2 Tesalonicenses
1 Ñucaca Pablomi capani. Silvano* huauquipash y Timoteopash ñucahuanmi can. Cai cartaca Tesalónica llactapi congregacionbami* can. Quiquingunaca Taita Dioshuan y Señor Jesucristohuanga shujllashnami capanguichi.
2 Taita Diospash y Señor Jesucristopash quiquingunata ninanda juyachun* y quiquingunaman tranquilo ali causaigutapash carachunmi munapani.
3 Huauquicuna, siempremi quiquingunamandaca Taita Diosta agradicipanchi. Shina agradicinaca alimi capan. Porque quiquingunaca ashtahuanmi crishpa catinajupanguichi y quiquingunapurapash ashtahuanmi juyarishpa catinajupanguichi. 4 Chaimandami, Taita Diospa congregaciongunamanga cushijushpa quiquingunamandaca parlapanchi. Porque quiquingunaca, catiriashpa llaquichi tucushpapash, problemacunata charishpapashmi aguantashpa catinajupashcanguichi. Shinallata Taita Diospipashmi confiashpa catinajupashcanguichi. 5 Tucui chaicunami Taita Diosca aliguta ricushpa juzgashcata ricuchijun. Chaimandami quiquingunaca Taita Diospa Gobiernota chasquita ushapanguichi. Porque quiquingunaca Taita Diospa Gobiernomandami sufrinajunguichi.
6 Taita Diosca, quiquingunata llaquichijcunata randi llaquichishpaca, aliguta ricushpa juzgashcatami ricuchijun. 7 Ninan poderta charij paipa angelcunandi Señor Jesús jahua cielomanda rupajuj ninapi ricurimujpimi, quiquingunaca cunanbi charishca sufrimientocunamandaca ñucanchihuan igual samanguichi. 8 Chai tiempopimi Jesusca Taita Diosta na rijsijcunata, ñucanchi Señor Jesusmanda parlaj ali villaicunata na cazujcunatapash castiganga. 9 Ñucanchi Señor Jesusmi* paicunataca juzganga. Paicunaca para siempre tucuchi tucuna castigotami chasquinga. Chaimandami paipa ñaupamandaca anchuchinga. Paipa ninan poderhuanbash na ayudangachu. 10 Pai shamushpaca, paipa separashcacunandimi* alabai tucunga. Paipi crijcunaca paitaca alipimi churanga. Ñucanchi nishcata crimandami quiquingunaca paicunapurapi capanguichi.
11 Chaimandami Taita Diostaca siempre quiquingunamanda mañapanchi. Quiquingunata Taita Dios agllashcamandaca, pai munashcashna causanajushcata pai ricuchunmi mañapanchi. Shinallata pai munashcashna paipa poderhuan tucui ali ruraicunata pactachichun y quiquinguna crishcamanda quiquingunapa ruraicuna ali llujshichunmi mañapanchi. 12 Shinami, ñucanchi Señor Jesuspa shutica quiquingunamanda alabai tucunga y quiquingunapash paihuan shujllashna cashcamandami alabai tucunguichi. Taita Diospash y Señor Jesucristopash ninanda juyashcamandami* shina pasanga.