2 Samuel
3 Saulpa familiaca* Davidpa familiahuanga* unaitami macanajushpa causanajurca. Gentecunaca Davidtaca ashtahuanmi apoyashpa catinajurca. Pero Saulpa familiataca ñana apoyashpa catinajurcachu.
2 Chai tiempocunapica Davidca huaquin churicunatami Hebrón llactapica charirca. Paipa primer churica Amnón shutimi carca. Paipa mamaca Jezreel llactamanda Ahinoam shuti huarmimi carca. 3 Segundo churica Kileab shutimi carca. Paipa mamaca Abigaíl shuti huarmimi carca. Abigailca huañushca Nabal shuti carmelita runapa huarmimi cashcarca. Tercer churica Absalón shutimi carca. Paipa mamaca Maacá shuti huarmimi carca. Maacá huarmica Guesur llactapa rey Talmái shuti runapa ushimi carca. 4 Cuarto churica Adonías shutimi carca. Paipa mamaca Haguit shuti huarmimi carca. Quinto churica Sefatías shutimi carca. Paipa mamaca Abital shuti huarmimi carca. 5 Y Davidpa sexto churica Itream shutimi carca. Paipa mamaca Eglá shuti huarmimi carca. Chai churicunatami Davidca Hebrón llactapi charirca.
6 Saulpa familiaca Davidpa familiahuanga macanajushpami catinajurca. Chaicamanga Abnerca Saulpa familiapica shuj alipacha lidermi tucujurca. 7 Saulca Rizpá shuti shuj huarmitami* charishcarca. Rizpá huarmica Ayá shuti runapa ushimi carca. Shuj punllaca Is-Bóset shuti runaca Abnertaca “¿imashpata ñuca taitapa huarmihuan pacta puñurcangui?” nishpami tapurca. 8 Is-Bóset shina nijpimi Abnerca ninanda culirashpa cashna nirca: “¿Ñucaca Judá jatun familiapi yanga alcushnachu* cashcani? Cunan punllacamanmi canba taita Saulpa familiata, huauquicunata y amigocunataca ninanda juyashcata* ricuchishcani. Candaca Davidpa maquipi entregashpaca na traicionashcanichu. ¿Shinapashchu shuj huarmihuan pacta puñuscamandalla reclamahuajungui? 9 Jehová Dios Davidman jurashcata pactarichun ñuca na Davidta ayudajpica Taita Diosllata llaquinaita castigahuachun. 10 Taita Diosca Saulpa familia gobernanata quichushpami Israel llactapi y Judá jatun familiata David gobernachun churasha nishpa jurarca. Dan llactamanda Beer-Seba llactacaman mandanga nishpami jurarca” nircami. 11 Shina nijpimi Is-Bósetca Abnerta manllaimandaca ñana imatapash nircachu.
12 Chai jipami Abnerca Davidtaca “¿nachu cai llactaca ñucapa canyari?” nichunmi enseguida mensajerocunataca cacharca. Shinallata “ñucahuan shuj tratota* rurajpica tucuilla Israel llactamanda gentecuna canba lado tucuchunmi ñuca usharishcata rurasha”* nichunbashmi cacharca. 13 Shina nijpimi Davidca Abnertaca cashna nirca: “Ari canhuanga shuj tratota rurashallami. Pero ñucata ricungapaj shamushpaca Saulpa ushi Micalta apamushpa shamungui. Chaitallami candaca mañani” nircami. 14 Chai jipami Davidca Saulpa churi Is-Bosetman cashna nichun mensajerocunata cacharca: “Ñuca huarmi Micalta cuhuai. Porque paihuan cazarangapami 100 filisteocunata huañuchishcata ricuchij señalta* apamurcani” nichunmi cacharca. 15 Chaimi Is-Bosetca Paltiel runapa huarmi Micalta quichumuchun cacharca. Paltielca Lais runapa churimi carca. 16 Paltielca paipa huarmi Micaltaca Bahurim pueblocamanmi huacai huacai catishpa rijurca. Chaimi Abnerca Paltieltaca “huasiman tigrai” nishpa mandarca. Shina nijpimi paica tigrarca.
17 Chaicamanga Abnerca Israel llactata ñaupaman pushaj jaricunamanga* cashna nishpami cacharca: “Ña unaitami cangunaca David cangunapa rey cachun munanajunguichi. 18 Shina cashpaca cunanmi cangunapa rey cachun churai ushanguichi. Porque Jehová Diosca Davidtaca cashnami nirca: ‘David canga ñucapa sirvijmi cangui. Canhuanmi israelitacunataca filisteocunapa maquimanda y paicunapa tucuilla enemigocunamandaca salvasha’ nishpami Davidmanga nirca” nircami. 19 Chai jipami Abnerca Benjamín jatun familiamanda gentecunahuan parlarca. Shinallata Hebrón llactapi Davidhuan sololla parlangapapashmi rirca. Chaipimi israelitacuna y Benjamín jatun familiamanda gentecuna imapi de acuerdo quidashcata villagrijurca.
