2 Samuel
15 Chai tucui pasashca jipami Absalonga shuj carretata y caballocunata tandachirca. Shinallata paita ñaupashpa calpachunmi 50 guardiacunata tandachirca. 2 Absalonga tutamandata jatarishpami llactapa punguman rina ñan ladopi shayarishpa quidan carca. Shuj persona shuj problema legalta charishpa chai problemata rey arreglachun mañagrijujpica, Absalonga paita cayashpami “¿maijan llactamandata capangui?” nishpa tapun carca. Shina tapujpimi chai personaca “ñuca amolla, ñucaca Israel jatun familiacunapuramandaca shuj jatun familiamandami capani” nin carca. 3 Chaimi Absalonga chai personataca cashna nin carca: “Can mañajushcaca alimi can. Pero canba casota pipash reypa partemanda atindingapaca na tianllu” ninmi carca. 4 Shinallata Absalonga caitapashmi nin carca: “Llactapi juez cachun ñucata nombrashpami ali canman. Shinami pipash shuj problema legalta charishpa o shuj juiciota rurachun minishtijushpaca ñucapaman shamunman. Shinami ñucaca chai problemata arreglaiman” ninmi carca.
5 Pipash Absalonbaman quimirishpa cumurijpica Absalonga maquita chutashpa jatarichishpami ñavipi muchan carca. 6 Absalonga reypa ayudata mañangapaj shamuj tucui israelitacunahuanmi shina ruran carca. Absalonga israelitacuna paita alicachichunmi* shina ruran carca. Shinami israelitacunaca Absalonda alicachi callarirca.
7 Chuscu* huatacuna jipami Absalonga rey Davidtaca cashna nirca: “Ama shinagu cashpa Jehová Diosman ñuca ima prometishcata pactachingapaj Hebrón llactaman richun saquihuai. 8 Porque Siriapi tiaj Guesur llactapi causajushca horasca cashnami prometircani: ‘Jehová Dios Jerusalenman cutin tigrachihuajpica Jehová Diosman shuj ofrendata carasha’* nishpami prometircani” nircami. 9 Chaimi rey Davidca Absalondaca “tranquilo rilla” nirca. Shina nijpimi Absalonga Hebrón llactaman rirca.
10 Chai jipami Absalonga Israel llactapa tucuilla jatun familiacunata pacalla chapachun huaquin jaricunata cacharca. Paicunataca cashna nishpami cacharca: “Cachocunata huacachijta uyashcandimi ‘Absalonga Hebrón llactapa reymi tucushca’ nishpa villanguichi” nircami. 11 Jerusalenmanda 200 jaricunahuanmi Absalonga Hebrón llactaman rishcarca. Absalón invitajpimi paicunaca ima pasajushcatapash na yachaimandaca paihuan rircalla. 12 Absalonga ofrendacunata cushca jipami Ahitofel shuti guilonita runata cayachun cacharca. Ahitofelca Davidpa consejeromi carca. Paica Guiló llactapimi carca. Paica chai llactamandami carca. Reypa contra tucushpa Absalonda apoyanajujcunaca ashtahuanmi mirashpa catirca.
13 Tiempo jipaca shuj mensajero shamushpami Davidmanga “israelitacunaca Absalonba partemi tucushca” nishpa villarca. 14 Shina villajhuanmi Davidca Jerusalenbi paihuan cashca tucuilla sirvientecunataca cashna nirca: “Pacajungapaj ucha rishunchi. Denoca Absalonmandaca nipipash na escaparita ushashunllu. Na ucha rijpica na yashcapi japij shamushpami tucuilla gentecunata espadahuan huañuchishpa llaquichinga” nircami. 15 Chaimi rey Davidpa sirvientecunaca cashna nirca: “Ñucanchi amolla, ñucanchi reylla ñucanchica quiquinba sirvientecunami capanchi. Quiquin ima decidishcata rurangapaca dispuestomi capanchi” ninajurcami. 16 Rey llujshijpica paipa huasimanda tucuillacunami catishpa rirca. Pero rey Davidca paipa chaishuj 10 huarmicunataca* huasita* cuidachunmi saquirca. 17 Rey David llujshijpimi tucuilla gentecunaca paita catiria rinajurca. Paicunaca Bet-Merhac pushtupimi shayarishpa quidarca.
