2 Samuel
12 Chaimandami Jehová Diosca Natandaca Davidpaman cacharca. Davidpaman yaicushpami Natanga paitaca cashna nirca: “Shuj llactapica ishcai jaricunami tiarca. Shujca charij jarimi carca. Cutin chaishujca pobremi carca. 2 Chai charij jarica ashtaca llamacunata y ashtaca vacacunatami charirca. 3 Pero pobrella jarica randishca uchilla huarmi llamagutallami charirca. Paica chai llamagutaca cuidashpami charijurca. Chai llamaguca chai jaripa y paipa huahuacunapa huasipimi viñashpa catijurca. Chai llamaguca chai jari charishca ashalla micunamandapashmi micun carca. Chai jaripa vasomandapashmi ufian carca. Y paipa rigrapimi puñun carca. Chai jaripaca chai llamaguca shuj ushishnami carca. 4 Shuj punllaca shuj viajador runami chai charij jaripa huasiman visitangapaj chayarca. Chai charij jarica paita visitangapaj shamushca runaman micunata carangapaca paipa llamacunamanda, paipa vacacunamandapash na japingapaj munarcachu. Chaipa randica pobrella jaripa llamaguta japishpami visitangapaj shamushca runamanga micuchun prepararca” nircami.
5 Chaita uyashpami Davidca chai charij jarihuanga ninandapacha culirashpa Natandaca cashna nirca: “Causajuj Jehová Diospa shutipimi jurani, chai jarica shina rurashcamandaca huañunapachami can. 6 Na llaquishpa shina rurashcamandami chai jarica, chai llamagumandaca chuscu llamacunata pagana can” nircami.
7 Chaimi Natanga Davidtaca cashna nirca: “Quiquinmari chai jari cangui. Israel llactapa Jehová Diosca cashnami nin: ‘Ñucami candaca Israel llactapa rey cachun agllarcani. Saulpa maquimandapashmi candaca salvarcani. 8 Canba amo Saulpa huarmicunata* y pai tucui charishcacunatami canba maquipi entregarcani. Israelta y Judata gobernachunmi candaca churarcani. Chaicunata rurashca jahuapash ashtahuanmi canmandaca rurangapaj munajurcani. 9 Ñucami Jehová Dios cani. ¿Imashpata ñuca nishcata na valichishpa ñuca ñaupapi nalita rurarcangui? Urías hitita runatami huañuchircangui. Ammonitacuna espadahuan huañuchichun paita cachashca jipami paipa huarmita japishpa paihuan cazararcangui. 10 Urías hitita runapa huarmita quichushpa paihuan cazarashpami ñucataca na valichihuashcangui. Cunanmanda vichaica canba familiaca llaquinaitami huañunga’* ninmi. 11 Jehová Diosca caitapashmi nin: ‘Ñucaca canba propio familiallata canda llaquichichunmi saquisha. Can ricujtami canba huarmicunata quichushpa shujman cusha. Paica shujcuna ricujtami canba huarmicunahuanga puñunga.* 12 Can imata rurashcataca pacallami rurarcangui. Pero ñucaca cai cosacunataca tucuicuna ricujtami* israelitacunapa ñaupapi rurasha’ ninmi” nircami.
13 Shina nijpimi Davidca Natandaca “Jehová Diospa contrami pecadota rurashcani” nirca. Chaimi Natanga Davidtaca cashna nirca: “Jehová Diosca canba pecadotaca perdonanmi.* Na huañugringuichu. 14 Shinapash Jehová Diosta na respetohuan tratashcamandaca canba chairalla nacirishca huahuaca huañungapachami” nircami.
