Ester
1 Cai historiaca rey Asueropa* tiempopimi pasarca. Cai rey Asueromi India llactamanda Etiopía* llactacaman 127 provinciacunata mandajurca. 2 Chai punllacunapica, rey Asueroca Susa* llactapa palaciomandami* mandajurca. 3 Rey Asueroca, ña quimsa huatacunata mandajushpami paipa tucui principecunaman y paipa sirvientecunamanbash shuj jatun micuita rurarca. Paipa ñaupapica, Persia y Media llactacunamanda ejercitopa comandantecuna, importante jaricuna y provinciacunamanda principecunapashmi carca. 4 Paicunamanmi reyca, 180 punllacunata pai mandajushca tucuilla llactacuna paiman apamushca valishca cosascunataca ricuchirca. Shinallata chai valishca y juyailla cosascunaca, paishna shuj rey na tiashcatami ricuchijurca. 5 Chai punllacuna jipaca, reyca 7 punllacunatami palacio de Susapi tucui cajcunaman shuj jatun micuita rurarca. Chai micuica importante gentecunapa y na yapa importante gentecunapami carca. Chaitaca paipa palacio patio jardinbimi rurarca. 6 Jardín patioca yura y azul cortinacunahuan arreglashcami carca. Cai cortinacunataca racu cordongunami charijurca. Cai cordongunaca morado milma puchahuan y yura telahuan rurashcami carca. Y chai racu cordongunaca jatun anillo de platacunapi huatashcami carca. Anillocunaca mármol columnacunapi huatashcami carca. Patiopa piso alpaca pórfido nishca rumihuan, yura mármol nishcahuan, nácar* nishcahuan y yana mármol nishcahuan rurashcami carca. Chai piso jahuapica platahuan y orohuan rurashca fino sillongunami tiarca.
7 Oro copacunapimi* vinota cararca. Cada copami diferente carca. Reypa huasipica ashtaca ashtaca vinomi tiarca. Chai tucui vinotaca reyllami ofrecita usharca. 8 Reypash, palaciomanda funcionariocunapashmi gentecuna paicuna munashcata ufiachun saquinata decidishcarca. Chaimandami chai viajeca reyca pitapash ufiachunga na obliganachu canguichi nishpa mandashcarca.
9 Rey Asueropa palaciopica,* reina Vastipashmi huarmicunamanga shuj jatun micuita rurarca.
10 Séptimo punllapica vinota ufiashcamanda shungupi ña cushilla cashpami, reyca paipa ayudante personalcunahuan parlarca. Cai ayudantecunaca reypa huasipi trabajaj 7 funcionariocunami* carca. Paicunaca: Mehumán, Biztá, Harboná, Bigtá, Abagtá, Zetar y Carcás shuticunami carca. 11 Paicunataca paipa ñaupaman reina Vastita pushamuchunmi cacharca. Reina Vastitaca, paipa umapi churajuna adornota* churajushcatami apamuna carca. Reina Vastica juyaillagupachami carca. Pai juyaillagu cashcata llactamanda gentecunaman y principecunamanbash ricuchingapami pushamuchun cacharca. 12 Reypa huasipi trabajaj funcionariocunaca rey imata mandashcatami reina Vastimanga villarca. Pero reina Vastica chai mandashcata cazungapaca nimamanda na munarcachu. Chaimi reyca nina japirinshna, ushashcata culirarca.
13 Chaimi reyca legal casocunamanda alipacha yachaj jaricunata tapurca. (Reyca paipa casocunataca, leycunata alipacha yachajcunata y imapash problemacunata imasha juzgashcata tucui yachajcunatami tapun carca. 14 Paicunapurapica Persia y Media llactacunamanda 7 principecunami carca. Paicunapimi reyca ashtahuanbachaca confian carca. Paicunaca Carsená, Setar, Admatá, Tarsis, Meres, Marsená y Memucán shuti runacunami carca. Paicunami, reypa ñaupamanga seguido shamun carca. Paicunami rey Asueropa gobiernopica ashtahuan autoridadta charin carca). 15 Paicunatami reyca cashna nishpa tapurca: “Reypa huasipi trabajaj funcionariocunahuanmi reina Vastimanga shuj ordenda ñucaca cacharcani.* Chaita na cazushcamandaca, leypi nishcashnaca ¿imatashi reina Vastitaca rurana can?” nishpami tapurca.
16 Chaimi reyta y principecunatapash Memucán runaca cashna nirca: “Reina Vasti rurashcaca na solo reytallachu afectan, rey Asueropa tucuilla provinciacunamanda gentecunatapash y tucuilla principecunatapashmi afectan. 17 Porque reina imata rurashcata tucuilla huarmicuna yachaj chayashpaca, paicunapa cusacunataca ñana respetashpami cashna ninga: ‘Reina Vastipashmi rey Asuero paita cayachun cachajpica na cazurca’ nishpa. 18 Persia y Media llactacunamanda princesacuna reina imata rurashcata yachaj chayashcacunaca, cunanllatami paicunapa cusacunahuanga parlanga. Shina pasajpica paicunaca paicunapa cusacunataca, ñana respetangachu y ashtaca culiraricunapashmi tianga. 19 Reypa ali cajpica, reina Vasti nunca más ama rey Asueropa ñaupapi ricurimuchunmi shuj leyta llujchina can. Chai leytaca, Persia y Media llactacunapa leycunapimi registrana can. Shinami chai leytaca ni pipash na anulaita ushanga. Shinallata reyca, reina Vastitapash yali ashtahuan mejor huarmitami reina cachunga agllana can. 20 Shinami rey mandajushca tucuilla llactacunapi cai leyta uyashpaca, tucuilla huarmicunaca paicunapa cusacunata respetanga. Shinallata cusacuna importante gentecuna cajpipash o na yapa importante gentecuna cajpipashmi huarmicunaca respetanga” nircami.
21 Reypash y principecunapashmi Memucán runapa nishcacunataca gushtarca. Chaimandami reyca Memucán imata nishcata rurarca. 22 Chaimi reyca pai mandajushca tucuilla provinciacunaman cartacunata cacharca. Chai cartacunaca cada provinciapi imasha escribin cashcashnallatami escribishca carca. Shinallata cada llactamanda gentecuna parlashca idiomapimi escribishca carca. Chai cartacunapica, cada familiapi cusacunami umashna* mandana can y chai familiaca cusa parlashca idiomatami parlana can nijurcami.