas llank’aqninkunatan kamachirqan ama imatapas ninankupaq.
Chay tutan Rutqa Noemiman willarqan imaynas Boaz sumaqta qhawarirqan chayta, chayta uyarispan Noemiqa mayta kusikurqan. Payqa yaqapaschá piensaykusharqan chay runa Rutwan casarakunanpi. Bibliapi willasqanman jinaqa Boazqa karqan Noemipa qosan Elimelecpa parientenmi. Diospa qosqan leypiqa willarqanmi sipas viudakunata imaynata yanapanamanta. Juj sipas warmi viuda kapuqtinqa atirqanmi qosanpa parientenwan casarakuyta. Boaz Rutwan casarakuspa wawayoq kapuqtinqa, chay wawaqa Elimelecpa mirayninmi kapunan karqan. Chhaynapi Elimelecpa herencian ama chinkananpaq (Deut. 25:5, 6). Chayraykun Noemiqa Rut-ta nirqan imachus ruwananta.
Rutqa uyarikurqanmi Noemipa imachus nisqanta. Paypaq jujnirayña manchakunapaq jinaña chay costumbre ruway karqan chaypas, Rutqa chay tutan Noemipa nisqanman jina cebada erana patata rirqan. Era patapin qharikunaqa puñuqku cebada cosechasqankuta cuidaspa. Rutqa mana reparachikuq jinallan Boazpa jayt’anman suchuykurqan. Boaz rijch’ariqtintaq k’umuykuspa sumaqllata yuyarichirqan viudakunamanta Diospa leynin imachus nisqanta. Boazqa khuyapayakuq runan karqan, repararqanmi Rut manchasqa kashasqanta. Payqa admirasqachá kasharqan chay warmi Jehová Diospaq Noemipaqpas junt’aq sonqo kasqanmantaqa. Chaychá Boazqa paywan casarakunanpaq listo kashasqanta nirqan. Ichaqa allintan yachanan karqan leypa nisqanman jina paymanchus Rutwan casarakuy tupan icha manachus chayta.
Boazqa qhepantin p’unchaymi Belenta rirqan, chaypin leypa nisqanman jina umalliqkunata tapukamurqan. Chaymantataq Rutwan casarakapurqan, tiempowantaq wawan Obed nacerqan. ¡Noemiqa maytan munakurqan chay nietonta! Yachasqanchis jina Obedpa mirayninmantan Davidqa nacerqan, askha watakuna qhepamantaq Mesías nacerqan (Mat. 1:5, 6, 16). ¡Jehová Diosqa maytan bendecirqan Noemitapas Rut-tapas mana manchakuq valiente kasqankumanta!
Kay textokunata leey
¿Imaniwaqmi?
¿Imakunata ruwaspan Noemiwan Rutwan rikuchirqanku mana manchakuq kasqankuta?
Astawan t’aqwiriy
1. ¿Imaraykun nisunman “chajrapi pallapakuyqa Israel llaqtallapin costumbre karqan” nispa? (ia 45 párr. 23, willakuy). A
Imagen A
Imagen A
2. ¿Imaraykun nisunman “Rutqa manan Boazmanqa mana allin piensaywanchu asuykurqan” nispa? (ia 53 párrs. 17, 18).
3. ¿Imaraykun Boaz Rut-ta nirqan “ususíy” nispa? (Rut 2:8; w16.11 3).
4. ¿Imaynatan Boaz rikuchirqan sumaq sonqo kasqanta Rutwan casarakuspa? (w23.03 14). B
Imagen B
Imakunapin yanapawasunman
Rutqa allin llank’aq agradecekuq warmin karqan, ¿imaynatan paypa ejemplon yanapawasunman mana qolqeyoq tarikuqtinchis? C
Imagen C
Noemí sinchi llakisqa kashaqtinmi Rutqa yanaparqan kallpacharqan ima, Noemitaq yanapachikullarqan. ¿Imatan Rutmantapas Noemimantapas yachasunman?
¿Imakunata ruwaspan rikuchiwaq Noemí jina Rut jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Noemitapas Rut-tapas kausarimpuqtinku?
Astawan yachanapaq
¿Imatan Rut libropi yachasunman tukuy tiempo munakuymanta, imaynatan kausayninchispi chayta rikuchisunman?
“Jujkuna-jujkunawan tukuy tiempo munanakushallasun” (w21.11 8-13)
Kay yachachikuyta familiantin estudiaychis, chay tiempopipas kashawaqchis jinata.