16 BARAC, DÉBORA
“Arí, risaqmi”
ISRAEL llaqtapiqa sinchi sasa tiempon kasharqan. ¿Imarayku? Jehová Dios contra jatarisqankurayku. Diosmi paykunaman willarqan mana kasukuqtinku imachus pasanan karqan chayta, chaymi llapa enemigonkunapas, jinallataq Canaán runakunapas paykunata sinchita ñak’arichirqanku. Chay tiempopiqa Jabín sutiyoq runan Canaán llaqtapiqa rey kasharqan, ejercitonta umalliqtaq Sísara karqan, payqa sinchi millaymi karqan. Chay runaqa askha soldadokunatan umallirqan, maqanakunankupaq carretankupas isqon pachajmi karqan, allin armasqallañan karqanku.
Sisaraq ejercitonqa iskay chunka watan israelitakunata ñak’arichirqan. Yaqachus jina chay ejercitoqa mayqen llaqtatapas atipaspaqa chaypi kaq sipaskunata jap’ispa violaqku. Chaymi runakunaqa sinchita paykunata manchakuqku, chaymi wasinkutapas saqepuspa ayqekuqku. Chay tiempoqa Israel runakunapas yaqa llapankun mana armayoq kasharqanku.
Chay tiempopin Israel llaqtapi juj profetisa tiyarqan, paypa sutinmi karqan Débora. Paymanmi llapa runakuna riqku justiciata ruwapunanpaq. Jehová Diospas Deborawanmi Baracman willachirqan imatachus ruwanan karqan chayta, Diosqa llaqtanta salvananpaqmi Baractaqa ajllasharqan. Baracqa maytachá admirakurqan Jehová Dios imatachus piensasharqan chayta yacharuspaqa, chaychá payqa 10.000 qharikunata juñurqan Tabor orqota maqanakuq rinankupaq. Chaypin Jehová Diosqa Sisaraq ejercitonta paykunaman entreganan karqan.
¿Kasukurqanchu Barac juj warmi imachus ruwananta niqtin? ¡Arí, kasukurqanmi! Chaymantapas nirqanmi “qan rillaqtiykin noqapas risaq” nispa. ¿Chaywanchu nisunman “pisi iñiyniyoqchá karqan” nispa? Manan. Apóstol Pablopas allin iñiyniyoq runakunaq kasqan listapin Baracpa sutintaqa qelqarqan (Heb. 11:1, 2, 32). Débora paywan kuska rinanpaq valekuspaqa allin iñiyniyoq kasqantan Baracqa rikuchisharqan. Baracqa repararqanmi Jehová Dios llaqtanta paywan pusarishasqanta, chaymi munasharqan Jehová Diospuni pusarinanta. Chaymi Deboraqa Barac paywan kuska rinanpaq valekuqtin nirqan: “Arí, risaqmi”, nispa. Chay qhepamanmi Deboraqa Baracta nillarqantaq: “Manan chay guerraqa qanpa sutiykipichu atipasqa kanqa, Jehová Diosqa juj warmiq makinmanmi Sisarata entreganqa”, nispa.
Baracqa Jehová Diospa nisqanman jinan ruwayta qallarirqan. Payqa 10.000 mana manchakuq runakunatan juñurqan maqanakuq rinankupaq, paykunatan Baracqa allinta prepararqan, jinaspa Tabor orqoman pusarqan. Chay orqoqa muyu niraymi karqan, yaqa 600 metros jina altotaqmi karqan, chayqa kashan Jezreel llaqtapin. Chay alto orqomantan Deborawan Baracwanqa rikurqanku imaynatachus Sisaraq ejercitonqa askha guerra carretakunantin paykunawan maqanakuq jamusharqanku chayta.
