Ester
7 Chai jipami reypash, Hamán runapash reina Ester rurajushca jatun micuimanga chayarca. 2 Cati punllapica, vinota ufianajuj* horasca cutinmi reyca reina Estertaca cashna tapurca: “Reina Ester ¿imatata munangui? Nihuailla, imata mañajpipash cushallami. ¿Imatata mañangapaj munahuangui? Ñuca mandana llactacunamanda chaupita cashpapash, cushallami” nircami. 3 Chaimi reina Esterca cashna nirca: “Ñuca reylla, si quiquinba ñaupapi ali ricurini y ñuca mañashcatapash rey cungapaj munashpaca ñuca causaita y ñuca llactamanda gentecunapa causaitapash salvachunmi rogapani. 4 Porque ñucapash y ñuca llactamanda gentecunapash huañuchishpa, tucuchitapacha tucuchi tucungapami jatui tucushcanchi. Esclavocuna y esclavacunalla cachun jatujpirapash upallami quidaiman carcani. Pero cai jatun llaquica na yangata chaipi quidaita ushanllu. Porque cai jatun llaquica reytapashmi perjudicanga” nircami.
5 Chaimi rey Asueroca reina Estertaca cashna nirca: “Shinatapacha rurangapaj munaj runaca ¿pita can? ¿maipita can?” nircami. 6 Chaimi Esterca: “Chai millanai nalipacha contra runaca Hamán runami can” nircami.
Chaita uyashpami Hamán runaca reytapash, reina Estertapash ninanda manllai callarirca. 7 Chaimi reyca vinota ufianajuj* horasca ushashcata culirashpa, jatarishpa palacio jardinman llujshirca. Hamanga rey paita castigagrijushcatapacha cuenta japishpaca paipa causaimanda reina Esterta rogangapami jatarirca. 8 Palacio jardinmandaca, vinota ufianajushca* pushtumanmi reyca tigramurca. Tigrashpaca Hamán runa, Ester tiajushca fino sillonman vitsashcatami* ricurca. Chaimandami cashna caparirca: “¿Cai runaca chai jahuapashchu reinata ñuca propio huasipi violangapaj munajun?” nishpami caparirca. Rey chaita nijhuanmi reypa sirvientecunaca Hamán runapa ñavitaca taparca. 9 Reypa huasipi trabajaj funcionariocunamanda Harboná shuti funcionarioca cashnami nirca: “Hamán runaca Mardoqueota huarcungapaj nishpami 22 metros de altota* midij shuj jatun racu caspitapash* shayachishca. Chai racu caspica Hamanba huasipimi can. Mardoqueoca shuj denunciata churashpami, reytaca salvashcarca” nircami. Chaita uyashpami reyca: “Chai racu caspipi Hamán runata huarcuichi” nishpa mandarca. 10 Chaimi Hamán runataca, Mardoqueoman segurashca racu caspipi huarcurca. Chai jipami, reyca culirata yalichirca.