2 Samuel
9 Davidca cashnami nirca: “¿Jonatanman prometishcashna Saulpa familiamanda pitapash ayudangapaca* tianrachu?” nircami. 2 Saulpa familiapica shuj sirvientemi tiarca. Paica Zibá shutimi carca. Paita cayachun cachashpami rey Davidca “¿canllu Zibá cangui?” nishpa tapurca. Chaimi paica “ari ñuca amolla, ñucami capani” nirca. 3 Chaimi rey Davidca cashna nirca: “Taita Dios llaquinshnallata* ñucapash llaquishpa ayudangapaj Saulpa familiamandaca ¿pipash tianrachu?” nircami. Shina nijpimi Zibá runaca rey Davidtaca cashna nirca: “Jonatanba shuj churimi tian. Paica ishcandi chaquimi suchu can” nircami. 4 Shina nijpimi rey Davidca “paica ¿maipita can?” nishpa tapurca. Chaimi Zibá runaca cashna nirca: “Paica Lo-Debar pushtupimi can. Amiel shuti runapa churi Makir runapa huasipimi can” nircami.
5 Chai jipami rey Davidca enseguida Lo-Debar pushtumanda, Amiel shuti runapa churi Makir runapa huasimanda Mefibosetta pushamuchun mandarca. 6 Chaimi Mefibosetca David maipi cashca pushtuman yaicurca. Mefibosetca Jonatanba churimi carca y Saulpa nietomi carca. Shina yaicujhuanmi Mefibosetca cungurishpa alpacaman cumurirca. Chaimi Davidca “Mefibóset” nirca. Shina nijpimi paica “ñuca amolla, caipimi capani” nirca. 7 Shina nijpimi Davidca Mefibosettaca cashna nirca: “Ama manllaichu, canba taita Jonatanman prometishcashnami candaca ayudasha.* Canba abuelo Saulpa tucuilla alpacunatami canmanga tigrachisha. Y ñuca mesapimi canga micushpa* causagringui” nircami.
8 Shina nijpimi Mefibosetca cutin cumurishpa Davidtaca cashna nirca: “Ñuca amolla, ñucaca shuj huañushca alcushnamari capani. Ñucata considerashpa tratachunga ¿imata cashcaniyari?” nircami. 9 Chai jipami rey Davidca Saulpa sirviente Zibá runata cayachun cachashpa paitaca cashna nirca: “Saulpa y paipa familiapa pertenicishca tucuilla cosascunatami canba amo Saulpa nietoman cuni. 10 Canbash, canba churicunapash y canba sirvientecunapashmi Mefibosetpa familia micunata charichun alpacunata tarpushpa, fucushcatapash cosechanguichi. Pero canba amopa nieto Mefibosetca ñuca mesapi micushpami causanga” nircami.
Zibá runaca 15 churicunata y 20 sirvientecunatami charirca. 11 Zibá runaca rey Davidtaca cashnami nirca: “Ñuca reylla quiquinba sirvijmi capani. Quiquin tucui mandashcatami rurapasha” nircami. Chai punllamandapachami Mefibosetca rey Davidpa churicuna cuenda, Davidpa* mesapi micun carca. 12 Mefibosetca shuj uchilla churigutami charirca. Paica Micá shutimi carca. Y Zibá runapa huasipi tucuilla causajcunami Mefibosetpa sirvientecuna tucurca. 13 Mefibosetca rey Davidpa mesapi micushpa causajushcamandami Jerusalén llactapi causajurca. Paica suchu runagumi carca.