2 Samuel
20 Problemata rurador Seba shuti runami tiarca. Paica Bicrí shuti benjaminita runapa churimi carca. Seba runaca cachota huacachishpami cashna nirca: “Ñucanchica Davidpa familiapuramandaca na canchichu. Jesé runapa churica ñucanchimanga nimata na cungachu. Shinaca israelitacunalla, cada uno ñucanchi dioscunata adorangapaj* rishunchi” nircami. 2 Chaimandami Israel llactamanda tucuilla jaricunaca Davidta catinata saquishpa Bicrí runapa churi Seba runata catishpa rirca. Pero Judá jatun familiamanda jaricunaca paicunapa rey Davidta na saquishpami Río Jordanmanda Jerusalén llactacaman cumbashpa rirca.
3 Rey Davidca Jerusalén llactapi paipa huasiman* chayashpaca paipa huasita cuidachun saquishca paipa chaishuj 10 huarmicunataca* shuj huasipimi churarca. Paicunata cuidachunga guardiacunatami churarca. Chai huarmicuna micunata charichunmi Davidca ricurian carca. Pero Davidca chai huarmicunahuanga cutinga ñana puñurcachu.* Chai huarmicunaca huañungacamanmi chai huasipi vichashca carca. Paicunaca cusa causajpipash viuda huarmicunashnami causanajurca.
4 Rey Davidca Amasá runataca cashnami nirca: “Judá jatun familiamanda jaricunataca quimsa punllahuan caipi presentarichun cayai. Canbashmi shamuna cangui” nircami. 5 Shina nijpimi Amasá runaca Judá jatun familiataca tandanajuchun cayangapaj rirca. Pero rey shamuchun nishca tiempopica paica na shamurcachu. 6 Chaimi Davidca Abisaitaca cashna nirca: “Bicrí runapa churi Seba runaca Absalón llaquichishcatapash yalimi ñucanchitaca llaquichita ushan. Ñuca soldadocunata apashpa Seba runata catiria ri. Denoca jatun pircacunahuan muyundi pircashca llactacunaman chayashpami ñucanchimanda pacajunman” nircami. 7 Shinami Joabpa soldadocuna, keretitacuna, peletitatacuna y tucui alipacha shinlli soldadocuna paitaca* catishpa rirca. Paicunaca Jerusalén llactamanda llujshishpami Bicrí runapa churi Seba runata mascashpa catiria rirca. 8 Paicuna Gabaón llactapi tiashca jatun rumi ladoman chayajpica Amasá runami paicunata tuparingapaj shamurca. Joabca macanajungapaj ropata churajushca, cinturaspipash shuj espadata huatarishcami carca. Pero Amasá runapaman quimirijpimi Joabpa espadaca urmarca.
9 Joabca Amasataca “ñuca huauquilla ¿alillachu cangui?” nishpami tapurca. Chai jipaca mejillapi muchangapashnami Joabca paipa ali lado maquihuan Amasataca barbasmanda japirca. 10 Joab paipa maquipi espadata charijujpipash Amasaca na pendiente carcachu. Shinapimi Joabca Amasapa vijsapi espadata clavarca. Chaimi paipa chunllulicuna llujshishpa alpaman urmarca. Amasata huañuchingapaca shuj viajetallami espadataca clavarca. Cutin clavanaca ñana minishtirircachu. Chai jipami Joabca paipa huauqui Abisaihuan Bicrí runapa churi Seba runata catiria rirca.
11 Joabpa shuj soldadoca Amasa runapa cuerpo ladopi shayarishpami cashna nirca: “Joabpa lado tucushcacuna y Davidta apoyajcunaca Joabta catichi” nircami. 12 Chaicamanga Amasaca ñan chaupipimi paipa yahuarpillata caiman chaiman ninanda cuyurijurca. Tucuicuna chai pushtupi shayarijta ricushpami chai soldadoca Amasataca ñanmanda anchuchishpa pambapi saquirca. Pero Amasá cashca pushtuta tucui yalijcuna shayarijta ricushpami chai soldadoca Amasapa cuerpota ropahuan tapashpa saquirca. 13 Amasapa cuerpota ñanmanda anchuchishca jipami Bicrí runapa churi Sebata catiria ringapaj tucuilla soldadocunaca Joabta catishpa rirca.