20 Abnerca 20 soldadocunahuanmi Davidta ricungapaj Hebrón llactaman rirca. Chaimi Davidca Abnerman y paihuan cashca soldadocunaman shuj jatun micuita rurarca. 21 Chai jipami Abnerca Davidtaca cashna nirca: “Ñuca amolla, ñuca reylla tucuilla israelitacuna quiquinhuan shuj tratota rurachun paicunata canba ñaupapi tandachingapaj richun saquihuai. Shinami quiquin munashcashna tucuilla Israel llactata gobernai ushangui” nircami. Shina nijpimi Davidca Abnertaca richun saquirca. Chaimi Abnerca tranquilo ali rircalla.
22 Shinapimi Joabca Davidpa soldadocunandi shuj pushtupi macanajushpa tigramunajurca. Paicunaca macanajuipi mishashpa quichushca ashtaca cosascunatami apamushpa tigramunajurca. Shinapash Abnerca David paita tranquilo ali richun saquishcamandami ñana Davidhuan Hebrón llactapi carca. 23 Joab tucuilla soldadocunandi chayajhuanmi Joabtaca cashna ninajurca: “Ner shuti runapa churi Abnerca rey Davidta ricungapami shamurca. Pero David richun saquijpimi Abnerca tranquilo ali rircalla” ninajurcami. 24 Chaimi Joabca rey Davidpaman yaicushpa cashna nirca: “¿Imatata rurashcanguiyari? Abnerca canda ricungapami shamushca. Pero canga imatapash na rurashpami richun saquishcangui. ¿Imashpata shina rurarcanguiyari? 25 Canga Ner shuti runapa churi Abner imashna cajtaca alimi yachangui. Paica canda umachingapami shamushca. Paica can imatalla rurajta, maimanlla rijta yachangapami shamushca” nircami.
26 Shina nishca jipami Joabca Davidta saquishpa Abnerta mascachun mensajerocunata cacharca. Chaimi paicunaca Sirá shuti pozomanda Abnertaca tigrachimurca. Shinapash Davidca shina pasashcataca nimata na yachaj chayarcachu. 27 Hebrón llactaman Abner tigrajpimi Joabca llactapa pungu ucu ladoman paihuanlla parlangapaj Abnertaca aparca. Ña chaipi cashpami Joabca Abnertaca espadahuan vijsapi clavashpa huañuchirca. Joabca, Abner paipa huauqui Asahelta huañuchishcamandami shina rurarca. 28 Jipaman ima pasashcata David yachaj chayashpaca cashnami nirca: “Ner runapa churi Abnerta huañuchishcamandaca ñucapash y ñucapa pueblopash Jehová Diospa ñaupapica na culpable canchichu. 29 Chaipa randica Joab y paipa taitapa tucuilla familiapash castigai tucuchun. Chaimanda Joabpa familiapurapica yura mapa yacu llujshijuj unguita* charij shuj jari siempre tiachun. Na cashpaca lepra unguita charichun o lisiado* cachun. O espadahuan huañuchi tucuchun o yarjai pasachun” nircami. 30 Joab y paipa huauqui Abisaica paicunapa huauqui Asahelta huañuchishcamandami Abnertaca huañuchirca. Abnerca Gabaón llactapi macanajuipimi Asaheltaca huañuchishcarca.
31 Davidca Joabta y paihuan cashca tucuilla gentecunataca cashnami nirca: “Ropata liquirishpa, tieso tieso telata* churarishpa Abnermanda huacaichi” nircami. Rey Davidpashmi huañushcata apanajuj camillata catishpa rijurca. 32 Abnertaca Hebrón llactapimi pambarca. Rey Davidca Abnerta pambashca pushtupimi caparishpa ninanda huacai callarirca. Y tucui gentecunapashmi huacai callarirca. 33 Chai jipami rey Davidca Abnermandaca cashna candai callarirca:
“¿Imashpata Abnerca shuj tontoshna huañuna tucurca?
34 Canba maquicunaca na huatashcachu carca.
Canba chaquicunapash na cadenashcachu* carca.
Nalita ruraj gentecuna huañuchijpishnami huañuchi tucurcangui” nishpami candarca.
Chai ratomi tucui gentecunaca Abnermandaca cutin huacai callarirca.
35 Chai jipaca tucuilla gentecunaca Davidta cushichingapaj nishpami nara chishayajpillata micunaguta paiman apamurca. Pero Davidca cashna nishpami jurarca: “Indi nara huashajujpillata tandata o imatapash ñuca micujpica Taita Diosllata llaquinaita castigahuachun” nircami. 36 Tucuilla gentecunami ima pasajushcata ricushpaca rey imata rurajushcahuanga de acuerdo carca. Rey imata rurajpipash gentecunapaca alimi carca. Shinallatami caipash paicunapaca ali carca. 37 Chaita ricushpami Judá jatun familiapash y tucuilla israelitacunapash Ner runapa churi Abner huañushcamandaca David na culpable cashcata cuenta japirca. 38 Chaimi rey Davidca paipa sirvientecunataca cashna nirca: “Cunan punlla Israel llactapi shuj líder y importante jari huañushcataca ¿nachu yachanguichi? 39 Ñucaca rey tucungapaj agllai tucushca cashpapash cai jaricunapa contra imatapash rurangapaca fuerzataca na charinichu. Zeruyá huarmipa churicunaca millai millai nali jaricunami can. Nalita rurajcunataca Jehová Diosllata castigachun” nircami.