2 Samuel
23 Davidca cai último shimicunatami nirca:
“Ñucaca Jesé runapa churi Davidmi cani.
Ñucaca jatunbi churai tucushca runami cani.
Ñucaca Jacobpa Taita Dios agllashca runami cani.
Israel llactapa juyailla canciongunata candajmi cani. Caitami ñucaca nini.
2 Jehová Diospa espíritu santomi* parlachun ayudahuarca.
Ñucaca Taita Dios ñuca jallupi churashca shimicunatami parlarcani.
3 Israel llactapa Taita Diosmi parlarca.
Israel llactapa Jatun Rumishna caj Taita Diosca cashnami nihuarca:
‘Gentecunata gobernajuj persona alita ruraj* persona cashpa y
Taita Diosta manllashpa* gobernashpaca
4 tutamandata indi brillajuj michagushnami canga.
Fuyu illa tutamandashnami canga.
Jihuata viñachij tamia urmashca jipa
indi llujshishpa brillanshnami canga’ nihuarcami.
5 Ñuca familiami Taita Diospa ñaupapica shina ricurin.
Taita Diosca ñucahuanga unai unaicaman shuj tratotami* rurashca.
Paica pai imata ruranatami explicarca y chaica pactaringapachami.
Chai tratomi ñucataca tucuipi cushichihuanga y salvahuanga.
Chai tratomandami Taita Diosca ñuca familiataca mirachinga.
6 Pero nali gentecunaca maquihuan na japi ushanalla
casha yurashnami shitai tucun.
7 Pipash casha yurata japingapaca
fierro herramientata y shuj lanzapa caspitami charina can.
Chai casha yurataca maipi cashca pushtupillatami ninahuan tucuillata rupachina can” nircami.
8 Davidca alipacha shinlli quimsa soldadocunatami charirca. Paicunapuramandaca Joseb-Basébet shuti tahkemonita runami líder carca. Paica shuj viajeca 800 soldadocunatami paipa lanzahuan huañuchishpa saquirca. 9 Paipa jipaca Eleazarmi carca. Eleazarca Dodó shuti runapa churimi carca. Y Dodó runaca Ahohí runapa churimi carca. Shuj viajeca filisteocunaca Israel llactahuan macanajungapami tandanajushcarca. Chaipimi Davidpash y paipa quimsa alipacha shinlli soldadocunapash filisteocunataca macanajushunchi ninajurca. Paicunapuramandaca Eleazarpashmi carca. Pero chai viajeca israelita soldadocuna chaimanda rijpipash 10 Eleazarca chaipimi quidarca. Paica rigra shaijungacamanmi filisteocunataca huañuchirca. Paipa maquipash espadata na cacharimandami tiesoyashca quidarca. Soldadocunaca huañushcacunapa valishca cosascunata japingapami Eleazarpa huashata catinajurca. Chai punllaca Jehová Diosmi paicunataca salvarca.
11 Eleazarpa jipaca Samá runami carca. Paica Agué shuti hararita runapa churimi carca. Lehí pushtupi lentejasta tarpushca pambapi filisteocuna tandanajujpimi israelita soldadocunaca filisteocunamandaca pacajushpa calparca. 12 Pero Samá runaca pamba chaupipimi quidarca. Paica pambata ama dueñoyachunmi filisteocunata huañuchishpa saquirca. Shinami Jehová Diosca Israel llactataca salvarca.
13 Soldadocunata mandaj 30puracunamadaca quimsami Adulam llactapi tiaj cuevapi Davidta ricungapaj rirca. Chaica cosecha tiempopimi carca. Filisteo soldadocunapa shuj grupoca Refaím pambacunapimi* carpacunata shayachishcarca. 14 Davidca pai pacajujushca pushtupimi carca. Y Belén llactapica filisteo soldadocunami carpacunata shayachishcarca. 15 Davidca cashnami nirca: “Belén llacta pungu ladopi tiashca pozomanda yacuta ufiai ushashpaca cushillami sintiriman” nircami. 16 Shina nijpimi quimsandi alipacha shinlli soldadocunaca a la fuerza filisteocunapa shayachishca carpacunaman yaicurca. Paicunaca Belén llacta pungu ladopi tiashca pozomandami yacuta llujchirca. Shinami paicunaca yacutaca Davidman aparca. Pero Davidca na ufiangapaj munashpami chai yacutaca Jehová Diospa ñaupapi talirca. 17 Chai jipami Davidca cashna nirca: “Soldadocuna paicunapa causaita peligropi churashpa cai yacuta apamushcataca na ufianachu cani. Porque ufiashpaca paicunapa yahuarta ufianshnami canman. Jehová Dioslla chaitaca nunca na ruraimanllu” nircami. Shina nishpami Davidca chai yacutaca na ufiangapaj munarca. Chai cosascunatami Davidpa quimsa alipacha shinlli soldadocunaca rurarca.