14 Seba runaca Israel llactapa tucuilla jatun familiacunapa alpacunatami yalirca. Shinami paica Abel-Bet-Maacá llactaman chayarca. Shinallata bicrita gentecunaca tandanajushpami Abel-Bet-Maacá llactaman Seba runata catishpa yaicurca.
15 Joabca paipa soldadocunandi* Abel-Bet-Maacá llactaman chayashpaca llacta muyundipimi shayarirca. Chai llactaca jatun pircacunahuan muyundi pircashca llactami carca. Chaimi chai llactaman yaicushpa atacangapaca alpataca pirca ladoman mundunarca. Shinallata Joabpa soldadocunaca chai pircacunata urmachingapami pirca ucuta allai callarirca. 16 Shinapimi ali yachajushca shuj huarmica llactamandaca cashna caparirca: “Uyahuaichi uyahuaichi. Joabhuan parlangapami munapani. Paitaca shamuchun nipaichi por favor” nircami. 17 Chaimi Joab quimirijpica chai huarmica “¿quiquinllu Joab cangui?” nishpa tapurca. Shina tapujpimi Joabca “ari ñucami cani” nirca. Chaimi chai huarmica “ñuca amolla ñuca imata nigrijujta uyahuai” nirca. Shina nijpimi paica “shinaca parlailla” nirca. 18 Chai huarmica cashnami nirca: “Pundacunaca siempremi ‘gentecunaca imapash problemata solucionangapaj munashpaca Abel llactapimi consejota mañana can’ ninmi carca. 19 Ñucaca Israel llactamanda tranquilo, alita ruraj gentecunatami representani. ¿Imashpata Jehová Diospa llactata* tucuchishpa saquingapaj* munajungui? Quiquinga Israel llactapi shuj mama cuenda caj llactatami tucuchingapaj munajungui” nircami. 20 Shinapash Joabca cashnami nirca: “Cai llactata tucuchishpa saquinataca pensaitallapash na pensashcanichu. 21 Chaitaca na rurangapaj munanichu. Es que Efraín urcucunamanda Seba shuti runami rey Davidpa contra tucushca.* Paica Bicrí runapa churimi can. Chai runatalla entregahuaichi. Chai jipaca cai llactamandaca rishallami” nircami. Shina nijpimi chai huarmica Joabtaca cashna nirca: “Chai runapa umataca pirca jahuatami shitashpa cushun” nircami.
22 Shina nishca jipami ali yachajushca huarmica enseguida llactamanda gentecunahuan parlangapaj rirca. Chaimi paicunaca Bicrí runapa churi Seba runapa umata cuchushpa Joabman shitashpa curca. Chai jipami Joabca cachota tocarca. Shinami soldadocunaca chai llactamanda rishpa cada uno paipa huasiman tigrarca. Cutin Joabca Jerusalén llactaman, rey cashca pushtumanmi tigrarca.
23 Joabca tucuilla israelita soldadocunatami mandajurca. Cutin Jehoiadá runapa churi Benaya runaca keretitacunata y peletitacunatami mandajurca. 24 Adoram runaca rey David paipa trabajachun churashca gentecunatami mandajurca. Cutin Ahilud runapa churi Jehosafatca llactapi imacunalla pasajta escribijmi carca. 25 Sevá runaca secretariomi carca. Y Sadoc y Abiatar runacunaca sacerdotecunami carca. 26 Irá shuti jairita runapashmi Davidpa funcionario principal* tucurca.