Ester

9 Quilla 12ca adar* shuti quillami carca. Cai quillapa punlla 13pimi reypa orden y pai cushca leypash pactarina carca. Judiocunapa contracunaca chai punlla judiocunata mishanatami shuyanajurca. Pero chai pasanapa randica, judiocunarami chai punllaca paicunapa contracunata misharca. 2 Rey Asuero mandajushca tucuilla provinciacunamanda judiocunami paicunapa llactacunapi tandanajurca. Judiocunaca paicunata llaquichingapaj munajcunata atacangapami tandanajurca. Tucuilla pueblocunamanda gentecunami paicunataca manllarca. Chaimandami paicunataca nipipash na mishai usharca. 3 Shinallata provinciamanda tucuilla principecuna, reypa representante satrapacuna, gobernadorcuna, reypa asuntocunamanda encargadocunapashmi Mardoqueotaca manllarca. Chaimandami judiocunataca ayudanajurca. 4 Mardoqueoca reypa huasipica* ashtaca autoridadtami chasquishcarca. Mardoqueoca tucuilla provinciacunapimi ninan rijsishca tucujurca. Porque paica ashtahuan autoridadtami charishpa catijurca.

5 Judiocunaca paicunapa tucuilla contracunatami espadacunahuan atacashpa huañuchirca. Paicunataca tucuchishpami saquirca. Paicunaca paicunata contrashpa ricujcunataca ima munashcatami rurarca. 6 Judiocunaca 500 jaricunatami palacio de Susapica huañuchishpa tucuchitapacha tucuchirca. 7 Shinallata Parsandatá shuti runata, Dalfón shuti runata, Aspatá shuti runatapashmi huañuchirca. 8 Poratá shuti runata, Adalía shuti runata, Aridatá shuti runata, 9 Parmastá shuti runata, Arisái shuti runata, Aridái shuti runata y Vaizata shuti runatapashmi judiocunaca huañuchirca. 10 Paicunami Hamedata runapa churi Hamán runapa 10 churicuna carca. Hamanga judiocunapa contrami carca. Judiocunaca paicunata huañuchishpapash, paicunapa charishcacunahuanga na quidarcachu.

11 Chai punllaca palacio de Susapi mashnacuna huañushcatami reymanga villarca.

12 Reyca, reina Estertaca cashnami nirca: “Palacio de Susapi judiocuna 500 jaricunata y Hamán runapa 10 churicunatapash huañuchishpa tucuchitapacha tucuchishca cashpaca, rey mandajushca chaishuj provinciacunapicarin ¿imatashi na rurashcanga? Cunanga ¿imatata ashtahuan munangui? Nihuailla, ñucaca cushallami. ¿Imatata ashtahuan mañangapaj munahuangui? Can munashcatami ñucaca cushalla” nircami. 13 Shina nijpimi Esterca nirca: “Reypa ali cajpica, leypi mandashcashna Susamanda judiocuna cunan punlla difindirishcashnallata, caya punllapash difindirichun saquipai. Shinallata Hamán runapa 10 churicunapa cuerpocunatapash jatun racu caspipi* huarcuchichunmi mañapani” nircami. 14 Chaimi reyca chaita rurachun mandarca. Susa llactapica shuj leytami rurarca. Y Hamán runapa 10 churicunapa cuerpocunatapashmi jatun racu caspipi huarcuchun mandarca.

15 Susamanda judiocunaca 14 de adarpimi cutin tandanajurca. Susa llactapica 300 jaricunatami huañuchirca. Shinapash paicunapa charishcacunahuanga na quidarcachu.

16 Rey mandajushca provinciacunamanda chaishuj judiocunapashmi difindiringapaj tandanajurca. Paicunaca paicunapa contra 75 mil gentecunatami huañuchirca. Shinami paicunapa contracunamandaca libre quidarca. Shinapash paicunapa charishcacunahuanga na quidarcachu. 17 Chaica 13 de adarpimi pasarca. Pero punlla 14taca paicunaca samashpami jatun micuicunata rurangapaj y cushilla yalingapaj punllamanmi tigrachirca.

