Ester
8 Chai punllami rey Asueroca, Hamán runa tucui imata charishcataca reina Estermanga curca. Hamán runaca judiocunapa contrami carca. Esterca, Mardoqueo paipa familia cashcatami reymanga villashcarca. Chaimi Mardoqueoca reypa ñaupapi presentarirca. 2 Chai jipami reyca, Hamán runata quichushca anillota llujchirishpa Mardoqueoman curca. Chai anilloca sellota churana anillomi carca. Shinallata Esterca, Hamán runapa tucui charishcacunatami Mardoqueo a cargo cachun curca.
3 Esterca cutinmi reyhuan parlarca. Esterca reypa chaqui ñaupapi cungurishpami, agaguita Hamán runa tucui ima nalita rurashcata arreglachunmi reytaca huacashpa rogarca. Shinallata judiocunata huañuchingapaj munaimanda llujchishca ordendapash anulachunmi mañarca. 4 Shina rurajpimi reyca paipa oro varataca Esterpaman ricuchishpa chutarca. Chaimi Esterca jatarishpa reypa ñaupapi shayarishpa quidarca. 5 Esterca reytaca cashnami nirca: “Si reypa ali cajpi y reypa ñaupapi ñuca ali ricurishca cajpi y ñuca nishcata rey alicachijpi y si ñuca quiquinda cushichishca cajpica, caitami mañangapaj munapani. Hamán runaca Hamedata agaguita runapa churimi can. Hamanga reypa tucuilla provinciacunamanda judiocunata tucuchishpa saquingapami shuj documentocunata escribirca. Chai documentocunata anulangapaj shuj ordenda escribichichunmi quiquindaca mañangapaj munapani. 6 Porque ñuca llactamanda gentecunata y ñuca familiatapash llaquinaita huañuchinajujta ricuitaca ¿imashinata aguantaita ushapashayari?” nircami.
7 Shina nijpimi rey Asueroca reina Esterta y judío Mardoqueotapash cashna nirca: “Ricunguichi, Estermanga ñami Hamán runapa tucui charishcacunataca entregarcani. Shinallata Hamán runatapash, judiocunata atacangapaj* munashcamandaca ñami jatun racu caspipi* huarcuchun mandarcani. 8 Cunanga judiocunapa ima ali cashcata ricushpami, cangunaca reypa shutipi shuj leyta escribina canguichi. Chai leytaca sellota churana reypa anillohuanmi sellana canguichi. Porque reypa shutipi escribishca ley caimanda y reypa sellana anillohuan sellashca caimandami, chai leyta anulaitaca na usharin” nircami.
9 Chaimi siván* shuti quillapa punlla 23pica reypa secretariocunata tandachirca. Huatapa tercer quillami siván shuti quilla carca. Chai secretariocunaca Mardoqueo imata ordenashcatami judiocunaman, reypa representante sátrapa runacunaman, gobernadorcunaman y provinciacunapa principecunamanbash escribirca. Cai principecunaca India llactamanda, Etiopía llactacaman tiashca 127 provinciacunata mandajcunami carca. Chai ordenga cada provinciapi imashna escribin cashcashnallatami escribishca carca. Shinallata cada llactamanda gentecuna parlashca idiomapimi escribishca carca. Shinallata judiocunamanbash paicuna imashna escribin cashcashnallatami escribishca carca y paicunapa propio idiomapillatami escribishca carca.
10 Mardoqueoca rey Asueropa shutipimi documentocunataca escribirca. Chaitaca reypa sellana anillohuanmi sellarca. Cai documentocunataca shinllita calpaj caballocunapi* rij mensajerocunahuanmi cacharca. Cai caballocunaca reypa trabajangapaj caballocunami carca. 11 Chai documentocunapica, reyca tucuilla llactamanda judiocunamanmi paicunata atacangapaj shamujpica tandanajushpa difindirichun permisota cujurca. Shinallata contracuna maijan pueblomanda o maijan provinciamanda cajpipash, huarmicuna o huahuacuna cajpipash judiocunata atacajpica, judiocuna difindirichunmi permisota cujurca. Judiocunaca paicunapa contracunataca huañuchishpa tucuchitapacha tucuchishpapash saquinallami carca. Shinallata chai documentocunapica contracunapa charishcacunatapash dueñoyachunmi permisota cujurca. 12 Chaicunataca rey Asuero mandajushca tucuilla provinciacunapimi, quilla 12pa punlla 13pi rurana carca. Chai quillaca, adar* shuti quillami carca. 13 Chai documentopi imata nijushcacunaca* tucuilla provinciacunapimi shuj ley tucuna carca. Shinallata judiocuna chai punllapa listo cachun y paicunapa contracunamandapash vengari ushachunmi, chai leytaca tucuilla pueblocunapi villachina carca. 14 Chaimandami mensajerocunaca rey ordenda cujpi, chai rato caballocunata* japishpa llujshirca. Chai caballocunaca reypa trabajocunapami carca. Chai caballocunapimi ushashcata rirca. Chai leytaca palacio de Susapipashmi villarca.
15 Reypa ñaupamanda Mardoqueo llujshishpaca, rey churajuna ropacunata churajushpami llujshirca. Chai ropapa colorca yura y azulmi carca. Shinallata jatun corona de orotapashmi churajuria carca. Shinallata morado milma puchahuan rurashca alipacha fino capatapashmi churajushca carca. Chaimi Susa llactapi causaj gentecunaca cushijuimanda caparirca. 16 Judiocunaca libremi quidarca. Chaimandami ninandapacha cushijushca carca. Shinallata gentecunapashmi judiocunataca respetarca. 17 Reypa ordenbash y paipa leypash tucuilla provinciaman y tucuilla llactacunamanmi chayarca. Judiocuna maijan pushtupi cajpipash cai orden paicunapaman chayashcamandami ninanda cushijunajurca. Shinallata jatun micuicunata y fiestacunatapashmi ruranajurca. Shuj pueblocunamanda* ashtaca gentecunapashmi judiocuna tucunajurca. Judiocunata ninanda manllaimandami shuj pueblocunamanda tauca gentecunaca judiocuna tucunajurca.