2 Samuel
17 Ahitofelca Absalondaca cashnami nirca: “Por favor, cai tutallata Davidta catiria ringapaj 12 mil soldadocunata agllachun saquihuai. 2 Paitaca shaijushca y débil* cajpimi na yashcapi manllachisha. Shinami paihuan cashca tucuilla gentecunaca pacajungapaj calpanga. Chaimi reytalla huañuchishpa saquisha. 3 Chai jipaca tucuilla gentecunatami caiman tigrachimusha. Can mascajushca jari huañujpica tucuilla gentecunami tigramuita ushanga. Shinami gentecunaca tranquilo ali causanga” nircami. 4 Ahitofelpa nishcacunaca Absalonba y Israel llactata ñaupaman pushaj jaricunapaca* alimi uyarirca.
5 Pero Absalonga cashnami nirca: “Por favor Husái shuti arkita runata cayaichi. Paipash imata nijta uyashunchi” nircami. 6 Chaimi Husaica Absalonba ñaupapi presentarirca. Absalonga paitaca cashnami nirca: “Caita rurachunmi Ahitofelca nirca. ¿Paipa nishcataca ruranacha canchi? Na cashpaca ¿imatata rurana canchi?” nishpami tapurca. 7 Shina tapujpimi Husaica Absalondaca “cai viajeca Ahitofel imata rurachun nishcaca nalichu can” nircami.
8 Husaica caitapashmi nirca: “Quiquinba taitapash y paipa soldadocunapash alipacha shinllicuna cajtaca quiquinga alimi yachapangui. Huahuacunata pambapi chingachishca shuj culira huarmi ososhnami paicunaca culira canga. Ashtahuanbash quiquinba taitaca alipacha macanajunata yachaj soldadomi can. Y tutaca gentecunahuanga na yalingachu. 9 Cunanllatami paica cuevacunapi* o maipi cashpapash pacajushca canga. David primero atacashpa vincijpica, pipash chaita yachaj chayashpaca ‘Absalonda apoyajcunaca vinci tucushcami’ ninajungami. 10 Tucuilla israelitacunami quiquinba taitaca alipacha shinlli cajta y paipa soldadocunapash na manllajcuna cajtaca ali yachan. Chaimandami maijan soldadopash shuj león cuenda* na manllaj cashpapash ninanda manllajunga. 11 Caitami ruraita ushapangui. Mar ladopi tiashca arena cuenda ashtaca ashtaca jaricunata tandachi. Danmandapacha, Beer-Sebacaman tucuilla israelita jaricunata tandachi. Paicunataca quiquinmi macanajuiman dirigina capangui. 12 Sereno tamia alpaman urmanshnami Davidtaca ashtaca soldadocunahuan maipi cajpipash atacashun. Nipipash na causaca quidangachu. Paipash, paipa soldadocunapashmi huañunga. 13 Pai shuj llactapi pacajujpica tucuilla israelitacuna cabiacunata apashpami chai llactapa pircacunataca pambacaman alastrashpa apashun. Chaipica ni shuj rumillapash na quidangachu” nircami.
14 Chaimi Absalonbash y tucuilla israelitacunapash cashna nirca: “Husái arkita runa imata rurachun nishcami Ahitofel rurachun nishcamandaca ashtahuan mejor can” ninajurcami. Jehová Dios Ahitofelpa ali pensarishpa nishcacunata jarcanata decidishcamandami* shina pasarca. Shinami Jehová Diosca Absalonda llaquichigrijurca.
15 Chai jipami Husaica Sadoc y Abiatar sacerdotecunataca cashna nirca: “Absalonda y Israel llactata ñaupaman pushaj jaricunataca Ahitofelca cashna rurachunmi nirca. Pero ñucaca caita rurachunmi nircani. 16 Cunanga cai rato Davidtaca cai tutaca desiertopi Río Jordanda yalina ñangunapica* ama quidachun nishpa advirtichun mensajerocunata cachaichi. Paicunaca Río Jordandami chimbana can. Na cashpaca rey Davidpash y paihuan cashca tucuilla gentecunapashmi huañuchi tucunga” nircami.
