17 JAEL
“Llapa warmikunamantapas aswan jatunchasqa kachun”
SISARAQA soldadonkunata saqerparispan phawayllan Jezreel wayq’omanta ayqekurqan. Isqon pachajtaq carretankuna karqan chayqa, chaykunawan atipananpaqpaschá Sisaraqa piensaykurqan, ichaqa mana armayoq soldadokunawanmi atipachikurqan. ¡Chayqa mana creenapaq jinan karqan! ¡P’enqaypin qhepakurqan! Payqa mana imata ruwayta atispan pakakuyllapiña piensarqan. Chaymi quenita runaq Heberpa karpanman chayaspa chaypi pakakurqan.
Quenita runakunaqa Israel llaqtatan apoyarqanku. Moisés quenita warmiwan casarakusqanmantapachan paykunaqa allinta apanakurqanku. Chaymantapas quenita runakunaqa Israel llaqtapin tiyarqanku. Hebermi ichaqa wakin quenita runakunamanta jujniray karqan. Payqa manan Israel runakunatachu apoyarqan aswanpas Canaán llaqtamanta rey Jabintan. Sisaraqa rey Jabinpa soldadonkunata umalliqtaq karqan chayqa mana iskayaspan Heberpa karpanman pakakuq jaykurqan. Sisaraqa manachá piensaykullarqanpaschu Heberpa esposan Jael payta wañuchinanpiqa.
Sísara Heberpa karpanman chayaqtinqa, Heberpa esposan Jael-llan chaypi kasharqan. Jaelqa rikurqanmi Sísara karpanman jamushasqanta chaymi usqhaylla piensaykurqan imatachus ruwananpi. Payqa allintan yacharqan Sísara millay runa kasqanta. Ichaqa manan yacharqanchu imatachus Jehová Dios Deborawan willachirqan chaytaqa. Deboraq willasqanman jinaqa Sisarataqa manan juj qharichu wañuchinan karqan aswanpas juj warmin. Jaelqa allintan yacharqan ima ruwanantas Jehová Dios munasharqan chayta. ¿Imaraykun chayta ninchis?
Llapa pasasqan qhepamanmi Jehová Diosqa Deborawan juj takita qelqachirqan imaynatas Barac Sisarata atiparqan chaymanta. Chay takiq juj partenpin nishan: “Llapa warmikunamanta Jael aswan jatunchasqa kachun, quenita runa Heberpa warmin alabasqa kachun. Karpakunapi tiyaq llapa warmikunamantapas aswan jatunchasqa kachun”, nispa. Wakin yachaysapakunaq nisqanman jinaqa Jaelqa rumi sonqo warmis kanman karqan, ichaqa manan chhaynachu karqan, aswanpas payqa mana manchakuq valiente warmin karqan, Diospa guerranpin maqanakurqan. Payqa Rahab jinan Jehová Diosta ajllakurqan, paypa munaynintan ruwarqan. Chaymantapas yacharqanmi Sisaraqa Jehová Diospa enemigon kasqanta wañuchisqa kanantapas, chaymi Jaelqa chay ratu wañuchinan karqan. Ichaqa ¿imaynatan chayta ruwanman karqan?
Jaelqa manan atinmanchu karqan Sisarawan maqanakuytaqa. Sisaraqa guerrapi allinta maqanakuq runan karqan, kallpasapachá karqanpas. Chhaynaqa, ¿imatan Jael ruwarqan? Payqa karpanmanmi Sisarata pusaykurqan samarinanpaq, chaymantataq juj mantawan tapaykurqan, unuta mañakuqtinpas lechetan qoykurqan. Chaymantapas Sisaraqa nirqanmi, wasi punkullapi qhepakunanpaq, pipas paymanta tapuqtintaq “manan pipas jamunchu” nispa ninanpaq. Chaymantataq Sisaraqa secota puñupurqan.
