Ester
6 Chai tutaca reyca na puñuita ushajurcachu.* Chaimi chai tiempocunapi ima pasajushcata escribishca librota apamushpa, paiman liichun mandarca. 2 Chai libropica Mardoqueo runagu, Bigtana y Teres shuti funcionariocunata denunciashcatami escribishca tiajurca. Cai ishcandi funcionariocunaca reypa huasipi trabajaj porterocunami carca. Paicunaca rey Asuerota huañuchingapami* parlarinajushca carca. 3 Chaita uyashpami reyca cashna nirca: “Mardoqueo chaita rurashcamanda paita agradicishcata ricuchingapaca ¿imatata rurashcanchi?” nishpami tapurca. Chaimi paipa ayudante personalcunaca, “paimandaca imagutapash na rurashcanchichu” nishpami contestarca.
4 Chai jipami reyca: “Patiopica ¿pita can?” nishpa tapurca. Reypa huasi* canlla patiomanga Hamán runami yaicushca carca. Paica Mardoqueota jatun racu caspipi* huarcuchun mañangapami chaipi cashcarca. Porque Hamán runaca Mardoqueota racu caspipi huarcungapami racu caspita shayachichun ña mandashca cashcarca. 5 Reypa ayudantecunaca reytaca: “Patiopica Hamán runami can” nishpami contestarca. Chaimi reyca, “yaicumui nigrichi” nirca.
6 Hamán yaicujpica reyca cashnami nirca: “Shuj runata agradicishcata ricuchingapaca reyca ¿imatashi rurana can?” nishpami tapurca. Chaimi Hamanga pensarirca:* “¿Reyca pitata ashtahuan agradicingapaca munajungayari? Ñucatallatami agradicingapaca munajunga” nishpami pensarirca. 7 Chaimi Hamanga reytaca cashna nirca: “Rey pitapash agradicishcata ricuchingapaj munashpaca, 8 rey churajuna ropata apamuchun y rey ocupaj caballocunamanda shuj caballota apamuchun. Chai caballoca umapi adornocunata churajushcami cana can. 9 Reypa ashtahuan importante principecunamanda shuj principemi ropata y caballotaca segurana can. Shinallata rey agradicishcata ricuchingapaj munashca runataca, reypa ropatami churachina can. Shinallata tucuicuna ricujtami paitaca caballopi tiachishpa llactapa plazata pushana can. Ashtahuanbash paipa ñaupapica cashna nishpami caparina can: ‘Rey agradicingapaj munashca runataca cashnami tratana can’ nishpami caparishpa rina can” nircami. 10 Chashna nijpimi reyca chai rato Hamán runataca cashna mandarca: “Cai rato ropata y caballotapash mascagri. Can imata nishcataca reypa palacio pungupi tiajuj Mardoqueo judiotami rurana cangui. Can nishcashnapacha tucuita rurai” nircami.
11 Chaimi Hamán runaca ropatapash y caballotapash mascangapaj rirca. Mardoqueoman ropata churachishpa, caballopi tiachishpami llactapa plazaman aparca. Shinallata Mardoqueopa ñaupapimi cashna nishpa caparirca: “Rey agradicingapaj munashca runataca cashnami tratana can” nishpami caparijurca. 12 Chai jipaca Mardoqueo runaguca reypa palacio pungumanmi cutin tigrarca. Cutin Hamán runaca llaqui llaqui, pingai tucushpa, umatapash taparishpami uchalla paipa huasiman rirca. 13 Hamán runaca paipa huarmi Zeresman y paipa tucuilla amigocunamanbashmi ima pasashcataca villarca. Chaimi Hamanba consejerocunapash* y Zerespash cashna ninajurca: “Mardoqueoca judío cashpapashmi canda yali ashtahuan autoridadta charin. Paitaca na mishai ushanguichu. Maimandami paipa ñaupapica mishai tucungui” ninajurcami.
14 Paicuna Hamanhuan parlanajungacamanllatami reypa palaciopi trabajaj funcionariocunaca chayamurca. Paicunaca chai ratomi, Hamán runataca Ester ruragrijushca jatun micuimanga apashpa rirca.