Ester
4 Ima pasajushcataca tucuitami Mardoqueoca yachaj chayarca. Chaimi paipa ropata liquishpa shuj tieso tieso telata* churajurca. Shinallata uchufatapashmi talirirca. Chai jipaca ninanda llaquirishpa caparishpami llactataca purijurca. 2 Mardoqueoca reypa palacio pungucamanllami chayarca. Porque tieso tieso telata churajuriaca, pipash na chai pungutaca yalita ushanllu carca. 3 Reypa orden y paipa leypash tucui provinciacunamanmi chayajurca. Chaimandami judiocunaca ninandapacha llaquirishpa,* imatapash na micushpa ayunanajurca.* Shinallata ushashcata caparishpami huacanajurca. Ashtacacunami tieso tieso telapi y uchufa jahuapipash siririnajurca. 4 Esterpa sirvientacuna y sirvientecunapash* ima pasajushcatami reina Estermanga villanajurca. Chaimi paica ninanda preocuparishpa Mardoqueomanga ropata cacharca. Tieso tieso telata churajushcata llujchishpa, pai cachashca ropata churajuchun munaimandami shina rurarca. Shinapash Mardoqueoca na chasquircachu. 5 Chai jipami Esterca paipa sirviente* Hatac runata cayarca. Hatac runataca Esterta sirvichunmi reyca churashcarca. Esterca ima pasajushcata Mardoqueota tapuchunmi, Hatac runataca cacharca.
6 Chaimi Hatac runaca llactapa plazapi Mardoqueota mascangapaj rirca. Chai plazaca, reypa palacio pungu frentepimi carca. 7 Mardoqueoca ima pasajushcataca tucuitami villarca. Shinallata judiocunata huañuchishpa saquichun, Hamán runa mashna culquitapacha reyman* ofrecishcatapashmi villarca. 8 Mardoqueoca Susa llactapi llujshishca leypa copiatapashmi Hatac runamanga curca. Chai leypica judiocunata huañuchishpa tucuchichunmi mandajurca. Hatac runaca chai copiataca Esterman ricuchishpami explicaitapash explicana carca. Hatac runaca caitapashmi Estermanga nina carca: ‘Mardoqueoca caitapashmi nin, “reypa ñaupaman rishpami canba llactata llaquishpa tratachun reytaca rogana cangui. Shina rurajpimi na huañushun”’ ninmi.
9 Hatac runaca Esterpaman tigrashpami Mardoqueo ima nishcata villarca. 10 Chaimi Esterca, Mardoqueoman cashna nichun Hatac runataca cacharca: 11 “Maijan jari cashpa o huarmi cashpapash, reypa patio ucuman rey na cayajpita yaicushpaca huañunami can. Chai ley tiashcataca tucuilla reypa sirvientecunapash y reypa provinciacunamanda gentecunapashmi yachan. Rey paipa mandana oro vara caspita chutajpillami perdonai tucuna can. Y reyca ña 30 punllacunatami ñucataca na cayahuashca” nichunmi cacharca.
12 Ester ima nishcata Mardoqueo yachashpaca, 13 paica Esterta cashna nipai nichunmi cacharca: “Chaishuj judiocuna huañuchi tucujpica, canga reypa palaciopi cashcamandalla salvarisha yashpaca na pensanachu cangui. 14 Pero si cunan horas upalla quidanguica, judiocunataca pipash ayudangami y salvaitapashmi salvanga. Pero canbash y canba taitapa familiapash huañunguichimi. ¿Nacha cashna horascunapi ayudangapaj, canga reina tucurcangui?” nircami.
15 Chaimi Esterca Mardoqueotaca cashna contestarca: 16 “Shinaca Susa llactapi tucuilla judiocunata tandachishpa imagutapash na micushpa ñucamanda ayunaichi.* Quimsa punllata y quimsa tutatami imagutapash na micushpa, nimatapash na ufiana canguichi. Ñucapash y ñucapa sirvientacunapash imagutapash na micushpami ayunagrinchi. Chai jipaca aunque leypi prohibido cajpipashmi, reypa ñaupapica presentarisha. Huañuna cashpapash huañushallami” nircami. 17 Shina nijpimi Mardoqueoca, Ester imata mandashcata tucuita rurangapaj rirca.