2 Samuel
6 Davidca cutinmi Israel llactamanda 30 mil alipacha soldadocunata tandachirca. 2 Chaimi Davidca paihuan cashca tucuilla soldadocunandi Baale-Judá llactamanda, Taita Diospa* Arcata apamungapaj rirca. Chai Arca ñaupapimi gentecunaca Tucuilla Angelcunata Mandaj Jehová Diosta* mañan. Taita Diosca querubín angelcunapa jahuapi* pai mandangapaj tiarina pushtupimi tiarin. 3 Taita Diospa* Arcata Abinadabpa huasimanda apangapaca shuj mushuj carretapimi churarca. Abinadabpa huasica shuj lomapimi carca. Chai mushuj carretataca Abinadabpa churicuna Uzá y Ahió shuti runacunami apanajurca.
4 Shinaca Taita Diospa* Arcataca Abinadabpa huasimandami apashpa rirca. Ahió runami Arcata ñaupashpa rijurca. 5 David y tucuilla israelitacunapashmi Jehová Diospa ñaupapica bailanajurca y candanajurca. Paicunaca enebro maderahuan rurashca instrumentocunahuan, arpacunahuan, panderetacunahuan, cimbalocunahuan y shuj instrumentocunahuanbashmi bailanajurca y candanajurca. 6 Shinapash Nacón shuti trillana pambaman chayajpica carretata aisashpa rinajuj torocunaca casimi Taita Diospa* Arcataca urmachirca. Chaimi Uzá runaca maquita chutashpa Arcataca japirca. 7 Shina rurashcamandami Jehová Diosca Uzá runahuanga ninandapacha culirarca. Taita Diospa leyta na respetashcamandami Taita Diosca* Uzá runataca huañuchishpa saquirca. Chaimi paica Taita Diospa* Arca ladopi huañurca. 8 Jehová Dios ninanda culirashpa Uzá runata huañuchishcamandami Davidca culirarca.* Chaimandami cunan punllacaman chai pushtutaca Pérez-Uzá* nishpa rijsin. 9 Chai punllami Davidca Jehová Diosta manllashpa cashna nirca: “Cunanga ¿imashata Jehová Diospa Arcataca apamushayari?” nircami. 10 Chaimi Davidca pai cashca llactamanga Jehová Diospa Arcataca na apamungapaj munarca. Paica Davidpa Llactapimi carca. Chaimandami Arcataca Obed-Edom shuti guitita runapa huasiman cacharca.
11 Jehová Diospa Arcaca Obed-Edom shuti guitita runapa huasipimi quimsa quillacunata quidarca. Chaimi Jehová Diosca Obed-Edom runata y paipa tucuilla familiataca bendiciajurca. 12 Chaimi rey Davidmanga cashna nishpa villarca: “Taita Diospa* Arcamandami Jehová Diosca Obed-Edom runapa familiata y pai tucui ima charishcacunatapash bendiciashca” nishpami villarca. Shina villajpimi Davidca cushijushpa Taita Diospa* Arcataca Obed-Edom runapa huasimanda Davidpa Llactaman apamungapaj rirca. 13 Jehová Diospa Arcata apanajujcuna 6 pasosta purishcandimi Davidca shuj torota y shuj vira vacata huañuchishpa Taita Diosman cararca.
14 Davidca Jehová Diospa ñaupapimi cushijushcapacha muyushpa bailajurca. Paica linohuan rurashca efod* ropatami churajushca* carca. 15 Davidpash y tucuilla israelitacunapashmi Jehová Diospa Arcataca apamunajurca. Paicunaca cushijuimanda caparishpa y cachocunata huacachishpami apamunajurca. 16 Jehová Diospa Arca Davidpa Llactaman chayajpica rey Davidca Jehová Diospa Arcataca muyushpami* saltashpa, bailajurca. Chaitami Saulpa ushi Micalca ventanamanda urai ricurca. Shina ricushpami Micalca paipa shungupi Davidtaca millanayachi callarirca. 17 Davidca Jehová Diospa Arcapaca shuj carpa huasipimi shuj pushtuta segurashcarca. Chai pushtupimi Arcataca churarca. Chai jipami Davidca Jehová Diospa ñaupapica rupachina ofrendacunata* y paihuan amigo cashpa catingapaj ofrendacunata* cararca. 18 Taita Diosman rupachina ofrendacunata y paihuan amigo cashpa catingapaj ofrendacunata carashca jipami Davidca Tucuilla Angelcunata Mandaj Jehová Diospa* shutipi gentecunataca bendiciarca. 19 Shinallata tandanajushca tucuilla israelita gentecunaman, cada jaricunaman y huarmicunamanmi rosca tandata, dátiles nishcahuan rurashca tortata y chaquishca uvashuan rurashca tortata curca. Chai jipami gentecunaca cada uno paicunapa huasiman rirca.
20 Chai jipami Davidca paipa familiata bendiciangapaj tigrajurca. Chaimi Saulpa ushi Micalca tuparingapaj rishpa Davidtaca cashna nirca: “Israel llactapa rey cashpatami pingaipi quidashcangui. Porque shuj tontoshnami canba sirvientecunapa esclavacunapa ñaupapi jahualla churajunata llujchirishcangui” nircami. 21 Shina nijpimi Davidca Micaltaca cashna nirca: “Ñucaca Jehová Diospa ñaupapimi celebrajurcani. Paimi canba taitapa y paipa tucuilla familiapa randi ñucata agllahuarca. Jehová Diosmi paipa llacta Israelpa líder cachun nombrahuarca. Chaimandami Jehová Diospa ñaupapi celebrasha. 22 Cashna humillarishcatapash yalitami humillarisha. Ñucaca imapapash na valinshnami sintirisha. Shinapash can parlashca esclavacunami jatunyachihuanga” nircami. 23 Saulpa ushi Micalca na huahuacunata charishpallatami huañurca.