2 Samuel
24 Davidtaca picharimi “Israelpi y Judapi shuj censota ruragri” nishpa atichirca. Chaimandami Jehová Diosca israelitacunahuan cutin culirarca. 2 Soldadocunata mandaj Joab runaca rey Davidhuanmi carca. Chaimi rey Davidca paitaca cashna nirca: “Danmandapacha Beer-Sebacaman rishpa tucuilla israelita jatun familiacunapaman ri. Mashna gentecuna tiajta ñuca yachangapaj tucuilla gentecunata registrangui” nircami. 3 Shinapash Joabca rey Davidtaca cashnami nirca: “Ñuca amolla, ñuca reylla ¿imashpata shinataca rurangapaj munapanguiyari? Ñuca amolla, ñuca reylla quiquinba Jehová Diosca gentecunata ashtaca viajecunata mirachipachun. Chaitaca quiquinba ñavihuanbacha ricupachun” nircami.
4 Shina nijpipashmi rey Davidca Joabta y soldadocunata mandajcunatapash na uyarcachu. Chaimandami Joabpash y soldadocunata mandajcunapash rey Davidpa ñaupamanda llujshishpa Israel llactamanda gentecunata registrangapaj rirca. 5 Paicunaca Río Jordanda chimbashpami Aroer llactapi carpacunata shayachirca. Paicunaca pambacuna* chaupipi tiaj llactapa sur ladopimi carpacunataca shayachirca. Jipaca gadita gentecunapa alpacunaman y Jazer llactamanmi rirca. 6 Chai jipaca Galaad alpacunaman y Tahtim-Hodsí alpacunamanmi rirca. Chai jipaca Dan-Jaán pushtumanmi rirca. Y chaimandaca Sidón llactamanmi rirca. 7 Shinallata jatun pircacunahuan muyundi pircashca Tiro llactacamanmi rirca. Shinallata heveo gentecunapa y cananeo gentecunapa tucuilla llactacunamanbashmi rirca. Y por ultimoca paicunaca Beer-Seba llactamanmi chayarca. Chaica Judapi tiaj Négueb pushtupimi carca. 8 Paicunaca tucuilla alpacunaman rishca jipami Jerusalenmanga 9 quillacunapi y 20 punllacunapi tigramurca. 9 Joabca rey Davidmanga mashnacuna registrado cashcatami villarca. Israelpica espadahuan macanajunata yachaj 800 mil soldadocunami tiarca. Y Judapica 500 mil soldadocunami tiarca.
10 Pero gentecunata contashca jipami Davidca shungu ucupica* nali sintirijurca. Chaimi Jehová Diostaca cashna nirca: “Jehová Dioslla, caita rurashpaca shuj jatun pecadotami rurashcani. Ñucaca tontoshnami portarishcani. Ñuca shina pandarishcamanda por favor perdonahuai” nircami. 11 David tutamandata jatarijpimi profeta Gadca Jehová Diospa mensajeta* chasquirca. Gadca Taita Diospa mensajeta muscuipishna chasquishpa Davidman villaj runami carca. Taita Diosca Gadmanga cashnami nirca: 12 “Davidpaman rishpa cashna ni: ‘Jehová Diosca cashnami nin: “Cai quimsa cosascunamanda canda imata rurachun munashcata agllai” ninmi’ nigri” nircami. 13 Chaimi Gadca Davidpa ñaupapi presentarishpa cashna nirca: “¿Imatata munangui? ¿Llactapi 7 huatacunata yarjai tiachunllu munangui? ¿O canba enemigocuna catiriajpi quimsa quillacunata pacajushpa causanatachu munangui? ¿O na cashpaca llactapi quimsa punllacunata shuj millai ungui tiachunllu munangui? Cunanga aliguta pensarishpa ñucata cachamujman imata contestanata nihuai” nircami. 14 Davidca Gadmanga cashnami nirca: “Llaquillapachami cani. Jehová Diosca ninan llaquij Diosmi can. Chaimandami pai ñucanchita castigachunrapash munani. Pero shuj personapa maquipica na urmangapaj munanichu” nircami.
15 Chai jipami Jehová Diosca Israel llactamanga shuj millai unguita cachamurca. Chai unguica tutamandata callarishpa Taita Dios señalashca tiempocamanmi pararca. Chaimandami Dan llactamanda callarishpa Beer-Seba llactacaman 70 mil gentecuna huañurca. 16 Jerusalenda tucuchingapaj ángel maquita chutajpimi Jehová Diosca chai millai unguita cachamushcamanda llaquilla sintirirca. Chaimi llactata tucuchijuj angeltaca “chaicamanlla, canba maquihuanga ama llaquichishpa catijuichu” nircami. Chai ratoca Jehová Diospa angelca Arauna shuti jebuseo runapa trillana pamba ladopimi cashcarca.
17 Chai ángel gentecunata huañuchijujta ricushpami Davidca Jehová Diostaca cashna nirca: “Cai gentecunaca* ¿imatata rurashcayari? Ñucami pecadota rurarcani. Ñucami pandarircani. Por favor ñuca taitapa familiata y ñucata castigahuai” nircami.
18 Chaimi chai punllaca Gadca Davidta ricungapaj rishpa paitaca cashna nirca: “Vichai rishpa Arauna shuti jebuseo runapa trillana pambapi Jehová Diosman shuj altarta ruragri” nircami. 19 Chaimi Davidca Gad nishcashna y Jehová Dios mandashcashna vichai rirca. 20 Arauna runa urai ricushpaca rey David paipa sirvientecunandi shamunajujtami ricurca. Chaimi paica enseguida llujshishpa rey Davidpa ñaupapi cungurishpa alpacaman cumurirca. 21 Arauna runaca reytaca cashnami tapurca: “Ñuca amolla, ñuca reylla quiquinba sirvijmi capani. ¿Imashpata ñucata ricungapaj shamupashcangui?” nishpami tapurca. Chaimi Davidca cashna nirca: “Canba trillana pambata randishpa Jehová Diosman shuj altarta rurangapami shamurcani. Shina rurajpillami israelitacunata huañuchijuj unguica shayaringa” nircami. 22 Chaimi Arauna runaca Davidtaca cashna nirca: “Ñuca reylla, ñuca amolla alpataca gratis japipailla. Y quiquin munashcata* Taita Diosman chaipi carapailla. Taita Diosman rupachina ofrendata* carangapaca caipimi torocunaca tian. Y yamdapaca trillana tablacunapash y yugocunapashmi tian. 23 Ñuca reylla, cai tucuitami quiquinman cupani” nircami. Shinallata Arauna runaca “quiquinba Jehová Dios quiquinda bendiciachun” nircapashmi.
24 Pero rey Davidca Arauna runataca cashnami nirca: “Na, alpamandaca paganapachami cani. Maitashi nimatapash na gashtashpa ñuca Jehová Diosmanga rupachina ofrendacunata carashayari” nircami. Shina nishpami Davidca trillana pambata y torocunataca 50 siclos de platapa* randirca. 25 Chaipimi Davidca Jehová Diosmanga shuj altarta rurashpa rupachina ofrendacunata y paihuan amigo cashpa catingapaj ofrendacunata* cararca. Shinami Jehová Diosca israelitacunamanda David rogashpa mañajushcataca uyarca. Chaimandami Taita Diosca israelitacunataca chai millai unguihuanga ñana huañuchishpa catirca.