Jueces
5 Chai punllaca Débora huarmiguca Abinoam shuti runapa churi Barac runahuanmi cai cancionda candarca:
2 “Israel llactapi cacharishca ajchata* charij guerrerocuna tiashcamanda y
paicunapa munai macanajungapaj rishca gentecunamanda,
Jehová Diosta alabaichiyari.
3 Jatun mandajcuna uyaichi. Gobernantecuna ali ali uyaichi.
Ñucami Jehová Diosman candagrini.
Israel llactapa Jehová Diosmanmi musicata tocagrini.
4 Jehová Dioslla can Seír pushtumanda llujshijpi,
can Edom alpamanda llujshishpa shamujpica
alpapash chujchuitami chujchurca. Jahua cielomandapash ninandami yacuca urmamurca.
Fuyucunapash tamiajpimi chingarirca.
5 Urcucunaca Jehová Diospa ñaupapimi chujchuita chujchurca.
Sinaí urcupashmi Israel llactapa Jehová Diospa ñaupapica chujchuita chujchurca.
6 Anat shuti runapa churi Samgar runapa punllacunapi
y Jael huarmigupa punllacunapipash principal ñangunataca nipipash na purinllu carca.
Viajadorcunaca shuj ñangunatami purin carca.
7 Israel llactapa campocunapi causajcunaca illarcami.*
Ñuca ricuringacamanmi illarca. Ñucaca Deborami capani.
Israel llactapa mamashna ñuca shayaringacamanmi shina carca.
8 Israelitacunaca yanga dioscunatami adoranajurca.
Chaimandami paicunapa llactacunapa pungucunapica guerra tiarca.
Israel llactapa 40 mil jaricunapa maquipica
ni shuj escudopash, ni shuj lanzapash na ricurircachu.
9 Ñucaca Israel llactapa comandantecunapa partemi cani.
Paicunaca paicunapa munaimi llactamanda gentecunahuan macanajungapaj rirca.
Jehová Diosta alabaichi.
10 Burrocunapi tiarishpa rijcuna,
fino alfombracunapi tiarijcuna,
shinallata ñangunata purijcuna,
tucui canguna pensarichi.
11 Yacu tanque ladocunapimi, yacuta llujchijcunapa parlocunaca uyarirca.
Chaipimi Jehová Diospa ali rurashcacunamanda parlanajurca.
Israel llactapi campocunamanda gentecunapa ali rurashcacunamandapashmi parlanajurca.
Chai jipami Jehová Diospa llactaca, llacta pungucunacaman urai rirca.
12 Rijchari, Débora, rijchari.
Rijchari, rijcharishpa shuj cancionda candai.
Barac jatari. Abinoam runapa churi Barac, can prezo japimushcacunata apashpa ri.
13 Quidashcacunaca mandajcunapamanmi urai shamurca.
Jehová Diospa llactaca, shinlli gentecunapa contra macanajungapami ñucapaman shamurca.
14 Pambacunapi cajcunaca Efraín jatun familiamandami cashcarca.
Benjamín jatun familia cangunapurapimi Efraín jatun familiapash rinajun.
Makirpa huahuacunamandami comandantecunaca urai shamurca,
shinallata soldadocunata tandachijcunaca* Zabulonba jatun familiamandami shamurca.
15 Isacar jatun familiata mandajcunami Débora huarmitaca ayudanajurca.
Imashinami Isacarpash Débora huarmita ayudajurca, shinallatami Barac runapash ayudajurca.
Paitaca chaquillami pambacunaman cacharca.
Rubenba jatun familiapuramandaca imata ruranatapash na atinanajurcachu.
16 ¿Imashpata llama michijcuna llamacunaman
flautata tocajta uyashpa, ishcai costalcunapa chaupipi tiarishpa quidarcangui?
Rubenba jatun familiapuramandaca imata ruranatapash na atinanajurcachu.
17 Galaad alpacunapi causaj gentecunaca Río Jordán chaishuj ladopimi quidarca.
Cutin Dan jatun familiaca ¿imashpata barco ladocunapi quidarca?
Aser jatun familiaca mar manñapimi nimata na rurashpa tiarishpa quidarca.
Shinallata paicunapa barcocuna shayarij pushtumandaca na cuyurircachu.
18 Zabulón jatun familiamanda gentecunaca paipa causaitami,* peligropi churarca.
Neftalí jatun familiamanda gentecunapashmi urcucunapi paicunapa causaitaca peligropi churarca.
19 Reycuna shamushpami israelitacunapa contra macanajurca.
Canaán alpacunamanda reycunaca Taanac pushtupimi macanajurca.
Meguidó yacu ladopimi macanajurca.
Paicunaca ima plata materialtapash na apai usharcachu.
20 Jahua cielomandami estrellacunaca macanajurca.
Paicunaca cielomandami Sísara runahuan macanajurca.
21 Cisón huaicupa ashtaca yacumi contracunataca aparca.
Unaita tiashca Cisón huaicupa ashtaca yacumi aparca.
Ñucaca poderoso jaricunata sarunshnami saquircani.
22 Guerrapa caballocuna manllanaita calpanajujpimi,
caballocunapa chaquicunapash shinllita huactashpa alpa uyarijta calpanajurca.
23 Jehová Diospa angelca cashnami nirca:
‘Jehová Diosta ayudangapaj na shamushcamanda,
alipacha shinlli soldadocunahuan Jehová Diosta ayudangapaj na shamushcamanda
Meroz pushtuta maldicichi y chaipi causajcunatapash maldicichi’ nircami.
24 Tucui huarmicunamanda yalica,
quenita Héber runapa huarmi Jael shuti huarmigu ashtahuan bendiciashca cachun.
Carpa huasicunapi causaj huarmicunamandaca pai ashtahuan bendiciai tucushca cachun.
25 Sísara runaca yacutami mañarca, paica lechetami cararca.
Shuj juyailla jatun tazonbimi cuajada lechetaca cararca.
26 Jaelca shuj maquihuanga carpa huasipa estacatami japirca.
Cutin ali lado maquihuanga obrerocunapa martillotami japirca.
Chaihuanmi Sísara runapa umataca utujurca.
Estacataca paipa umata yalijtami clavarca.
27 Sísara runaca Jael huarmigupa chaqui ñaupapimi urmarca. Urmashpami ñana cuyurirca.
Jaelpa chaqui ñaupapimi urmarca.
Urmashca pushtupimi huañushpa quidarca.
28 Ventanamandami shuj huarmica chapajurca.
Sísara runapa mamami ventana rejamanda chapajurca. Paica
‘¿imashpata paipa carretaca na ucha shamun?
¿Imashpata paipa caballocuna shamujujpash nara uyarin?’ nishpami pensarijurca.
29 Chaita uyashpami huasipi mandaj huarmicunapuramanda ali yachajushca huarmicunaca cashna contestanajurca
y paipashmi cutin cutin cashna pensarijurca:
30 ‘Paicunaca guerrapi mishashca cosascunatami repartirinajunga.
Cada soldadomi shuj joven huarmita o ishcai joven huarmicunata japinajunga.
Sísara runapaca teñishca telacunami canga. Ari, teñishca telacunami canga.
Guerrapi mishashca cosascunata japij runacunapash cungapi churajuchunmi bordashca shuj telata,
teñishca telata, bordashca ishcai telacunata japinajunga’ nishpami pensarijurca.
31 Jehová Dioslla, shinami canba tucui contracunaca huañuna can.
Shinapash canda juyajcunaca indi punchapamba jatarinshna cachun” ninajurcami.
Chai alpacunapica 40 huatacunatami tranquilo ali causai tiarca.*