18 Shinallata shuj quimsa alipacha shinlli soldadocunapashmi tiarca. Paicunaca shuj segundo grupomi carca. Chai soldadocunapurapica Abisaimi líder carca. Abisaica Zeruyá huarmipa churi y Joab runapa huauquimi carca. Abisaica paipa lanzahuanmi 300 soldadocunata huañuchirca. Paica chaishuj quimsa alipacha shinlli soldadocunashnallatami rijsishca carca. 19 Chai segundo grupo soldadocunapuramandaca Abisaimi ashtahuan rijsishca carca. Y paimi mandaj carca. Pero primer quimsa alipacha shinlli soldadocunahuanga na igualarcachu.
20 Jehoiadá runapa churi Benayaca na manllaj runami carca.* Paica Cabzeel llactapica ashtaca jatun ruraicunatami rurarca. Benayaca Moab llactamanda Ariel shuti runapa ishcai churicunatami huañuchirca. Shinallata razu urmajuj punllapimi shuj utujuman yaicurca y chaipica shuj leondami huañuchirca. 21 Shinallata Benayaca shuj jatun jatun egipcio runatapashmi huañuchirca. Egipcio runaca shuj lanzatami maquipi charijurca. Pero Benayaca solo shuj caspitallami charijurca. Shinapashmi chai egipcio runahuan macanajushpaca chai lanzata quichushpa chai lanzahuanllata egipcio runataca huañuchirca. 22 Chai tucui cosascunatami Jehoiadá runapa churi Benayaca rurarca. Paica primer quimsa alipacha shinlli soldadocunashnallatami rijsishca carca. 23 Benayaca 30 soldadopuracunamandaca paimi ashtahuan rijsishca carca. Shinapash paica primer quimsa alipacha shinlli soldadocunahuanga na igualarcachu. Shinapash Davidca paitaca paipa soldadocunata mandachunmi churarca.
24 Joab runapa churi Asaelca 30 soldadopuracunapimi carca. Shinallata chai soldadopuracunapica Belén llactamanda Dodó runapa churi Elhaná runapash, 25 Samá shuti harodita runapash, Elicá shuti harodita runapash, 26 Hélez shuti paltita runapash, Iqués shuti tecoíta runapa churi Irá shuti runapash, 27 Abí-Ézer shuti anatotita runapash, Mebunái shuti husatita runapash, 28 Zalmón shuti ahohíta runapash, Maharái shuti netofatita runapash, 29 Baaná shuti netofatita runapa churi Héleb runapash, Benjamín jatun familiapa Guibeá llactamanda Ribái shuti runapa churi Ittái runapash, 30 Benaya shuti piratonita runapash, Gaas huaicucunamanda* Hidái shuti runapash, 31 Abí-Albón shuti arbatita runapash, Azmávet shuti bar-humita runapash, 32 Eliahbá shuti saalbonita runapash, Jasén runapa churicunapash, Jonatán runapash, 33 Samá shuti haratita runapash, Sarar shuti hararita runapa churi Ahiam runapash, 34 Ahasbái shuti maacatita runapa churi Elifélet runapash, Ahitofel shuti guilonita runapa churi Eliam runapash, 35 Hezró shuti carmelita runapash, Paarái shuti arbita runapash, 36 Zobá llactamanda Natán shuti runapa churi Igal runapash, Baní shuti gadita runapash, 37 Zélec shuti ammonita runapash, Naharái shuti beerotita runapashmi carca. Naharái runaca Zeruya huarmipa churi Joabpa macanajungapaj cosascunata apashpa ayudaj runami carca. 38 Shinallata Irá shuti itrita runapash, Gareb shuti itrita runapash 39 y Urías shuti hitita runapashmi carca. Totalca 37 soldadocunami carca.