2 Corintios

9 Taita Diospa separashcacunata* ayudanami canguichi nishpa quiquingunaman escribinaca na minishtirinllu yapanimi. 2 Porque quiquinguna carashpa ayudangapaj munashcataca yachapanimi. Y chaimandami Macedonia llactapi huauquicunamanga alicunata quiquingunamandaca parlarcani. Paicunamanga nishcanimi, Acaya llactapi huauquicunaca ñami shuj huatata ayudangapaj listo shuyanajushca nishpa. Quiquinguna shina ayudangapaj munashcamandami, Macedonia llactapi ashtaca huauquicunapash ayudangapaj munaita charin. 3 Ñucaca nircanimi, paicunaca ayudangapaj listomi shuyanajunga nishpa. Ñuca nishcashna quiquinguna ayudangapaj listo cachunmi huauquicunataca cachajupani. Shinami quiquingunamandaca na yangata parlanajushca cashun. 4 Porque si Macedoniamandacuna ñucahuan rijpi y quiquinguna na listo cajpica, na quiquingunachu pingaipi quidanguichiman. Sino, ñucanchicunami quiquingunapi confiashcamandaca pingaipi quidanchiman. 5 Chaimi quiquinguna carasha nishcagucunata tandachishcalla charichunga, chai huauquicunataca con tiempo cachanami ali can yaparcani. Shinami ñucanchicuna quiquingunapaman chayajpica, quiquingunapa carashcacunaca listo canga. Shinami quiquingunaca tucui shunguhuan caranajushcata y na a la fuerza caranajushcata ricuchipanguichi.

6 Imashinami quiquingunallata ña yachapanguichi, ashagutalla tarpujca ashagutallami cozechan. Cutin ashtacata tarpujca, ashtacatami cozechan. 7 Cada unomi, shungu ucupi imata carangapaj munashcata carana can. Y de malagana y a la fuerzaca na caranachu can. Porque Taita Diosca cushijushpa carajtami juyan.

8 Ashtahuanbash, quiquingunata nunca ama imagupash faltachun, shinallata alicunata rurangapaj tucui ima minishtishcaguta charichunmi, Taita Diosca quiquingunata ninanda juyashcata* ricuchinga. 9 Taita Dios escribichishca shimipipash nijunmi: “Taita Diosca ashtacatami carashca. Paimi pobre gentecunamanga carashca. Paipa ali rurashcacunaca* para siempremi canga” nishpa. 10 Taita Diosmi tarpuj runagumanga ashtaca muyuguta caran y micuchunbash tandaguta caran. Paimi quiquinguna tarpuchunga, ashtaca muyuguta mirachinga. Quiquingunapa ali rurashcacunamanda* ashtacata cozechachunmi ayudanga. 11 Quiquinguna imagutapash na mitsashpa carachunmi, Taita Diosca ashtacata quiquingunataca bendiciashca. Quiquingunapa carashcacunata ñucanchicuna shujcunaman carajpimi, gentecunaca Taita Diosta agradicinga. 12 Shujcunapa alipa cai ayudata cunaca, na solo Taita Diospa separashcacuna imata minishtishcagupi ayudangapallachu can. Sino cai ayudamanda ashtaca gentecuna Taita Diosta agradicichunbashmi can. 13 Cai ayudata cushpami quiquinguna imashina cashcata ricuchinajupanguichi. Shinami paicunaca, quiquinguna Cristomanda ali villaicunata villachishcashna causashcamandaca, Taita Diostaca alabanga. Shinallata paicunaman y tucui gentecunaman na mitsashpa carashcamandapashmi Taita Diosta alabanga. 14 Shinallata paicunaca quiquingunata juyangami. Y Taita Dios quiquingunata ninanda juyashcamandami* paicunaca quiquingunamanda Taita Diosta mañanga.

15 Cai alipacha regalota carashcamandami Taita Diosta agradicipanchi.