2 Samuel
2 Chai jipami Davidca Jehová Diostaca “¿Judapi tiashca maijan llactamanbash rinachu cani?” nishpami tapurca. Shina tapujpimi Jehová Diosca “ari, rilla” nirca. Chaimi Davidca “¿maimanda risha?” nishpa tapurca. Shina tapujpimi Taita Diosca “Hebrón llactaman ri” nirca. 2 Shina nijpimi Davidca paipa ishcai huarmicunandi* rirca. Shujca Jezreel llactamanda Ahinoam shuti huarmi, cutin chaishujca Abigaíl shuti huarmimi carca. Abigailca huañushca Nabal shuti carmelita runapa huarmimi cashcarca. 3 Shinallata Davidca paihuan cashca soldadocunata y paicunapa familiacunatapashmi pushashpa rirca. Paicunaca Hebrón llactapa ladolla llactacunapimi causangapaj quidarca. 4 Chai jipami Judá jatun familiapa huaquin jaricuna shamushpa Davidtaca Judá jatun familiapa rey cachun paipa uma jahuapi aceiteta talirca.*
Chai jipami chai jaricunaca Davidtaca cashna nirca: “Jabés-Galaad llactamanda gentecunami Saultaca pambarca” nircami. 5 Shina nijpimi Davidca Jabés-Galaad llactamanda gentecunaman cashna nichun mensajerocunata cacharca: “Cangunapa rey Saulta enterrashpami paitaca ninanda juyashcata* ricuchishcanguichi. Jehová Dios cangunata bendiciapachun. 6 Shinallata Jehová Dios quiquingunata ninanda juyashcata* siempre ricuchipachun. Ñucapashmi canguna imata rurashcamanda cangunataca juyaihuan tratasha. 7 Cangunapa rey Saulca huañushcami. Shinapash cunanga na manllashpami shinlli tucuna canguichi. Judá jatun familiami ñucataca paicunapa rey cachun agllahuashca” nircami.
8 Saulpa soldadocunata mandaj Abner runaca Saulpa churi Is-Bosettaca Mahanaim llactamanmi pushashpa rirca. Abnerca Ner shuti runapa churimi carca. 9 Abnerca Is-Bosettaca Galaadpi y Jezreel llactapi rey cachun, Efraín y Benjamín jatun familiacunapa rey cachun, shinallata asurita gentecunapa y tucuilla Israel llactapa rey cachunbashmi churashcarca. 10 Saulpa churi Is-Bosetca 40 huatacunata charishpami Israel llactapa rey tucurca. Paica ishcai huatacunatami rey carca. Shinapash Judá jatun familiaca Davidtami apoyarca. 11 Davidca 7 huatacunata y 6 quillacunatami Hebrón llactapi Judá jatun familiataca mandajurca.
12 Tiempo jipaca Ner shuti runapa churi Abnerca, Saulpa churi Is-Bóset runapa soldadocunandimi Mahanaim llactamanda Gabaón llactaman rirca. 13 Cutin Zeruyá huarmipa churi Joabpashmi Davidpa soldadocunandi Gabaón llactapi tiashca pozoman rirca. Chaipimi paicunahuan tuparirca. Pozopa shuj ladomanga Abner y paihuan cashca soldadocunami tiarirca. Cutin pozo chaishuj ladomanga Joab y paihuan cashca soldadocunami tiarirca. 14 Chai jipami Abnerca Joabtaca “soldadocuna ñucanchi ñaupapi macanajungapaj* shayarichun” nirca. Shina nijpimi Joabca “ari, macanajungapaj shayarichun” nirca. 15 Chaimi soldadocunaca jatarishpa paicunapa ñaupapi shayarirca. Paicunata cuentajpica Is-Bosetpa grupomandaca 12 benjaminita soldadocunami carca. Davidpa soldadocunapashmi 12 carca. 16 Paicunaca paicunapura macanajushpami* paicunapura espadata pecho ladopi clavarishpa tucuillacuna huañurca. Shina pasashcamandami Gabaón llactapi tiashca chai pushtutaca Helcat-Hazurim* nishpa shutichirca.
