2 Samuel
13 Davidpa churi Absalón shuti runaca shuj juyailla panitami charirca. Paica Tamar shutimi carca. Davidpa chaishuj churi Amnón shuti runaca Tamarmandami enamorarirca. 2 Amnonga paipa pani Tamarta ninanda munaimandami imata ruranatapash na atinajurca. Chaimandami irquiyarca. Tamarca jarihuan nara cashca virgenmi carca. Chaimandami Amnonbaca paihuan imatapash ruranaca na ushanashna carca. 3 Amnonga Jehonadab shuti amigotami charirca. Jehonadabca Simeá runapa churimi carca. Simeá runaca Davidpa huauquimi carca. Jehonadabca vivo vivo runami carca. 4 Jehonadabca Amnondaca cashnami nirca: “¿Imashpata canga reypa churi cashpata siempre llaquilla cangui? Canda ima pasajujta villahuai” nircami. Shina nijpimi Amnonga cashna nirca: “Ñucaca ñuca huauqui Absalonba pani Tamarmandami enamorarishca cani” nircami. 5 Chaimi Jehonadabca cashna nirca: “Huañujuj tucushpa camapi siriri. Canba taita canda ricungapaj shamujpica cashna ningui: ‘Por favor ñuca pani Tamarta imapash micunaguta rurachun cachamupai. Pai ñuca ñaupapi micunata* preparashpa carajpica ñucaca micushami’ ningui” nircami.
6 Shina nijpimi Amnonga camapi siririshpa huañujuj tucurca. Chaimi reyca paita ricungapaj shamurca. Amnonga reymanga cashnami nirca: “Por favor, ñuca pani Tamarta cachamupai. Ñuca micuchun, pai ñuca ñaupapi corazón formata charij ishcai tandata rurashpa cuhuachun” nircami. 7 Davidca Tamar huasipi cajpimi paita cashna nichun cacharca: “Por favor canba turi Amnonba huasiman rishpa, paiman imapash micunaguta preparagri” nircami. 8 Shina nijpimi Tamarca paipa turi Amnonba huasiman rirca. Tamarca Amnón sirijushca pushtumanmi rirca. Chaipimi paica masata paipa ñaupapi masashpa huaquin tandacunata rurarca. 9 Chai jipami Tamarca tandacunata japishpa Amnonman curca. Pero Amnonga na micungapaj munarcachu. Amnonga “tucuicuna caimanda llujshichi” nircami. Chaimi tucuicuna chaimanda llujshirca.
10 Chai jipami Amnonga Tamartaca cashna nirca: “Micunata cuartoman apamui. Chaipimi can micuchihuangui” nircami. Shina nijpimi Tamarca corazón formata charij rurashca tandacunata japishpa paipa turi Amnonba cuartoman aparca. 11 Tandata micuchingapaj quimirijujpimi Amnonga Tamarta japishpa cashna nirca: “Ñuca panigulla ñucahuan puñui”* nircami. 12 Chaimi Tamarca cashna nirca: “Na ñuca turigulla, ama cashna rurashpa humillahuaichu. Israel llactapica shinataca nimamanda na ruranachu can. Ama shina millanaitaca ruraichu. 13 Can shina rurajpica pingaipami causasha. Candaca Israel llactapica millanai runatashnami ricunga. Por favor reyhuan parlapai. Paica ñuca canba cachunga na jarcangachu” nircami. 14 Shina nijpipash na uyangapaj munarcachu. Amnonga ashtahuan fuerzayu caimandami Tamartaca violashpa humillarca. 15 Chai jipaca Amnonga Tamartaca ninandami odiai callarirca. Punda juyashcatapash yalimi Tamartaca ninanda odiai callarirca. Chaimandami Amnonga Tamartaca “jatari, caimanda rishpa siri” nircami. 16 Shina nijpimi Tamarca cashna nirca: “Ñuca turilla caimadaca ama calpachihuaichu. Cashna rurashpaca ashtahuan nalitami rurahuajungui” nircami. Shina nijpipash paica na uyangapaj munarcachu.
17 Chaimi Amnonga paita sirvij jovenda cayashpa cashna nirca: “Cai huarmita ñuca ñaupamanda llujchishpa saqui. Pungutapash aldabashpa saquingui” nircami. 18 (Tamarca adornocunahuan rurashca jahualla churajuna ropahuanmi carca. Reypa virgen ushicunallami shina churajun carca). Amnonba sirvienteca Tamarta llujchishpami punguta aldabashpa saquirca. 19 Chaimi Tamarca uma jahuapi uchufata churarishpa adornocunahuan rurashca jahualla churajunatapash liquirirca. Maquicunatapash umapi churashpami ninanda caparishpa rirca.