¿Imatan Barac ruwarqan? Yaqapaschá ninman karqan: “Suyasunchis Tabor orqoman seqamuyta qallarinankuta, jinaspa qhatapi kashaqtinku carretankupas mana seqamuyta atiqtin phawaykusun”, nispa. Ichaqa Baracqa yacharqanmi mana paychu chay guerrapi maqanakunanta, aswanpas Jehová Diosmi chaypiqa maqanakunan karqan. Paymi Deborawan willachirqan Barac maqanakuq phawaykunanpaq. ¡Baracqa kasukurqanmi! Chaymi ejercitontin phawaylla chay alto orqomanta pampaman phawaykurqanku Sisaraq soldadonkunawan maqanakuq. Chay soldadokunaqa allin armasqa carretakunantinmi kasharqanku.
Juj juezwan juj profetizawanmi mana manchakuspa juj jatun ejercitota millay umalliqwan churanakurqanku
Guerrapi maqanakuq runakunaq qhawarisqanman jinaqa Baracpas ejercitonpas manan chay guerrata atipanankupaq jinachu kasharqanku; ichaqa Jehová Diosmi paykunata yanaparqan mana manchakuq kasqankumanta. Jehová Diosqa sinchitan parachimurqan jinan Canaán llaqtamanta soldadokunaqa t’uru pampapi rikukurqanku, maqanakunanku carretankupas t’urupin mana puriyta atirqanchu, manan imapaqpas servipurqanchu. Chaymi Sisaraq soldadonkunaqa carretankumanta uraykuspa Israel runakunawan maqanakunanku karqan. Sisaraq soldadonkunaqa manan jujllapas librakurqanchu. Sisarari, ¿imatan ruwashanman karqan?
Sisaraqa phawayllan chay t’uru pampamanta ayqekurqan orqo ladoman. Paymanqa manan imapas qokurqanchu soldadonkunaq vidanqa. Payqa ayqekuspa vidanta salvananpaqpaschá piensarqan, ichaqa Baracmi payta qatipasharqan. Tukuy chay pasasqantaqa rikumusharqanmi Jehová Diosqa. Ichaqa ¿iman pasarqan Sisarata?
Kay textokunata leey
¿Imaniwaqmi?
¿Imakunata ruwaspan Baracpas Deborapas rikuchirqanku mana manchakuq kasqankuta?
Astawan t’aqwiriy
1. ¿Imaynan Israel runakunaq vidan karqan Sisaraq tiemponpi? (w15 1/8 12 párr. 6).
2. Bibliapin willashan Samuel manaraq profeta kashaqtin 12 juezkunamanta, ¿imaraykun Deboraq sutin mana paykunaq sutinwan rijurinchu? (w86 1/6 31 párrs. 6-8).
3. ¿Imaynapin Débora “Israelpa maman jina jatarimurqan”? (Juec. 4:4, 5; 5:7; w15 1/8 13 párr. 1). A
Imagen A
Imagen A
4. ¿Imaraykun Deborawan Baracwan takirqanku “ch’askakunan maqanakurqan Sisarawan” nispa? (Juec. 5:20; w05 15/1 25 párr. 5).
Imakunapin yanapawasunman
Baracqa kasukurqanmi Deboraq nisqanta, ¿imakunapi tarikuspan juj hermano Barac jina humilde kanman? B
Imagen B
¿Imaraykun Débora mana manchakuspa guerraman Baracta compañarqan? ¿Imakunapi tarikuspan noqanchispas Débora jina kasunman?
¿Imakunata ruwaspan rikuchiwaq Barac jina Débora jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Baracpas Deborapas kausarimpuqtinku?
Astawan yachanapaq
Kaypin yachanki imaynas Jehová Diosqa imachus ruwasqanchista anchata valoran chayta.
“Liston kashananchis Jehová Diosta maypipas servinapaq” (w17.04 27-32)
Baracwan Deborawanqa Diospin confiarqanku, k’umuykukuq, kasukuq iman karqanku, ¿imatan chaymanta yachasunman?
“Baracqa allin iñiyniyoq kaspan juj atiyniyoq ejercitota atiparqan” (w03 15/11 28-31)