17 Jonatán y Ahimaazca En-Roguel pushtupimi carca. Paicunaca Jerusalén llactaman yaicujta pipash ricuchunga na munarcachu. Chaimi shuj sirvienta paicunapaman rishpa Husái tucui ima nishcata villarca. Shinami paicunaca rey Davidman villangapaj rirca. 18 Shinapash shuj joven paicunata ricushpami Absalonman villarca. Chaimi Jonatán y Ahimaazca uchalla rishpa Bahurim puebloman chayarca. Patiopi shuj pozota charij shuj jaripa huasimanmi paicunaca chayarca. Chai pozo ucupimi paicunaca pacajurca. 19 Chai jaripa huarmica chai pozotaca shuj telahuan tapashpami chai jahuapica cutashca granota mandachirca. Shinami paicuna chaipi pacajunajushcataca nipipash na cuenta japirca. 20 Absalonba sirvientecunaca chai huarmipa huasimanmi chayarca. Paicunaca chai huarmitaca “Ahimáaz y Jonatanga ¿maipita can?” nishpami tapurca. Shina tapujpimi chai huarmica “paicunaca riomanmi rirca” nishpa contestarca. Chaimi chai sirvientecunaca paicunata mascangapaj rirca. Pero paicunata na tarishpami Jerusalén llactaman tigrarca.
21 Absalonba sirvientecuna rishca jipami Ahimáaz y Jonatanga pozomanda llujshishpa rey Davidpaman rirca. Paicunaca Davidtaca cashnami nirca: “Ahitofelca quiquingunapa contrami caita y chaita rurachun nishca. Chaimanda uchalla riota chimbaichi” nircami. 22 Shina nijpimi Davidpash y paihuan cashca tucuilla gentecunapash uchalla Río Jordanda chimbai callarirca. Pacaripaca tucuillami Río Jordandaca ña chimbashcarca.
23 Ahitofelca pai imata rurachun nishcata paicuna na rurajta ricushpami shuj burropi monturata churashpa paipa puebloman, paipa huasiman rirca. Chai jipaca paipa familiaman imata ruranata ricuchishca jipami sipirishpa huañurca. Ahitofeltaca paipa punda taitacunata pambashca pushtupillatami pambarca.
24 Chaicamanga Davidca Mahanaim llactamanmi rirca. Y Absalonga Israel llactamanda tucuilla soldadocunandimi Río Jordanda yalirca. 25 Absalonga Joab runapa randica Amasá shuti runatami soldadocunata mandachun churarca. Amasá runaca Itrá shuti israelita runapa y Abigaíl shuti huarmipa churimi carca. Abigailca Nahás shuti runapa ushi, Zeruyá huarmipa ñañami carca. Zeruyaca Joabpa mamami carca. 26 Absalonga Israel llactamanda soldadocunandimi Galaad alpacunapi carpacunata shayachirca.
27 Davidca Mahanaim llactamanmi chayarca. Chaimi enseguida ammonitacunapa Rabá llactamanda Nahás runapa churi Sobí runapash, Lo-Debar pushtumanda Amiel runapa churi Makir runapash y Roguelim pushtumanda Barzilái shuti galaadita runapashmi chayarca. 28 Paicunaca camacunata, trastecunata, alpa mangacunata, trigota, cebadata, harinata, camllashca granota, habasta, lentejastami apamurca. 29 Shinallata mielta, mantequillata, llamacunata, quesocunatami apamurca. Paicunaca cashnami ninajurca: “Cai gentecunaca desiertopi cashcamandami yarjachinajunga, yacunayachinajunga y shaijushcacuna canga” ninajurcami. Chaimi paicunaca chai tucui cosascunata Davidpash y paihuan cashca tucuilla gentecunapash micuchun apamurca.