20 Tamarta ricushpami paipa turi Absalonga cashna nishpa tapurca: “¿Canba turi Amnonllu candaca cashna nalita rurarca? Ñuca panigulla caitaca ama pimanbash villanguichu. Caimandaca ama preocuparijunguichu. Paica canba turimi can” nircami. Chai jipami Tamarca paipa turi Absalonba huasipi causashpa quidarca. Paica pihuanbash na parlashpami causarca. 21 Rey Davidca ima pasashcata yachaj chayashpaca ninandapachami culirarca. Pero Davidca Amnón paipa primer churi cashcamanda y paita juyashcamandami na llaquichingapaj munarca. 22 Cutin Absalonga Amnón paipa pani Tamarta humillashcamandami Amnondaca odiarca. Shinapash Amnondaca nimata na nircachu.
23 Ña ishcai huata yalishca jipami Absalonba llamacunapa milmacunata rutujcunaca Baal-Hazor shuti pushtupi carca. Chaica Efraín llacta ladollami carca. Absalonga reypa tucuilla churicunatami shuj jatun micuiman invitarca. 24 Absalonga rey Davidta ricungapaj rishpami cashna nirca: “Ñuca reylla llamacunapa milmatami rutujuni, ama shinagu cashpa quiquin y quiquinba sirvientecunapash ñucahuan shamupaichi” nircami. 25 Shinapash reyca cashnami nirca: “Na ñuca huahualla. Tucuicuna rijpica ñucanchita atindinaca canbaca dificilmi canga” nircami. Absalón cutin cutin nijujpipash reyca na ringapaj munarcachu. Pero reyca Absalondaca bendiciarcami. 26 Chaimi Absalonga Davidtaca cashna nirca: “Quiquin na shamushpaca por favor ñuca huauqui Amnonda ñucanchihuan cachamupai” nircami. Shina nijpimi reyca “¿imashpata paita cachachun munangui?” nishpa tapurca. 27 Absalón cutin cutin nijujpimi reyca Amnonda y paipa tucuilla churicunata cacharca.
28 Chai jipami Absalonga paipa sirvientecunataca cashna mandarca: “Pendiente canguichi. Amnón vinota ufiashcamanda machashca cajta ricushpaca ‘Amnonda atacaichi’ nishami. Shina nijpimi cangunaca paita huañuchina canguichi. Na manllanachu canguichi ñucami chaita rurachun mandajuni. Shinlli tucushpa na manllanachu canguichi” nircami. 29 Chaimi Absalonba sirvientecunaca Absalón mandashcashna Amnondaca huañuchirca. Chai ratomi reypa tucuilla churicunaca jatarishpa cada uno paicunapa mulapi tiarishpa pacajungapaj calparca. 30 Paicuna ñanda rinajujpimi Davidmanga cashna villarca: “Absalonga reypa tucuilla churicunatami huañuchishca. Nipipash na causaca quidarcachu” nishpami villarca. 31 Chaita uyashpami reyca jatarishpa, ninanda llaquirishpa paipa ropata liquirishpa alpapi siririrca. Y paipa sirvientecunapashmi ropata liquirishpa paipa ladopi shayarishpa quidarca.
32 Pero Davidpa huauqui Simeapa churi Jehonadabca Davidtaca cashnami nirca: “Ñuca reylla canba tucuilla churicunata huañuchishcataca ama cripanguichu. Amnonllami huañurca. Absalonmi Amnondaca huañuchichun mandarca. Absalonga Amnón paipa pani Tamarta humillashca punllamandapachami paitaca huañuchingapaj munajurca. 33 Ñuca reylla, ñuca amolla quiquinba tucuilla churicunata huañuchishca nishpa villashcataca ama cripanguichu.* Solo Amnonllami huañurca” nircami.
34 Chaicamanga Absalonga pacajungapami calpashcarca. Jipamanga llactata vigilashpa cuidaj jarica vichai ricushpami paipa huasha ladopi tiashca ñanda ashtaca gentecuna shamunajujta ricurca. Chai ñanga urcu ladopimi carca. 35 Chaimi Jehonadabca rey Davidtaca cashna nirca: “Ñuca amolla, ñuca nishcashnami quiquinba churicunaca tigramushca” nircami. 36 Chashna nishca jipallami rey Davidpa churicunaca ninanda huacashpa yaicurca. Rey Davidpash y paipa sirvientecunapashmi ninanda llaquirishpa huacanajurca. 37 Cutin Absalonga Guesur llactamanmi pacajungapaj rirca. Paica Amihud shuti runapa churi Talmái runapamanmi rirca. Davidca paipa churi huañushcamandami tauca punllacunata llaqui llaqui* carca. 38 Absalonga Guesur llactaman pacajungapaj rishpaca quimsa huatacunatami chaipi quidarca.
39 Tiempo jipami Davidca Amnón huañushcamandaca ñana llaquilla catircachu. Y Absalondaca ninandami ricungapaj munajurca.