17 Chai punllaca paicunaca manllanaitami macanajui callarirca. Y Davidpa soldadocunami Abnerta y Israel llactapa soldadocunataca vincirca. 18 Chaipica Zeruyá huarmipa quimsa churicunapashmi carca. Paicunaca Joab, Abisái y Asahelmi carca. Asahel runaca shuj venado* pambapi ninanda calpanshnallatami paipash calpaita ushan carca. 19 Asahelca Abnertaca catiriami calpashpa rijurca. Paica lluqui ladomanbash y ali ladomanbash na rishpami directo catijurca. 20 Abner tigrai ricushpaca “Asahel ¿canllu cangui?” nishpami tapurca. Chaimi Asahelca “ari ñucami cani” nirca. 21 Chaimi Abnerca Asaheltaca cashna nirca: “Ali ladoman o lluqui ladoman rishpa, maijanbash soldadota japishpa paita quichushcacunahuan quidai” nircami. Shina nijpipashmi Asahelca catishpa rijurcalla. 22 Chaimi Abnerca Asaheltaca cutinllata cashna nirca: “Ama catihuajuichu. ¿Huañuchichunllu munangui imatayari? Canda huañuchishpaca ¿ima ñavihuanda canba huauqui Joabtaca ricushayari?” nircami. 23 Shinapash Asahelca catijurcallami. Chaimi Abnerca paipa lanza cabohuan Asaheltaca vijsapi clavarca. Chai lanzataca huashaman yalijtami clavarca. Shinami Asahelca chaipillata urmashpa huañurca. Asahel huañushpa urmashca pushtuta tucui yalijcunami chaipi asha ratota shayarin carca.
24 Chaimi Joabpash, Abisaipash Abnertaca cati callarirca. Ña indi huashajujujpimi paicunaca Amá shuti lomaman chayarca. Chai lomaca Guíah shuti pushtupa frente ladopimi carca. Chaica Gabaón llactapa desiertoman* rina ñanbimi carca. 25 Benjaminita soldadocunaca Abnerpa muyundipimi tandanajurca. Chai soldadocunaca shujlla grupo tucushpami shuj loma jahuapi macanajungapaj listo shayarirca. 26 Chai jipami Abnerca Joabtaca cashna nishpa caparirca: “¿Ima horacamanda cashna macanajushpa catingapaj munanguiyari? ¿Nachu llaquicuna tianataca cuenta japingui? Canba soldadocunataca paicunapa huauquicunahuanllata macanajunata ña saquichun niyari” nishpami caparirca. 27 Shina nijpimi Joabca cashna nirca: “Causajuj Taita Diospa* shutipimi jurani, can na imatapash nishca cajpica pacaringacamanmi soldadocunaca paicunapa huauquicunahuanllata macanajushpa catinman carca” nircami. 28 Chaita nishca jipami Joabca cachota huacachirca. Chaimi paipa soldadocunaca israelita soldadocunahuan macanajunata saquirca. Shinami macanajuica tucurirca.
29 Abnerca paipa soldadocunandimi tuta enterota Arabá pushtuta rishpa Río Jordan chaishuj ladoman cruzarca. Paicunaca ladera pambacunata jahuaman rishpami Manahaim llactaman chayarca. 30 Joabca Abnerhuan macanajunata saquishca jipami tucuilla soldadocunata tandachirca. Davidpa soldadocunamandaca Asahelpash y 19 soldadocunapashmi huañushca carca. 31 Shinapash Davidpa soldadocunaca benjaminita soldadocunata y Abnerpa soldadocunatami huañuchishcarca. Paicunaca 360 soldadocunatami huañuchishcarca. 32 Paicunaca Asahelta apashpami paipa taitata pambashca pushtupillata pambarca. Chaica Belén llactapimi carca. Chai jipami Joabca paipa soldadocunandi tuta enterota rishpa tutamandata Hebrón llactaman chayarca.