2 Corintios

3 ¿Ñucanchica cutinllu quiquingunaman presentarina capanchi? ¿Ñucanchipashchu shujcunashna ñucanchimanda alicunata parlaj cartacunata quiquingunaman ricuchina canchi? ¿O quiquinguna ñucanchimanda alicunata parlashpa cartacunata escribichunllu minishtinchi? Na, chaitaca na minishtipanchichu. 2 Porque quiquingunaca, ñucanchi shungupi escribishca, mundo enteropi rijsishca y liishca cartacunashnami capanguichi. 3 Ñucanchica Taita Diospa sirvijcunami capanchi. Y quiquingunaca ñucanchi escribishca Cristopa cartashnami capanguichi. Cai cartaca tintahuanlla escribishca cartaca na canllu. Sino causajuj Taita Diospa espirituhuan escribishcami can. Shinallata tabla rumicunapi escribishcashnapash na canllu. Sino shungupi escribishcami can.

4 Ñucanchica Cristomandami Taita Diospica chashna confiapanchi. 5 Taita Diospa obrataca ñucanchipa ushaihuanlla rurashcataca na ninajupanchichu. Sino Taita Diosmi cai obrata rurachunga ñucanchita ayudajun. 6 Taita Diosmi ñucanchitaca shuj mushuj tratopi* sirvichun ayudajun. Pero ñucanchica escribishca Leyta catishpaca na sirvinajupanchichu, sino Taita Diospa espíritu santo ayudajpimi sirvinajupanchi. Escribishca Leyca huañuimanmi apan. Pero Taita Diospa espirituca causaitami cun.

7 Huañuiman apaj Leyca, rumicunapi escribishcami carca. Chai Leyca punchapambami chayamurca. Chaimi israelitacunaca, Moisespa ñavi punchapamba cajpi Moisesta ricuitaca na ushanajurca. Pero punchapambata brillanaca tucurinami carca. 8 Shinaca ¿nachu Taita Dios paipa espíritu santota carashcaca ashtahuan mejor cana can? 9 Huañuiman apaj Ley alipacha cajpica ¿nachu gentecuna sin culpa justocuna ricurichun ayudaj obraca ashtahuan alipacha mejor can? 10 Ashtahuangarin alipacha Leyta, punchapamba brillajuj mushuj tratohuan comparashpa ricujpica mushuj tratomi ashtahuan yalita brillajun. 11 Shinaca, tucurina Ley punchapamba cajpicarin, na tucurina mushuj tratocarin ashtahuan punchapambami cana can.

12 Chaipi confianzata charimandami, ñucanchica na manllashpa parlapanchi. 13 Ñucanchica Moisés runagushnaca na rurapanchichu. Moisesca tucurinalla punchapamba brillota israelitacuna ama ricuchunmi, paipa ñavitaca shuj telahuan taparirca.* 14 Pero israelitacunaca na intindita usharcachu. Y cunan punllacamanmi, israelitacunapa yuyaica shuj telahuan tapashcashna can. Chaimi punda tratota liijpica na intindita ushan. Chai telataca Cristopi crishcamandallami anchuchitaca usharin. 15 Shinallata cunan punllacamanmi paicunapa shungupica shuj telahuan tapashcashna can. Chaimandami Moisespa escribishcacunataca na intindita ushan. 16 Pero Jehová* Diospa ñanman tigrajpica, chai telaca anchurinmi. 17 Jehová* Diosca shuj Espiritumi* can. Jehová* Diospa espíritu santota charijcunaca libremi can. 18 Ñucanchica ñavimanda telata anchuchishpami, Jehová* Dios punchapamba cajtaca espejocunashna ricuchinajupanchi. Taita Diosman parecido cangapami cambiocunata rurapanchi. Shinami pai punchapamba cajtaca ashtahuan ashtahuan ricuchinajupanchi. Jehová* Diosca shuj Espiritumi can. Ñucanchica pai munashcashnami cambiocunata ruranajupanchi.