15 Chai jipami Natanga paipa huasiman tigrarca.
Jehová Diosca David Uriaspa huarmihuan charishca huahuataca shuj millai unguihuanmi llaquichirca. 16 Chaimi Davidca huahuamanda Taita Diosta rogashpa mañajurca. Paica nima nimata na micushpami ayunajurca.* Cuartopipash vicharishpami tutacunaca alpapi sirinman yalin carca. 17 Davidpa huasimanda ashtahuan ruculla sirvientecunaca paita jatarichingapami munanajurca. Pero paica na jataringapaj munarcachu. Paicunahuan micungapapash na munarcachu. 18 Huahuaca 7 punllacuna jipami huañurca. Chaimi Davidpa sirvientecunaca huahua huañushcata villanata manllanajurca. Paicunaca cashnami ninajurca: “Huahua causajujpipash reyhuan parlangapaj munajpica paica na uyangapaj munarcachu. Cunangarinbash huahua huañushca nishpa villajpica imapash nalitaimanmi ruranga” ninajurcami.
19 Davidca paipa sirvientecuna paicunapura upallaguta parlarinajujta ricushpami huahua ña huañushcata cuenta japirca. Chaimi Davidca paipa sirvientecunataca “¿huahuaca huañurcachu?” nishpa tapurca. Paicunaca “ari ñami huañurca” nircami. 20 Shina nijpimi Davidca alpamanda jatarishpa armarca y aceitehuan javirirca. Ropata cambiarishpami Jehová Diospa huasiman paita adorangapaj rirca. Chai jipaca Davidca paipa huasiman* tigrashpami micunata apamuchun mañashpa micurca. 21 Chaimi paipa sirvientecunaca Davidtaca cashna nirca: “Quiquinhuanga ¿imata pasanyari? Huahua causajujpica imagutapash na micushpami ayunajurcangui* y huacashpallami yalijurcangui. Shinapash huahua huañujhuanmi quiquinga jatarishpa micui callarircangui” ninajurcami. 22 Shina nijpimi Davidca paicunataca cashna nirca: “Huahua causajujpica ‘talvez Jehová Dios ñucata llaquishpa huahuata causachun saquingapashchari’ yashpami pensarcani. Chaimi imagutapash na micushpa ayunajurcani* y huacajurcani. 23 Pero cunanga ña huañushcamari. Paita causachitaca na ushanichu. Imapata imagutapash na micushpa ayunashpa* catishayari. Paita cai rato causachitaca na ushanichu. Ashtahuangarin ñucapashmi ima horapash paishnallata huañusha” nircami.
24 Chai jipami Davidca paipa huarmi Bat-Sebata consolarca. Davidca Bat-Sebahuanmi pacta puñurca y tiempohuanga Bat-Sebaca shuj huahuagutami ungurca. Y chai huahuagutaca Salomón* shutitami churarca. Jehová Diosca paitaca juyarcami. 25 Jehová Diosca chai huahuaguta juyaimandami profeta Natanda cachashpa chai huahuagutaca Jedidías* shutita churachun mandarca.
26 Joabca Rabá llactamanda ammonitacunahuanmi macanajushpa catirca. Y reypa llactatami misharca. 27 Chaimi Joabca Davidman cashna nichun mensajerocunata cacharca: “Ñucaca Rabá llactahuanmi macanajushcani. Y yacucuna tiaj llactatami mishashcani.* 28 Cunanga resto soldadocunata tandachishpa chai llactahuan macanajui.* Ñucaca chai llactataca na mishanachu cani. Ama ñucatara paimi chai llactata misharca nishpa ninajuchunmi chai llactataca can mishana cangui” nichunmi cacharca.
29 Shina nijpimi Davidca tucuilla soldadocunata tandachirca. Shinami Rabá llactahuan macanajungapaj rishpa chai llactata mishashpa saquirca. 30 Chai jipami Malcam* yanga diospa umamanda coronata japishpa Davidpa umapi churarca. Chai coronaca 34 kilosta* pesaj oro coronami carca. Y juyailla rumicunatami charirca. Davidca chai llactata mishashpa quichushca cosascunataca ashtacatami aparca. 31 Shinallata gentecunataca llactamanda llujchishpami trabajachun churarca. Paicunataca rumicunata cuchuna sierracunahuan, afilashca fierro herramientacunahuan y fierro hachacunahuan trabajachunmi churarca. Shinallata ladrillocunata rurachunbashmi churarca. Ammonitacunapa tucuilla llactacunahuanmi shinallata rurarca. Chai jipami Davidca tucuilla soldadocunandi Jerusalén llactaman tigrarca.