1 Tesalonicenses
3 Chaimandami quiquingunamanda ashtahuan yachangapaj munaimandaca, mejor ñucanchilla Atenas llactapi quidashun* yarcanchi. 2 Shina yashpami ñucanchi huauqui Timoteota cachaparcanchi. Paica Cristomanda ali villaicunata predicaj Taita Diospa sirvijmi can. Quiquinguna crishpa catichunmi, paitaca quiquingunata shinllichichun, cushichichun cachaparcanchi. 3 Shinami chashna llaquicuna japijpica, nipi na debilyanga.* Porque chashna llaquicunamanda libre caita na ushashcataca alimi yachapanguichi. 4 Ashtahuangarin, quiquingunahuan cashpaca, llaquicunata charinatami parlan caparcanchi. Ña imashinami quiquingunallata yachapanguichi, ñucanchica sufripashcanchimi. 5 Chaimandami quiquinguna Taita Diospi mashnata confianajujta yachangapaj munashpa Timoteota cachaparcani. Quiquingunata Diablo imashinapash pecadopi urmachinatami pinarishca carcani. Porque shina pasajpica, ñucanchi rurashca obraca yanga yangami canman carca.
6 Pero Timoteoca, ñami quiquingunata visitashpa ali noticiacunahuan tigramupashca. Paica quiquinguna Taita Diospi confiajta y shujcunata juyashcatapashmi villarca. Shinallata ñucanchicunata juyashpa yarijtami* villarca. Ashtahuanbash imashinami ñucanchicuna quiquingunata ricungapaj munanchi, shinallata quiquingunapash ñucanchita ricungapaj munashcatami villarca. 7 Huauquicuna, chaimandami ñucanchicuna imaguta minishtinajushpapash, llaquicunapi cashpapash, quiquinguna Taita Diospi confiashpa catinajujta yachashpaca, ninanda animaripashcanchi. 8 Porque ñucanchica, quiquinguna ñucanchi Señorta ali catinajujta yachashpami, fuerzata japipanchi.* 9 Shinaca, quiquingunamanda ninanda cushijushcataca ¿imashinata Taita Diosta agradicishcataca ricuchipashun? 10 Quiquingunata ñucapacha ricui ushangapaj y quiquingunapa fe shinlliyachun imapi minishtishcata ayudangapami, tuta y punlla tucui shunguhuan Taita Diostaca rogapanchi.
11 Shinallata, ñucanchi Taita Diospash y ñucanchi Señor Jesuspash ñucanchicuna quiquingunata visitagringapaj ayudachunmi, Taita Diostaca mañapanchi. 12 Ñucanchica quiquingunataca ninandami juyapanchi. Chaimi quiquingunapurapash shinallata ashtahuan juyarichun y shujcunatapash ashtahuan juyashpa catichun ñucanchi Señor ayudachun munapanchi. 13 Shinami ñucanchi Señor Jesús paipa tucuilla separashcacunandi* tigramuna tiempopica* quiquinguna* shinlli cachun, ñucanchi Taita Diospa ñaupapi ima culpapash illa cachun y limpio shunguta charichunbash paica ayudanga.