18 Susa llactamanda judiocunaca punlla 13pi y punlla 14pimi difindiringapaj tandanajurca. Pero punlla 15taca samashpami chai punllataca jatun micuicunata rurangapaj y cushilla yalingapaj punllaman tigrachirca. 19 Cutin campomanda judiocuna y shuj llactacunapi causaj judiocunapashmi 14 de adar punllataca jatun micuicunata rurangapaj y cushilla yalingapaj punllaman tigrachirca. Chai punllaca fiesta punlla y randimanda micunata cararingapaj punllami carca.

20 Mardoqueoca tucui cai cosascuna pasashcata escribishpami, rey Asueropa tucuilla provinciacunamanda tucuilla judiocunamanga cartacunata cacharca. Chai cartacunataca ladollapi cajcunaman y carupi cajcunamanbashmi cacharca. 21 Chai cartacunapica, 14 y 15 de adar punllacunata cada huata celebrachunmi mandajurca. 22 Porque chai punllacunapimi judiocunaca paicunapa contracunamanda samarca. Chai quillaca paicuna sufrinajushcaca shuj cushijuimanmi tigrarca. Y ninanda llaquirijuna punllapash* shuj fiesta punllamanmi tigrarca. Chai punllacunataca jatun micuicunahuan y ninan cushijuihuanmi celebrana carca. Shinallata randimandami micunata cararina carca. Pobre gentecunamanbashmi imacunatapash carana carca.

23 Judiocunaca chai fiestataca ñami celebrai callarishca carca. Y celebrashpa catingapami de acuerdo carca. Shinallata Mardoqueo escribishcatapash rurangapami de acuerdo carca. 24 Shinami tucuilla judiocunaca, paicunapa contra Hamán runa, tucuilla judiocunata tucuchitapacha tucuchingapaj munajushcataca yarina carca. Hamán runaca Hamedata agaguita runapa churimi carca. Hamanga judiocunata ninanda manllachishpa, paicunata tucuchingapami pur nishca sorteota rurashcarca. 25 Pero reypa ñaupapi Ester presentarishcamandami reyca shuj ordenda escribichirca. Chai ordenbica nijurcami: “Judiocunapa contra Hamán runa judiocunata huañuchingapaj munashpa llujchishca ordenga, paipillata urmachun” nishpa. Chaimi Hamán runata y paipa churicunatapash racu caspipi huarcurca. 26 Chai pasashcamandami chai punllacunataca pur* shimimanda Purim nishpa rijsirca. Mardoqueo chai cartapi imata escribishcamanda, paicuna imata ricushcamanda y paicunata ima sucedishcamandapashmi judiocunaca, 27 chai punllacunataca celebrangapaj comprometirirca. Judiocunaca paicunallatapash, paicunapa huahuacunapash,* tucuilla paicunahuan tandanajujcunapashmi chai ishcandi punllacunata maimanda celebrangapaj decidirca. Shinallata Mardoqueo escribishcashnallata chai ishcandi punllacunata cada huata agllashca tiempopi pactachingapapashmi comprometirirca. 28 Tucuilla familiacunami provinciacunapi y tucuilla llactacunapi chai punllacunataca yuyarishpa celebrana carca. Tucuilla familiacunapa cati cati viñaicunapashmi* chai punllataca yuyarishpa celebrana carca. Judiocunaca, Purim shuti fiestata celebranataca nunca na saquinachu carca. Judiocunapa huahuacunapash chaita yuyarinata y celebranataca nunca na saquinachu carca.

29 Chai jipami reina Esterpash y Mardoqueo judiopash tucuilla autoridadta utilizashpa, Purim fiestamanda parlangapaj shuj cati cartata escribirca. Esterca Abihail runapa ushimi carca. 30 Mardoqueoca rey Asuero mandajushca 127 provinciacunamanda tucuilla judiocunamanmi cartacunataca cacharca. Chai cartacunaca cushichij y confiai usharishca shimicunahuan escribishcami carca. 31 Chai cartacunaca, Purim shuti fiestata rurana punllacunapi celebrachun aseguraringapami carca. Chai fiestataca Mardoqueo judiopash y reina Esterpash mandashcashnami rurana carca. Chaita rurangapami judiocunapash y paicunapa huahuacunapash* paicunapa munai comprometirishcarca.* Chai fiestapica judiocunaca ayunaitapashmi ayunana* carca y Taita Diospa ayudatapashmi rogana carca. 32 Ester cachashca ordenga paicuna Purim Fiestata rurana cashcatami confirmarca. Ester ordenashcataca shuj libropimi registrarca.