Cunan punllapi gentecuna nalicunata rurashpa causajta ricushpaca Lot runagushnami sintiripanchi. Lot runaguca gentecuna nalita rurachun Jehová Dios na munashcataca alimi yacharca. Chaimandami Lotca gentecuna “nimata na pinganayachijta ricushpami ninanda pinarishca carca” (2 Ped. 2:​7, 8). Lot runaguca Jehová Diosta juyaimanda, respetaimandami paipa ladolla causaj gentecuna pinganai, nali cosascunata rurajta ricushpaca nimamanda na ricunayachin carian. Cunan punllacunapipashmi Jehová Diospa mandashcacunata na cazuj, nalicunata rurashpa causaj gentecunapa chaupipi causapanchi. Chashna gentecunapa chaupipi causashpapash Jehová Diosta manllashpaca pai munashcashnami tucuipi ali, limpio causaiguta charipashun. Limpio causaiguta chari ushachunga Jehová Diosca Proverbios libropi consejocunata cushpami ayudan. Tucui cristianocunallatami Proverbios libropi tiashca consejocunamandaca ninanda beneficiarita ushapanchi. Jehovata manllajcunaca nalita ruraj amigocunata ama charingapami cuidarin. w23.06 pág. 20 párrs. 1-2; pág. 21 párr. 5

Quiquinga talvezpashmi familiacunapa jarcaicunata chimbapurapariangui. O na cashpaca Jehovapa gobiernota primero churangapami quiquinba charishca cosascunata saquipariangui (Mat. 6:33). Shinaca Jehová Diosta sirvingapaj cai tucui cosascunata saquishcata pai ali yachajtaca seguromi caita ushapangui (Heb. 6:10). Shinallata Jesuspa nishcacuna cierto cashcatapashmi cuenda japipariangui. Jesusca “ñucata catimanda y ali villaicunata chasquimanda pipash paipa huasita, huauquicunata, panicunata, taitata, mamata, huahuacunata y alpacunatapash saquijca, llaquicunata charishpapashmi, cai tiempopillata 100 viaje yalita huasicunata, huauquicunata, panicunata, mamacunata, huahuacunata y alpacunatapash chasquinga. Shamuj punllacunapicarin para siempre causaitapashmi ushanga” nircami (Mar. 10:​29, 30). Jehovata sirvingapaj saquishca cosascunata yalimi Jehová Diosca ashtacata bendiciashca (Sal. 37:4). w24.03 pág. 9 párr. 5

Judea llactamanda huauquipanicunapaca yarjai tiempomi chayamurca. Antioquía llactamanda huauquipanicunaca “Judea llactapi causajuj huauquipanicunaman” imagutapash cachashpa ayudanatami decidirca (Hech. 11:​27-30). Judea llactamanda huauquipanicuna caru carupi causanajujpipash Antioquía llactamanda huauquipanicunaca paicunata ayudangapaj decididosmi carca (1 Juan 3:​17, 18). Huauquipanicuna shuj llaquita charijujta yachaj chayashpaca paicunata llaquishcata ricuchingapami listo cana capanchi. Ancianocunata ayudashpa, contribución culquiguta carashpa o llaqui apashca huauquipanicunamanda mañashpapashmi paicunataca ayudaita ushapanchi. Huauquipanicunaca minishtirishca cosasgucunata charingapaca talvezpashmi ñucanchipa ayudata minishtinga. Jesús gentecunata juzgangapaj shamujpica ñucanchicunaca shujcunata llaquishpa tratanajushcata ricuchingapami munapanchi. Ñucanchicuna alita ruranajushcata japij shamushpaca Jesusca: ‘Taita Diospa Gobierno carana bendiciongunata chasquichi’ ningami (Mat. 25:​34-40). w23.07 pág. 4 párrs. 9-10; pág. 6 párr. 12