2 Samuel
21 Davidpa punllacunapica quimsa huatacunatami yarjai tiempo tiarca. Chaimi Davidca Jehová Diosta tapurca. Shina tapujpimi Jehová Diosca cashna nirca: “Saulca gabaonita gentecunatami huañuchirca. Chaimandami Saulpash y paipa familiapash yahuarta jichashcamanda culpable can” nircami. 2 Chaimi rey Davidca gabaonita gentecunahuan parlangapaj paicunata cayarca. (Gabaonitacunaca na israelitacunachu carca. Gabaonitacunaca puchushca amorreo gentecunapuramandami carca. Israelitacunaca paicunata na huañuchinatami juramentushcarca. Pero Saulca israelitacunapurapi y Judá jatun familiapurapi gabaonitacuna causachun na munaimandami paicunata tucuchishpa saquingapaj munarca). 3 Davidca gabaonitacunataca cashnami nirca: “Ñucanchicuna pecadota rurashcamandaca ¿imashinata pagaita ushapani? Quiquinguna Jehová Diosta paipa llactata* bendiciachun nishpa mañachunga ¿imatata quiquingunamandaca ruraita ushapani?” nircami. 4 Shina nijpimi gabaonita gentecunaca cashna nirca: “Saúl y paipa familia imata rurashcamandaca platatapash ni orotapash na mañanajunchichu. Y Israel llactapica nipitapash na huañuchita ushanchichu” nircami. Chaimi Davidca “imata munashcata mañahuaichilla, ñucaca rurashallami” nircami. 5 Gabaonitacunaca rey Davidtaca cashnami nirca: “Chai jarica ñucanchi gentecunatami tucuchishpa saquirca. Paica Israel llactamanda tucuilla alpacunamandami ñucanchitaca por completo tucuchishpa saquingapaj munarca. 6 Chaimanda Saulpa 7 churicunata ñucanchiman entregai. Paicunataca huañuchishpami Guibeá llactapi, Jehová Diospa ñaupapi jatun racu caspicunapi* huarcushpa* saquishun. Chai llactapimi Jehová Diospa agllashca Saulca causan carca” nircami. Shina nijpimi rey Davidca “ñucami paicunataca entregasha” nirca.
7 Pero rey Davidca Mefibosettaca llaquimandami paicunamanga na entregarca. Porque Davidca Jehová Diospa ñaupapimi Saulpa churi Jonatanhuan shuj juramentota rurashcarca. Mefibosetca Jonatanba churi y Saulpa nietomi carca. 8 Rey Davidca Rizpá shuti huarmipa Armoní y Mefibóset shuti churicunatami agllarca. Paicunaca Rizpá shuti huarmi Saulhuan charishca churicunami carca. Rizpá shuti huarmica Ayá shuti runapa ushimi carca. Shinallata Davidca Mical* huarmipa 5 churicunatapashmi agllarca. Chai churicunaca Mical huarmi Adriel runahuan charishca churicunami carca. Micalca Saulpa ushimi carca. Cutin Adrielca Barzilái shuti meholatita runapa churimi carca. 9 Chai jipami Davidca paicunataca gabaonitacunaman entregarca. Gabaonitacunaca paicunata huañuchishpami paicunapa cuerpocunataca, urcupi Jehová Diospa ñaupapi jatun racu caspicunapi huarcushpa saquirca. Shinami chai 7 jaricunaca tucuilla huañurca. Paicunataca cosechana callari punllacunapimi huañuchirca. Cebadata cosechai tiempo callarijujpimi paicunataca huañuchirca. 10 Chai jipami Ayá shuti runapa ushi Rizpá shuti huarmica tieso tieso telata japishpa rumi jahuapi mandarca. Rizpá shuti huarmica punllapica angacuna y tutapica sacha animalcunapash huañushca cuerpocunata ama micuchunmi cuidajurca. Paica cosechai callarishca tiempomanda, huañushca cuerpocunapi cielomanda tamia urmamungacamanmi chaipi cuidashpa quidarca.
11 Davidmanga Ayá runapa ushi Rizpá shuti huarmi imata rurashcatami villarca. Rizpá shuti huarmica Saulpa chaishuj huarmimi* cashcarca. 12 Chaimandami Davidca Saulpa y paipa churi Jonatanba tullucunata mascangapaj rirca. Chai tullucunataca Jabés-Galaad llactamanda lidercunami* charinajurca. Paicunaca Bet-San llactapa plazamandami shuashcarca. Filisteocunaca Guilboa urcupi Saulta mishashca punllami chai plazapica Saulpa y Jonatanba cuerpocunataca huarcushpa saquishcarca. 13 Davidca Jabés-Galaad llactamandami Saulpa y paipa churi Jonatanba tullucunataca apamurca. Shinallata gabaonitacuna huañuchishca 7 jaricunapa tullucunatapash tandachichunmi mandarca. 14 Chai jipami Saulpa y paipa churi Jonatanba tullucunataca Benjamín jatun familiapa alpacunapi tiashca Zelá llactapi pambarca. Saulpa taita Quis shuti runata pambashca pushtupimi pambarca. Rey Davidpa mandashcata rurashcahuanmi llactapa favor israelitacuna roganajushcataca Taita Diosca uyarca.
15 Cutinmi filisteocunaca israelitacunahuan macanajungapaj callarirca. Chaimi Davidca paipa soldadocunahuan rishpa filisteocunahuan macanajurca. Shinapash Davidca shaijushcami sintiri callarirca. 16 Shinapimi Isbí-Benob shuti runaca Davidta huañuchingapaj munarca. Paica refaím shuti familiapuramandami carca. Paica 7 libra chaupita* pesaj bronce lanzata y shuj mushuj espadatami charijurca. 17 Shinapimi Zeruyá huarmipa churi Abisaica Davidta salvangapaj shamurca. Abisaica chai filisteotaca atacashpami huañuchirca. Rey Davidpa soldadocunaca paitaca cashna nishpami jurarca: “Macanajuicunamanga ñucanchihuanga ñana llujshinachu capangui. Porque si quiquin huañunguica Israel llactapa lamparata apaganshnami canga”* ninajurca.
18 Cai tucui pasashca jipami israelitacunaca Gob pushtupi filisteocunahuan cutin macanajui callarirca. Chai macanajuipica Sibecái shuti husatita runami Saf shuti runata huañuchirca. Saf runaca refaím shuti familiapuramandami carca.
19 Cutinmi Gob pushtupica israelitacunaca filisteocunahuan macanajurca. Jaaré-Oreguim shuti betlemita runapa churi Elhanán shuti runaca Goliat shuti guitita runatami huañuchirca. Goliatca shuj lanzatami charirca. Chai lanzapa caspica tejedorcuna utilizaj viga caspishnami jatun carca.
20 Shinallata cutinmi guerra tiarca. Chai guerraca Gat llactapimi tiarca. Chai llactapica shuj jatun jatun jarimi tiarca. Paica cada maquipica 6 dedocunata y cada chaquipica 6 dedocunatami charirca. Totalca 24 dedocunatami charirca. Chai jaripashmi refaím shuti familiapuramanda carca. 21 Chai jari israelitacunamanda burlarishpa catijujpimi Simeí runapa churi Jonatanga paitaca huañuchishpa saquirca. Simeica Davidpa huauquimi carca.
22 Chai chuscu jaricunaca Gat llactamanda refaím shuti familiapuramandami carca. Chai jaricunami Davidpa y paipa soldadocunapa maquipi huañurca.