2 Samuel
16 Olivos shuti lomamanda David urai rijujpimi Mefibosetpa sirviente Zibá shuti runaca shuyajurca. Zibá runaca ishcai burrocunahuanmi shuyajurca. Burrocuna jahuapica 200 tandacunata, chaquishca uvashuan rurashca 100 tortacunata, higoshuan y dátiles nishcahuan rurashca 100 tortacunata y shuj jatun jarra vinotapash apachishcami shuyajurca. 2 Chaimi rey Davidca Zibá runataca “¿imashpata caicunataca apamurcangui?” nishpa tapurca. Shina tapujpimi Zibá runaca cashna nirca: “Ñuca reylla, burrocunaca quiquinba familia tiarishpa richunmi can. Tandacuna y frutacunaca gentecuna micuchunmi can. Cutin vinoca desiertota rinajushpa shaijushcacunapami can” nircami. 3 Rey Davidca paitaca “canba amopa nieto* Mefibosetca ¿maipita canyari?” nishpami tapurca. Chaimi Zibá runaca reytaca cashna nirca: “Mefibosetca ‘cunanmi israelitacunaca ñuca abuelopa* gobiernotaca tigrachihuanga’ nishpami Jerusalenbi quidarca” nircami. 4 Chaimi rey Davidca Zibá runataca “Mefibóset tucui ima charishcaca canbami can” nirca. Shina nijpimi Zibá runaca cashna nirca: “Ñuca amolla, ñuca reylla quiquinba ñaupapimi cumuripani. Quiquinba ñaupapi siempre ali ricurishpami ali capaiman” nircami.
5 Rey David Bahurim puebloman chayajpica Saulpa familiamanda Simeí shuti runami llujshirca. Paica Guerá shuti runapa churimi carca. Simeí runaca rey Davidtaca caparishpami maldicijurca. 6 Simeica Davidta, paipa tucuilla sirvientecunata shinallata rey Davidpa ali ladopi y lluqui ladopi cashca alipacha shinlli soldadocunata y tucuillacunatami rumihuan pigajurca. 7 Simeica Davidtaca cashna nishpami maldicijurca: “Huañuchidor,* imapapash na sirvijmi cangui. Caimanda rishpa siri. 8 Saulpa familiata huañuchishcamanda y Saulpa randi can rey tucushcamandami Jehová Diosca candaca castigajun. Chaimandami Jehová Diosca canba churi Absalonda gobernachun churashca. Canga huañuchidor* cashcamandami cunanga llaqui apajungui” nircami.
9 Chaimi Zeruyá huarmipa churi Abisaica rey Davidtaca cashna nirca: “Ñuca amolla, ñuca reylla huañushca alcushna cai runaca ima nishpata quiquindaca shina maldicijuna cashcayari. Paipa umata cuchushpa saquingapaj richun saquihuai” nircami. 10 Chaimi rey Davidca cashna nirca: “Zeruyá huarmipa churicuna, caica cangunahuan imapash ricunataca na charinllu. Jehová Diosmi paitaca ‘Davidta maldici’ nishca. Chaimi ama maldicijuichu nitaca ¿pita nita ushaganyari? Shinaca ñucata maldicihuachun saquichilla” nircami. 11 Shinallata Davidca Abisaita y paipa tucuilla sirvientecunataca cashnami nirca: “Si ñuca churi, ñuca propio churillata ñucata huañuchingapaj munajujpica maitashi shuj benjaminitaca na chaita rurangapaj munangayari. Jehová Diosmi ñucata maldicichun paitaca nishca. Shinaca maldicihuachun saquichilla. 12 Talvez Jehová Diosca ñuca sufrijushcataca ricungami. Cunan punlla Simeí maldicihuajushcapa randica Jehová Diosca bendiciahuangapashchari” nircami. 13 Chai jipami Davidpash y paipa soldadocunapash ñanda catishpa rinajurca. Cutin Simeica urcu ladotami catiria rijurca. Paica Davidtaca maldicishpa, rumicunahuan pigashpa y alpatapash shitashpami rijurca.
14 Rey Davidpash y paihuan cashca tucuilla gentecunapash paicuna chayana pushtumanga shaijushcami chayarca. Chaipimi paicunaca samangapaj shayarirca.
15 Chaicamanga Absalonga paita apoyaj tucuilla israelitacunahuanmi Jerusalén llactaman chayarca. Ahitofelpashmi Absalonhuan carca. 16 Davidpa amigo Husái shuti arkita runaca Absalón cashca pushtumanmi yaicurca. Chaipimi Husaica “reyca bendiciai tucushca cachun, reyca bendiciai tucushca cachun” nishpa caparijurca. 17 Chaimi Absalonga Husaitaca cashna tapurca: “¿Shinachu canba amigotaca ninanda juyashcata* ricuchingui? ¿Imashpata canba amigohuanga na rircanguiyari?” nishpami tapurca. 18 Shina nijpimi Husaica Absalondaca cashna nirca: “Ñucaca quiquinhuanmi quidasha. Ñucaca Jehová Diospash, cai gentecunapash y tucuilla israelitacunapash agllashca personapa partemi capani. 19 Cutinmi nipani, ñuca amigopa churita na sirvishpaca ¿pitata sirvishayari? Quiquinba taitata sirvishcashnallatami quiquindapash sirvisha” nircami.
20 Chai jipami Absalonga Ahitofeltaca “¿imatata rurashun? nihuai” nirca. 21 Shina tapujpimi Ahitofelca Absalondaca cashna nirca: “Quiquinba taitaca huasita* cuidachunga paipa chaishuj huarmicunatami* saquirca. Chai huarmicunahuan pacta puñui.* Shinami tucuilla israelitacunaca quiquinba taita quiquinda na ricunayachijta yachanga. Shinallata quiquinda apoyajcunapash quiquindaca ashtahuanmi apoyanga” nircami. 22 Shina nijpimi huasi terrazapi Absalonba shuj carpa huasita shayachirca. Chaipimi Absalonga tucuilla israelitacuna ricujta paipa taitapa chaishuj huarmicunahuan* pacta puñurca.*
23 Chai tiempopica Ahitofelpa consejocunataca Taita Diospa* consejocunatashnami ricun carca. Davidpash, Absalonbashmi Ahitofelpa consejocunataca shina ricun carca.