2 Tesalonicenses

2 Shinapash huauquicuna, ñucanchi Señor Jesús tigramuna tiempomanda* parlashpa y ñucanchicuna paihuan tandanajunamanda parlashpaca caitami mañapanchi, 2 Taita Dios villachishcashnalla cajpipash, pi imata nijpipash aliguta pensarinataca na ñapash saquinachu capanguichi, na manllarinachu capanguichi. Shinallata Jehová* Diospa punllaca ñami chayamushca nishpa ñucanchi cachashca cartashnalla cajpipash, aliguta pensarinataca na ñapash saquinachu capanguichi, na manllarinachu capanguichi.

3 Pipash quiquingunata imashinapash umachichunga na saquinachu capanguichi. Taita Diospa punllaca, Taita Diospa contra tucushpa shayarijcuna* ricurishca jipa, shinallata leyta na cazungapaj munaj runa* imatapash rurai callarishca jipami chayamunga. Chai runaca tucuchi tucushcami canga. 4 Paica contrami can. Dioshnami canchi nij gentecunatapash yalishpami jariyan y adorai tucun. Chaimandami paica Taita Diospa templo huasipi* tiarin y tucuicunapa ñaupapipash shuj dioshna presentarin. 5 Quiquingunahuan cashpa caicunata ñuca nijushcataca ¿nachu yaripanguichi?*

6 Leyta na cazungapaj munaj runa ricurina tiempopi ricurichun pi jarcajushcataca cunanmi quiquingunaca ali yachapanguichi. 7 Cai runapa nali rurashcacunaca secretopi cashpapash ñami ricuri callarishca. Pero cai runapa nali rurashcacunaca, maijan jarcajuj ñana tiangacamanmi secretopi canga. 8 Shina pasajpimi leyta na cazungapaj munaj runapa* rurashcacunaca clarito ricuringa. Paitaca, Señor Jesusmi ashtaca poderta charij paipa parlashcacunahuan* pai tigramushca tiempopi* tucuchinga. 9 Leyta na cazungapaj munaj runaca* Diablopa* ayudahuanmi ricurin. Diablomi paitaca shuj shuj milagrocunata rurachun, llulla señalcunata rurachunbash ayudan. 10 Tucui clase o tucui laya nali ruraicunahuanmi umachin. Tucuchi tucuna gentecunata umachichunga Diablomi paimanga poderta cun. Porque chai gentecunaca salvai tucungapaj cabal yachachishcacunataca na chasquinllu y na juyanllu. 11 Chaimandami paicunataca, llullata crishpa umachi tucuchun Taita Diosca saquishca. 12 Cabal yachachishcacunapi crinapa randica nali ruraicunatami cushijushpa rurarca. Chaimandami tucui paicunataca juzgai tucuchun saquishca.

13 Huauquicuna, Jehová* Diosca quiquingunataca juyanmi. Quiquingunamandaca siempremi Taita Diostaca agradicipanchi. Shina ruranaca alimi can. Taita Diosca paipa espíritu santohuanmi* quiquingunataca separashca. Shinallata quiquingunaca cabal yachachishcacunatapashmi crishcanguichi. Chaimandami quiquinguna salvai tucuchun Taita Diosca callarimandapacha quiquingunataca agllashca. 14 Ñucanchi villachishca ali villaicunamanda salvarichunmi paica quiquingunataca agllashca.* Ñucanchicunapash ñucanchi Señor Jesucristoshna alipi churai tucuchunmi shina rurarca. 15 Shinaca huauquicuna, shinlli shayarishca capaichi. Ñucanchi yachachishca cosascunataca* shimilla villashca cajpi o cartapi escribishca cajpipash, nimamanda na saquinachu capanguichi. 16 Ashtahuanbash ñucanchi Taita Diosca ñucanchitaca juyanmi. Paica ninanda juyaimandami* para siempre cushichin y alipacha esperanzatapash cun. Ñucanchi Señor Jesucristopash y Taita Diospash quiquingunapa shunguta cushichichunmi ñucanchica mañapanchi. 17 Shinallata, quiquingunata shinllichichun Taita Diostaca mañapanchi. Shinami quiquinguna siempre alita rurapanguichi y siempre alicunata parlapanguichi.