Hechos
25 Festo gobernador tucushcamandaca ña quimsa punllacunami carca. Provincia de Judeaman chayashcapash ñami quimsa punllacuna yalishcarca. Festoca Cesarea llactamandami Jerusalén llactaman vichai rirca. 2 Chaipimi sacerdote principalcunapash, importante judiocunapash Pablota imamanda culpanajushcata villagrirca. Festotaca ashtami paicunaca roganajurca. 3 Paicunaca Pablota Jerusalenman apamuchun mandapayari* nishpami roganajurca. Pero paicunaca Pablota ñanbi japishpa huañuchingapallami shina ninajurca. 4 Shinapash Festoca, “Cesarea llactapillatami Pabloca prezo quidana* can. Ñucapash ñallami Cesarea llactaman tigragrini” nircami. 5 Shinallata nircami: “Cangunapuramanda autoridadta charijcunaca, ñucahuan urai ripashunchi. Y si chai runa ciertopacha imapash nalita rurashca cajpica, paita imacunamandalla culpanajushcata nihuaichilla” nircami.
6 Ña paicunahuan más o menos 8 o 10 punllacunata cashca jipami, Cesarea llactaman Festoca urai rirca. Cayandi punllaca, Pablo imata nijta uyangapami* Festoca, Pablota paipa ñaupaman cayamuchun cacharca. 7 Pablo yaicumujpica, Jerusalenmanda urai shamushca judiocunaca Pablopa muyundipimi shayarirca. Paicunaca na pruebacunata charishpapashmi, Pabloca jatun nalicunatami rurashca nishpa rimanajurca.
8 Pero Pabloca cashna nishpami difindirirca: “Ñucaca, judiocunapa Leypa contra, Taita Diospa templo huasipa contra, ni Roma llactapa reypa* contrapash na imapash nalitaca rurashcanichu” nishpa. 9 Festoca judiocunahuan alipi quidangapaj munashpami, Pablotaca cashna nirca: “Caicunamanda Jerusalenbi ñuca quiquinda juzgachunga ¿nachu Jerusalenman vichai ringapaj munangui?”. 10 Pero Pabloca cashnami nirca: “Roma llactapa reypa tribunal ñaupapimi shayajuni. Ñucataca caipimi juzgahuana can. Imashinami quiquinllata ña cuenta japipashcangui, ñucaca judiocunapa contraca imapash nalitaca na rurapashcanichu. 11 Shinaca, ciertopacha ñuca nali runa cashca cajpi o si ñuca imapash nalita rurashcamanda huañuchi tucuna cashca cajpica, huañuchihuachunlla. Ama huañuchihuaichichu nishpaca na rogashachu. Pero si cai runacuna llullanajujpica, paicunata ayudanamandallaca nipipash na ñucataca paicunaman entreganachu can. Ñucataca Roma llactapa rey juzgahuachunmi munani” nircami. 12 Festoca paipa consejadorcunata tapushca jipaca cashnami nirca: “Roma llactapa rey juzgahuachunmi munani ninguimi. Shinaca, Roma llactapa rey quiquindaca juzgachun” nirca.
13 Huaquin punllacuna jipami, rey Agripaca* paipa huarmi Berenicehuan gobernador Festota saludangapaj Cesarea llactaman chayamurca. 14 Tauca punllacunata chaipi quidagrinajujpimi, gobernador Festoca Pablohuan ima pasajushcata rey Agripaman parlarca. Festoca cashnami nirca:
“Caipica, shuj runatami prezo charijuni. Paitami gobernador Felixca prezo saquishcarca. 15 Jerusalenbi cajpica, sacerdote principalcuna y judiocunata ñaupaman pushajcunami Pablohuan ima pasashcata ñucaman villashpa, paita sentenciachun mañahuarca. 16 Chaimi ñucaca nircani, romanocunapa leypica nijunmi, culpanajujcunapa ñaupapi nara difindirijpillataca shujcunata ayudanamandallaca nipita na paicunaman entreganachu can nishpa. 17 Chaimi paicuna chayamujhuan, ñucaca uchalla cayandi punllallata imata nijta uyangapaca chai runata ñucapaman apamuchun cacharcani. 18 Chaipimi chai runata culpanajujcunaca shayarishpa, tauca cosascunamanda culpai callarirca. Pero paicunata uyashpaca, cai runa imapash nalita rurashcataca na tarircanichu. 19 Paicunaca paicunapa religionmanda, huañushca Jesús shuti runamandami shuj shuj yuyaicunata charishpa na de acuerdo cashcarca. Pero Pabloca, Jesusca na huañushcachu nishpami nijurca. 20 Ñucaca cai problemata imashina arreglanatapash na atinarcanichu. Chaimi Pablotaca nircani, cai cosascunamanda quiquinda juzgachunga ¿nachu Jerusalenman ringapaj munangui? 21 Pero Pabloca, Augusto* decidingacamanmi prezo quidangapaj munani nircami. Shina nijpimi Pablotaca, Roma llactapa reypaman cachangacamanga prezo charichun mandarcani” nirca.
22 Chaimi rey Agripaca Festotaca nirca: “Ñucapashmi chai runa imata nijta uyangapaj munapani”. Shina nijpimi Festoca nirca: “Cayami paitaca uyangui” nishpa. 23 Cayandi punllaca, rey Agripaca paipa huarmi Berenicendimi ninanda jariyashca chayamurca. Paicunaca tribunal ucumanmi soldadocunapa comandantecunandi, chai llactamanda importante runacunandi yaicumurca. Chaipimi Festo ordenajpi Pablotaca paipa ñaupaman apamurca. 24 Chaimi Festoca cashna nirca: “Rey Agripa y caipi cumbanajuj gentecunapash cai runata ricupaichi. Jerusalenbipash, caipipashmi tucui judiocunaca, cai runata huañuchi nishpa caparihuanajurca. 25 Pero, cai runa huañunata miricichunga ima nalitapash na rurashcatami cuenta japircani. Chai runaca, rey Augustomi* ñucata juzgachun munani nircami. Shina nijpimi, chai runataca Augustopaman cachangapaj decidircani. 26 Shinapash, quiquin Roma llactapa reyman* cai runamanda imata escribishpa cachanatapash na atinapanichu. Chaimi, quiquingunapa ñaupaman, ashtahuanbachaca quiquin rey Agripapa ñaupaman paitaca apamupashcani. Shinami cai runata tapuicunata rurashca jipaca, imagutapash nishpa escribita ushapasha. 27 Porque, shuj prezota imacunamanda culpajushcata na villashpata Roma llactaman yangata cachanaca, ñuca yuyaipica nalichu canga yanimi” nircami.