2 Samuel
11 Huata callarijujpica* reycunaca macanajungapami llujshin carca. Chaimi Davidca Joabta, paipa sirvientecunata y Israel llactapa tucuilla soldadocunataca ammonitacunata tucuchishpa saquichun cacharca. Shinami paicunaca Rabá llactata atacangapaj muyundipi shayarirca. Pero chai viajeca Davidca Jerusalenbimi quidarca.
2 Shuj viajeca tutapimi Davidca camamanda jatarishpa palacio huasi terrazapi puri callarirca. Chai terrazamandami Davidca shuj huarmi armajujta ricurca. Chai huarmica juyaillagumi carca. 3 Davidca chai huarmi pi cashcata yachangapami averiguachun cacharca. Chaimi Davidmanga cashna nirca: “Paica Bat-Seba shuti huarmimi can. Paica Eliam shuti runapa ushi y Urías shuti hitita runapa huarmimi can” nishpami villarca. 4 Davidca chai huarmita apamuchunmi mensajerocunata cacharca. Shinami chai huarmica David cashca pushtuman yaicurca. Chaimi Davidca chai huarmihuan puñurca.* Chai jipami chai huarmica paipa huasiman tigrarca. (Chaica Leypi mandashcashna chai huarmi limpiarijuj tiempopimi pasarca).*
5 Chai huarmica vijsayumi quidarca. Chaimi Davidmanga “vijsayumi cani” nishpa villachun cacharca. 6 Shina villajpimi Davidca Joabmanga “Urías shuti hitita runata ñucapaman cachamui” nichun cacharca. Chaimi Joabca Uriastaca Davidpaman cacharca. 7 Urías chayajpimi Davidca Joabpash, soldadocunapash imanallata can nishpa tapurca. Shinallata guerrapica gananajunguichichu nishpapashmi tapurca. 8 Chai jipami Davidca Uriastaca “canba huasiman samangapaj* rilla” nirca. Urías reypa huasimanda llujshishca jipami reypa regalota* Uriasman cuchun cacharca. 9 Pero Uriasca paipa huasimanga na rircachu. Paica reypa palacio huasi entradapimi reypa chaishuj sirvientecunahuan puñushpa quidarca. 10 Chaimi Davidmanga “Uriasca na huasimanga rircachu” nishpa villarca. Shina villajpimi Davidca Uriastaca cashna tapurca: “Canga carumandami shamushcangui ¿imashpata huasimanga na rircangui?” nishpami tapurca. 11 Chaimi Uriasca Davidtaca cashna nirca: “Taita Diospa Arcapash, Israelmanda y Judamanda soldadocunapash carpacunapillami quidanajun. Ñuca amo Joabpash y paipa sirvientecunapashmi pambapi, carpacunapilla quidanajun. Maitashi ñucaca huasiman micungapaj, ufiangapaj, ñuca huarmihuan puñungapaj rishayari. Quiquin causajushcamandami jurapani, ñucaca chaitaca na rurapashachu” nircami.
12 Shina nijpimi Davidca Uriastaca cashna nirca: “Cunan punllapash caipi quidailla. Cayaca richun saquishallami” nirca. Chaimi Uriasca chai punllapash y cayandi punllapash Jerusalenbi quidarca. 13 Chai jipami Davidca micungapaj y ufiangapaj Uriasta cayachun cacharca. Chaipimi Davidca Uriastaca machachirca. Shinapash tutayajpica Uriasca paipa huasimanga na rircachu. Chaipa randica reypa sirvientecunahuanmi puñushpa quidarca. 14 Cayandi punllapaca Davidca Joabman shuj cartata escribishpami Urías apachun cacharca. 15 Davidca cartapica cashnami escribirca: “Uriastaca macanajungapaj primera filapi, maipimi macanajui ashtahuan shinlli can pushtupi churanguichi. Chai jipaca paita atacachun y huañuchichunmi paitalla saquishpa anchuringuichi” nishpami escribirca.
16 Joabca llactataca ali alimi ricujurca. Chaimandami maipi alipacha shinlli ammonita soldadocuna tiajta yacharca. Chaimanmi Uriastaca cacharca. 17 Chai llactamanda ammonita soldadocunaca Joabhuan macanajungapami llujshirca. Chaipica Davidpa huaquin soldadocuna y Urías shuti hitita runapashmi huañurca. 18 Joabca macanajuipi ima pasashcatami Davidman tucuita villachun cacharca. 19 Joabca mensajerotaca cashnami nirca: “Macanajuipi ima pasashcata reyman villashca jipaca 20 talvez reyca culirashpami candaca cashna ninga: ‘¿Imashpata macanajungapaca llactaman yapata quimirircanguichiyari? Pirca jahuamanda paicuna flechacunata disparanataca ¿nachu cuenta japircanguichi? 21 Jerubéset runapa churi Abimelectaca ¿pita huañuchirca? Paitaca Tebez llactapimi shuj huarmi pirca jahuamanda molino rumita* shitashpa huañuchirca. Shinaca ¿imashpata pircaman yapata quimirircanguichiyari?’ ningami. Shina nijpica ‘quiquinba sirvij Urías hitita runapashmi huañurca’ ningui” nircami.
22 Shina nijpimi chai mensajeroca Davidpaman rishpa Joab tucui ima nishcata nirca. 23 Chai jipami chai mensajeroca Davidtaca cashna nirca: “Ammonita soldadocunaca ñucanchita yali shinllicunami carca. Shinapash paicuna ñucanchihuan pambapi macanajungapaj llujshijpica paicunataca llacta pungu entradacamanmi tigrachircanchi. 24 Ñuca reylla, flechacunata disparajcuna quiquinba soldadocunata pirca jahuamanda flechacunata disparanajujpimi quiquinba huaquin soldadocunaca huañurca. Quiquinba sirvij Urías hitita runapashmi huañurca” nircami. 25 Chaita uyashpami Davidca chai mensajerotaca cashna nirca: “Joabtaca cashna ningui: ‘Shina pasashcamandaca ama pinarijunguichu. Porque macanajuipica pipash huañuita ushanmi. Shinaca tucui fuerzahuan chai llactata mishangacaman atacaichi’ ningui. Y canbash Joabtaca animangui” nircami.
26 Uriaspa huarmica paipa cusa huañushcata yachashpaca llaqui llaquimi tucurca. 27 Llaqui punllacuna* yalishca jipami Davidca chai huarmita paipa huasiman apamuchun cacharca. Paihuan cazarashpami paihuanga shuj huahuaguta charirca. Pero David imata rurashcataca Jehová Diosca nimamanda nalicachircachu.*