18 Davidhuanga paihuan rinajushca tucuilla sirvientecuna, tucuilla keretita gentecuna, peletita gentecunapashmi rinajurca. Shinallata Gat llactamanda 600 guitita soldadocunapashmi rinajurca. Tucui paicunami rey Davidpa ñaupata yalinajurca. 19 Chaimi rey Davidca Ittái shuti guitita runataca cashna nirca: “¿Imashpata canbash shamujungui? Canga shuj llactamanda llujshishpa shamushca runami cangui. Mejor mushuj reyhuan quidangapaj tigrailla. 20 Canga cainallami chayamurcangui. Cada vez que ñuca rina tucujpi ñucanchihuan caiman chaiman cumbashpa richun obligangapaca na munanichu. Canba huauquicunandi tigrailla. Jehová Dios canda ama saquichun y ninanda juyashcata* ricuchichun” nircami. 21 Shina nijpimi Ittái runaca rey Davidtaca cashna nirca: “Ñuca amolla, ñuca reylla ñucaca quiquinba sirvijmi capani. Causajuj Jehová Diospa shutipi y quiquin causajushcamandami jurapani, quiquin maipi cajpipash ñucaca chaipimi capasha. Ñuca amolla, ñuca reylla causangapaj cashpa o huañungapaj cashpapash chaipimi capasha” nircami. 22 Chaimi Davidca Ittái runataca “ñucahuan shamuilla” nirca. Shina nijpimi Ittái runaca paipa tucuilla soldadocunandi y familiacunandi yalirca.
23 Chai tucuilla gentecuna yalinajujpica Jerusalenbi causajcuna y Jerusalén ladollapi causaj ashtaca gentecunaca ninanda caparishpami huacanajurca. Rey Davidca Cedrón shuti pamba ladopimi shayajurca. Shinallata Davidhuan cashca tucuilla gentecunaca pambatami yalinajurca. Paicunaca desiertoman rina ñanmanmi yalinajurca. 24 Chaipica Sadocpashmi carca. Shinallata paihuanga tucuilla levitacunapashmi* Taita Diospa* Arca del Pactota* apashpa rinajurca. Paicunaca shayarishpami Taita Diospa* Arcataca alpapi churarca. Tucuilla gentecuna llactamanda llujshishpa pambata yalinajujpica Abiatarpashmi chayamurca. 25 Rey Davidca sacerdote Sadoctaca cashnami nirca: “Taita Diospa* Arcataca Jerusalén llactaman cutin apailla. Jehová Diospa ñaupapi ñuca ali ricurijpica paillatami llactaman cutin tigrachihuanga. Shinallata Arcata y Arca maipi tiajushca carpa huasitapash ricuchunmi saquihuanga. 26 Pero Taita Dios ñucahuan na cushilla cashpaca paipa ricuipi ñucahuan ima ali cajta rurachunlla” nircami. 27 Shinallata rey Davidca sacerdote Sadoctaca cashnami nirca: “Canga consejota cuj runami cangui. Cangunapa ishcai churicunandi llactaman tranquilo tigraichilla. Canba churi Ahimaazta y Abiatarpa churi Jonatanda apashpa tigraichilla. 28 Ñucaca cangunamanda imapash noticiata yachangacamanmi desiertota yalina ñanguna ladopi shuyasha” nircami. 29 Shina nijpimi Sadoc y Abiatar sacerdotecunaca Taita Diospa* Arcata Jerusalenman cutin apashpa chaipi quidarca.
30 Davidca Olivos shuti lomata* vitsajushpaca chaqui lluchu, umata taparishca, huacai huacaimi rijurca. Davidhuan cashca gentecunapashmi umata taparishpa huacai huacai vitsanajurca. 31 Shinapimi Davidmanga “Ahitofelpashmi Absalonhuan canba contra tucushca” nishpa villarca. Shina villajpimi Davidca cashna nirca: “Jehová Dioslla Ahitofelpa consejocunaca shuj tonto runapa consejocunashna tucuchunmi rogapani” nircami.
32 Davidca gentecuna Taita Diosta adoran* cashca loma jahuamanmi chayarca. Chaipica Husái shuti arkita runami paita shuyajushcarca. Husái runaca paipa ropapash liqui liqui y umapash alpallami shuyajushcarca. 33 Davidca paitaca cashnami nirca: “Ñucahuan rishpaca ñucataca imapipash ayudaitaca na ushanguichu. 34 Pero llactaman tigrashpaca Ahitofel imata ruragrijujta jarcashpami ayudaita ushahuangui. Absalonmanga cashna ningui: ‘Ñuca reylla ñucaca quiquinba sirvijmi capani. Pundacuna quiquinba taitata sirvij cashpapash cunanga quiquinba sirvijmi capani’ ningui. 35 Sadoc y Abiatar sacerdotecunaca canhuanmi chaipi canga. Reypa huasipi tucui imata uyashcatami Sadoc y Abiatar sacerdotecunaman villana cangui. 36 Shinallata sacerdote Sadocpa churi Ahimáaz y sacerdote Abiatarpa churi Jonatanbashmi chaipi can. Paicunahuanmi canguna tucui imata uyashcataca villahuana canguichi” nishpami Davidca nirca. 37 Husaica Davidpa amigomi carca. Absalón Jerusalén llactaman yaicujujpimi Husaipash llactaman yaicurca.