2 Samuel
1 Saúl huañushca jipaca, amalequitacunata macanajuipi ganashca jipami Davidca Ziclag llactaman tigramurca. Chaipica ishcai punllacunatami quidarca. 2 Quimsa punllacuna jipaca Saulpa soldadocunapuramanda shuj joven shamushpami Davidpaman quimirishpa cungurishpa alpacaman cumurirca. Paipa ropapash liqui liqui y umapash alpallami carca.
3 Chaimi Davidca chai jovendaca “¿maimandata shamujungui?” nishpa tapurca. Shina tapujpimi “israelita soldadocuna shayachishca carpacunamandami escaparishpa shamujuni” nirca. 4 Shina nijpimi Davidca “¿imata pasarcayari? Por favor villahuailla” nirca. Chaimi chai jovenga cashna nishpa villarca: “Macanajuipica ashtacacunami huañurca. Chaimandami soldadocunaca escaparishpa rirca. Saulpash y paipa churi Jonatanbashmi huañurca” nircami. 5 Shina villajpimi Davidca chai jovendaca cashna nishpa tapurca: “Canga ¿imashnata Saulpash y paipa churi Jonatanbash huañushcataca yachanguiyari?” nircami. 6 Chaimi chai jovenga cashna nirca: “Guilboa urcuta justo purijushpami Saultaca paipa lanzapi taunarishca shayajujta ricurcani. Shinapimi guerrapa carretacuna y caballopi tiarishca soldadocunapash paipaman shamujujta ricurcani. 7 Saulca tigrarishpaca ñucata ricushpami cayahuarca. Chaimi ‘caipimi capani’ nircani. 8 Saulca ‘¿pita canguiyari?’ nishpami tapuhuarca. Chaimi ñucaca ‘amalequitami capani’ nircani. 9 Chaimi paica cashna nihuarca: ‘Ña huañunallami cani. Shamui, ama sufrishpa huañungapaj una sola huañuchishpa saquihuai’ nihuarcami. 10 Paica ninanda chugri tucushca, huañunallami carca. Chaimi huañuchihuai nijpica paiman quimirishpa huañuchircani. Ñuca amolla chai jipami Saulpa umapi churajushca coronata y paipa maqui rigrapi churajushca brazaletetapash quiquinman apamungapaj japircani” nircami.
11 Chaita villajpimi Davidca ninanda llaquirishpa paipa ropata liquirirca. Paihuan cashca tucuilla soldadocunapashmi shinallata rurarca. 12 Paicunaca caparishpa, huacashpami chishayangacaman nimata na micushpa ayunanajurca.* Paicunaca Saulpash, paipa churi Jonatanbash, Jehová Diospa llactamanda ashtacacuna y ashtaca israelitacunapash espadahuan huañuchi tucushcamandami shina ruranajurca.
13 Ima pasashcata villajuj jovendaca Davidca “¿maimandata cangui?” nishpami tapurca. Chaimi chai jovenga “ñucaca shuj llactamanda causangapaj shamushca amalequita runapa churimi cani” nircami. 14 Davidca chai jovendaca “¿ima nishpata Jehová Dios agllashca reytaca* huañuchircanguiyari?” nircami. 15 Shina nishca jipami Davidca paipa soldadocunapuramanda shuj soldadota cayashpa “shamui, paita huañuchi” nircami. Shina nijpimi chai soldadoca chai jovenda espadahuan atacashpa huañuchirca. 16 Davidca chai jovendaca cashnami nishcarca: “Canga ‘Jehová Diospa agllashca reytaca ñucami huañuchircani’ nishcamandami, canba culpamandallata cunanga huañuchi tucugringui”* nishcarcami.
17 Chai jipaca Saulpash y paipa churi Jonatanbash huañushcamandami Davidca shuj cancionda candarca. 18 Cai canciondaca Judá jatun familiamanda tucuilla gentecunaman yachachichunmi Davidca mandarca. Cai cancionga “El arco” shutimi can. Y Jasar libropimi escribishca can. Cai cancionbica cashnami nijun:
19 “Israel llactalla, canba alipacha jaricunaca canba urcucunapimi huañushca can.
Ricui alipacha shinlli runacunaca macanajuipimi huañushca.
20 Chaitaca Gat llactapica ama villanguichichu.
Asquelón llactapa ñangunapipash ama villanguichichu.
Filisteocunapa ushicuna ama cushijunajuchun,
Taita Diosta na sirvijcunapa* ushicuna ama celebranajuchunga ama villanguichichu.
21 Guilboa llactapa urcucunalla,
canguna jahuapica serenopash, tamiapash ama urmamuchun.
Taita Diosman ofrendata carangapapash chai alpacunapica ama imapash fucuchun.
Chaipica alipacha shinlli runacunapa escudocunapash pingaipimi quidashca.
Saulpa escudotapash nipipash ñana aceitehuanga javinllu.
22 Jonatanga siempremi arcotaca alipacha utilizanata yachan carca.
Cutin Saulca macanajuipi mishangapaca siempremi espadata utilizan carca.
Arcopash, espadapash alipacha shinlli soldadocunatami huañuchishpa saquin carca. Y chaicunaca contracunapa yahuarhuan yahuarsapami quidan carca.
23 Saulpash, Jonatanbash causashpaca juyai tucushca y alicachi tucushcacunami* carca.
Paicunaca huañushpapash igualmi huañurca.
Paicunaca águila angacunatapash yalimi ñapash rin carca.
Paicunaca leongunatapash yalimi shinllicuna carca.
24 Israel llactapa ushicunalla, Saulmanda huacaichiyari.
Paimi cangunataca puca puca, fino ropahuan churachin carca.
Shinallata ropapipash orohuan rurashca adornocunatami churachin carca.
25 Ricui, alipacha shinlli runacunaca macanajuipimi huañushca.
Jonatanga canba urcucunapimi huañushca can.
26 Jonatán ñuca huauquilla, canmandaca llaqui llaquimi sintirini.
Candaca ninandami juyarcani.
Canba juyaimi ñucapaca huarmicunapa juyaitapash yali carca.
27 Ricui, alipacha shinlli runacunaca macanajuipimi huañushca.
Macanajungapaj cosascunapash tucurishcami can” nishpami cancionbica nijun.