Ester
3 Chai tucui cosascuna pasashca jipami rey Asueroca, Hamedata shuti runapa churi Hamán runamanga shuj importante puestota curca. Tucui chaishuj principecunamandapash yalimi Hamán runamanga ashtahuan autoridadta curca. Hamedataca agaguita runami carca. 2 Reypa palacio pungupi cashca tucuilla sirvientecunaca Hamán runapa ñaupapimi cungurishpa cumurin carca. Chaita rurachun rey Asuero mandashcamandami shina ruranajurca. Shinapash Mardoqueoca Hamán runapa ñaupapi cungurishpa cumuringapaca nimamanda na munarcachu. 3 Chaimandami reypa palacio pungupi cashca sirvientecunaca, Mardoqueotaca cashna nishpa tapunajurca: “¿Imashpata reypa mandashcataca na cazungui?” ninajurcami. 4 Tucui punllacunami chashnallata tapunajurca. Shinapash Mardoqueoca na cazurcachu. Ashtahuangarin paicunamanga, Mardoqueoca judío cashcatami villashcarca. Chaimandami paicunaca Mardoqueo shina cashpa catichun saquijta o na saquijta ricungapaca, Hamán runamanga tucuita villarca.
5 Chaimandami Hamán runaca paipa ñaupapi Mardoqueo na cungurishpa cumuringapaj munashcamandaca, paihuanga ninanda culirarca. 6 Hamán runamanga, Mardoqueo judío cashcatami villashcarca. Chaimandami Mardoqueotalla huañuchingapaca* ñana munarca. Sino Asuero mandajushca tucuilla llactacunapi tiaj judiocunatapashmi tucuchingapaj munarca. Hamanga Mardoqueopa llactamanda tucuilla gentecunata tucuchingapami munarca.
7 Judiocunata ima punllapi, ima quillapi tucuchinata yachangapaca Hamán runapa ñaupapimi pur nishca sorteota ruranajurca. Chaitaca rey Asuero 12 huatacunata mandajujpi primer quillapimi ruranajurca. Primer quillaca nisán* quillami carca. Chai sorteota rurajpica 12 quillapimi urmarca. Chai quillaca adar* shuti quillami carca. 8 Chai jipami Hamanga rey Asuerotaca cashna nirca: “Quiquin mandajushca tucuilla provinciacunapica caiman chaiman regarishca shuj llactamanda gentecunami tian. Chai llactapa leycunaca shuj llactacunapa leycunahuanga diferentemi can. Paicunaca reypa leycunataca na cazunllu. Chaimandami paicuna causashpa catichunga na saquina capangui. 9 Reypa ali cajpica, chai judiocunata tucuchishpa saquingapaca shuj leytami escribichina capangui. Ñucaca reypa tesoreriapi churachunmi funcionariocunamanga 342 mil kilos* de platata cupasha”* nircami.
10 Chaimi reyca paipa maquimanda sellana anillota llujchishpa Hamán runamanga curca. Hamanga judiocunapa contrami carca. Paica Hamedata runapa churimi carca. Hamedataca agaguitami carca. 11 Chai jipami reyca, Hamán runataca cashna nirca: “Can cusha nishca platapash, llactamanda gentecunapash cunanga canbami can. Paicunahuanga can munashcata rurailla” nircami. 12 Chaimi primer quillapa punlla 13pica reypa secretariocunata cayarca. Paicunami Hamán imata mandashcataca reypa representante sátrapa* runacunaman, provinciacunamanda gobernadorcunaman y cada pueblomanda principecunamanbash escribirca. Cada provinciapi imasha escribin cashcashnallatami escribirca. Y cada llactamanda gentecuna parlashca idiomapimi escribirca. Rey Asueropa shutipimi tucuita escribirca. Shinallata reypa sellota churana anillohuanmi sellarca.
13 Chai jipami cartacunataca mensajerocunahuan reypa tucuilla provinciacunaman cacharca. Chai cartacunapica, tucuilla judiocunata jovengunamanda callarishpa mayorcunata, huarmicunata, huahuacunatapash huañuchishpa tucuchitapacha tucuchichunmi mandajurca. Shinallata judiocunapa tucuilla charishcacunatapash dueñoyachunmi mandajurca. Chaitaca shuj punllapilla rurachunmi mandajurca. Chaitaca quilla 12pa, punlla 13pimi rurana carca. Quilla 12ca adar shuti quillami can. 14 Chai cartacunapi nishcacunaca, tucuilla provinciacunapimi shuj ley tucuna carca. Y chai punllapa tucuilla llactacunamanda gentecuna listo cachunmi leypi imata nijushcataca villachina carca. 15 Mensajerocunaca rey mandajpimi chai rato llujshirca. Chai leytaca palacio de Susapimi rurarca. Chai jipami reypash, Hamán runapash ufiangapaj tiarirca. Chaicamanga Susa llactapi gentecunaca na atinashpami ninanda manllarishpa musparinajurca.