Hechos
22 “Ñuca huauquicuna, taitacunapash uyahuaichi. Ima pasashcatami ñucaca cangunaman villangapaj munapani” nircami. 2 Hebreo shimipi Pablo chashna parlajta uyashpacarin, ashtahuan upallami uyanajurca. Chaipimi Pabloca cashna nirca: 3 “Ñucaca judiomi capani. Cilicia llactapa Tarso llactapimi nacirircani. Ñucaca cai llactapi estudiashcami cani. Gamaliel shuti runapachami ñucataca yachachihuarca. Ñucataca Moisesman Cushca Leyta tucuipipacha catichunmi yachachihuarca. Ñucapashmi quiquingunashnallata Taita Diostaca tucui shunguhuan sirvijushcani. 4 Taita Diospa Ñanda* catijcunataca catiriashpa llaquichishpami huañuchircani. Jaricuna cajpi, huarmicuna cajpipashmi paicunataca huatashpa carcelpi churarcani. 5 Shina rurashcataca sumo sacerdotepash* y llactapi autoridadta charijcunapashmi villanga. Paicuna ordenajpimi, Damasco llactamanda huauquicunataca prezo japingapaj rircani. Paicunata castigachingapami, paicunata huatashpa Jerusalenman apamungapaj rircani.
6 ”Pero ña chaupi punlla tucujujta Damasco llactaman chayajujpica, shuj michami jahua cielomanda ñuca jahuapi punchapamba brillamurca. 7 Chaimi alpaman shitarircani. Chaipimi cashna nijujta uyarcani: ‘Saulo, Saulo ¿imamandata ñucataca catiriashpa llaquichihuajungui?’ 8 Shina nijta uyashpami ñucaca nircani: ‘Quiquinga ¿pita capanguiyari?’. Shina nijpimi paica nihuarca: ‘Ñucaca, Nazaret llactamanda Jesusmi cani. Ñucatami quiquinga catiriashpa llaquichihuajungui’ nishpa. 9 Ñucata cumbashpa rinajuj runacunaca, chai michata ricushpapash, ñucaman imata nijushcataca na intindi usharcachu. 10 Chaimi ñucaca nircani: ‘Ñuca Señorlla ¿imatata rurana capaniyari?’. Chaimi paica nihuarca: ‘Jatarishpa Damasco llactaman ri. Chaipimi quiquin imata rurachun ña decidishcataca villanga’ nishpa. 11 Chai micha yapata brillajushcamandaca, na imatapash ricui ushajurcanichu. Chaimi ñucata cumbashpa rinajuj runacunaca, maquimanda japishpa Damasco llactacaman apahuarca.
12 ”Chai jipami Ananiasca ñucapaman shamurca. Paica Moisesman Cushca Leytaca alipachami pactachin carca. Chai llactapi causanajuj judiocunaca, Ananiaspa ali rurashcacunataca alicachishpa o alitami parlan carca. 13 Ananiasca ñuca ladopi shayarishpami cashna nihuarca: ‘Huauqui Saulo, cutin ricuilla’ nishpa. Chai ratomi cutin ricui ushashpa paitaca ricurcani. 14 Chaipimi Ananiasca cashna nihuarca: ‘Ñucanchi punda taitacunapa Taita Diosmi paipa voluntadta yachachun quiquindaca agllashca. Shinallata alita ruraj* Jesusta ricuchun y paita uyachunmi quiquindaca agllashca. 15 Paimanda tucui imata uyashcata, ricushcata tucui gentecunaman parlachunmi quiquindaca agllashca. 16 Shinaca ¿imamandata shuyajunguira? Jatarishpa, bautizari. Taita Dios canba pecadocunata perdonachunga Jesuspa shutipimi crina cangui’.
17 ”Jerusalenman tigramushpaca, Taita Diospa templo huasipi mañajushpami shuj muscuipishna Jesusta ricurcani. 18 Paica cashnami nihuarca: ‘Apurai, uchalla Jerusalén llactamanda llujshi. Porque ñucamanda quiquin imata villachishcataca na uyangapaj munangachu’. 19 Chaimi ñucaca nircani: ‘Ñuca Señorlla, shuj shuj sinagoga huasicunaman rishpa, quiquinbi crijcunata macashpa, prezo churashpa purishcataca, Jerusalenbi judiocunaca alimi yachan. 20 Quiquinba sirvij* Estebanda paicuna huañuchinajujpipash, ñucaca chaipimi carcani. Paicuna imata ruranajujtaca apoyashcami shayajurcani. Shinallata, Estebanda huañuchijcunapa jahualla churajuna ropacunatapash* cuidashcami shayajurcani’. 21 Shina nijpipashmi paica cashna nihuarca: ‘Rilla. Caru llactacunamanmi quiquindaca cachana cani’ nishpa”.
22 Chai ratocaman Pablo imata nijujta uyanajushpapash, gentecunaca cashnami capari callarirca: “Cai runa causashpa catichunga na saquinachu canguichi. Paica huañunami can” nishpa. 23 Paicunaca ashtami caparinajurca. Paicunapa jahualla churajuna ropacunatapash caiman chaimanmi shitanajurca. Alpatapash japishpami jahuaman shitanajurca. 24 Chaimi soldadocunapa comandanteca, soldadocunapa cuartel ucuman Pablota churachun mandarca. Paica gentecuna imamanda Pablota shinapacha caparinajujta yachangapaj munashpami, azialashpa* tapuchichun mandarca. 25 Pero azialangapaj paita huatajpimi Pabloca, soldadocunapa capitandaca* cashna nirca: “Leypi nishcashnaca ¿shuj romano runata nara juzgashpallata azialana derechota charinguichichu?”. 26 Pablo shina nijpimi capitanga, soldadocunapa comandantemanga cashna villangapaj rirca: “¿Imatata ruragripanguiyari? Cai runaca romanomari cashca” nishpa. 27 Chaimi soldadocunapa comandanteca Pablopaman rishpa cashna nirca: “¿Canga romanochu cangui?”. Shina nijpimi Pabloca “ari” nirca. 28 Chashna nijpimi comandanteca nirca: “Romanocunapa derechocunata charingapaca, ashtaca culquitami ñucaca pagarcani”. Chaimi Pabloca nirca: “Pero ñucaca nacirishcamandapachami chai derechocunataca charini”.
29 Shina nijhuanmi, Pablota azialashpa tapugrinajuj soldadocunaca Pablomanda caruyarca. Pablo romano cajta yachashpami comandanteca, paita cadenacunahuan huatachun cachashcamandaca ninanda manllarirca.
30 Comandanteca judiocuna imamandapacha Pablota culpanajushcata yachangapami munarca. Chaimi cayandi punllaca, Pablota huatashca cadenacunata safashpa, sacerdote principalcunatapash y Sanedrinmanda tucuilla sacerdotecunatapash tandanajuchun mandarca. Chai jipami Pablota uriajuchichun cachashpa paicunapa ñaupapi shayachirca.