Diosmi juj warmiwan wañuchirqan guerrakunapi maqanakuq millay runata
Jaelqa apuraymi imachus ruwananta ruwanan karqan. Payqa juj martillota juj estacatawanmi oqarirqan, chay herramientakunaqa maderamantachus jina kanman karqan, chaykunataqa sapakutillachá usaqpas. Payqa ch’inllan chay guerrapi maqanakuq runaman qayllaykurqan, jinaspa wañuchirqan. Payqa mana reparachikuq jinallachá chaytaqa ruwarqan, mana jinaqa Sisarachá rijch’aruspa Jaelta wañuchinman karqan. Jaelpa ruwasqanqa allinpunin lloqsirqan. Sisaraqa umanpi estacawan sat’isqan kaq ratun wañupurqan.
Chaymantan Baracqa Sisarata maskhaspa Heberpa karpakusqanman chayarqan, chaypin Jaelqa karpanmanta lloqsimuspa Baracta nirqan: “Jamuy kaypin kashan maskhasqayki runaqa”, nispa. Baractaq karpaman jaykuspa Sisarata rikurqan wañusqata, chhaynapin Deboraq willasqanqa junt’akurqan. Deboran nirqan: “Jehová Diosqa juj warmiq makinmanmi Sisarata entreganqa”, nispa.
Baracwan Deborawan guerrapi atipasqankumanta qelqasqanku takipiqa Jaeltan jatuncharqanku Sisarata wañuchisqanmanta. Bibliapi manaña askha kutitachu Jaelmanta willan chaypas, paypa ejemplonqa allintan kay tiempokunapipas yanapawashanchis. Kay tiempopiqa manapaschá Diosta serviqkunaqa armakunawanchu ni ima herramientawanchu maqanakushanchis. Ichaqa iñiypi qaqata sayananchispaqmi juj guerrapi kashanchis. Chayrayku Jael jina tukuy atisqanchista kallpachakusun mana manchakuq valiente kananchispaq.
Kay textokunata leey
¿Imaniwaqmi?
¿Imakunata ruwaspan Jael rikuchirqan mana manchakuq kasqanta?
Astawan t’aqwiriy
1. ¿Imaynapin tupan Sisaraq guerra ruwasqan Armagedón guerrawan? (w19.09 8, 9 párrs. 3-6).
2. Jaelpa qosan Heberqa Canaán runakunatan apoyarqan Israel runakunawan familiantin jinaña karqanku chaypas. Ichaqa ¿imaynapitaq familiantin jinari kankuman karqan? (it “Heber” núm. 2).
3. Israel llaqta rey Jabinta Sisaratawan atipasqankuqa unay watakuna qhepamanpas kallpacharqanmi Diospa llaqtantaqa, ¿imaynatan kallpachanman karqan? (w08 1/10 18, 19 párrs. 12-15).
4. ¿Imatan reparanchis Débora Jaelta jatunchasqanmanta, imatan noqanchispas chaymanta yachasunman? (w15 1/8 15 párr. 2). A
Imagen A
Imagen A
Imakunapin yanapawasunman
¿Imakunapi tarikuspan mana testigo qosayoq hermana Jael jina kallpata necesitanman?
Jaelqa manan Débora jinachu profetiza karqan nitaqmi Barac jinapaschu soldado karqan, chaywanpas Jaelqa tukuy atisqantan Jehová Diospa munayninta ruwarqan. ¿Imatan yachachiwanchis Jaelpa ejemplon imatapas mana atinanchispaq jina qhawariqtinchis? B
Imagen B
¿Imakunata ruwaspan rikuchiwaq Jael jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Jael kausarimpuqtin?
Astawan yachanapaq
Kay video qhawasqaykipi reparay imaynatas Jaelpa ejemplon juj sipas hermanata yanapanqa Diospi iñisqanta defiendenanpaq chayta.
Valiente kasun, ama manchapakusunchu: Jael jina kasun, ama Meroz llaqta runakuna jinachu (1:40)
Kay qelqapin astawanraq yachanki Jael jina askha warmikunamanta.
“¿Imatan yachasunman Bibliaq willasqan wakin warmikunamanta?” (ijwbq yachachikuy 161)