Jesusmi demoniocunata yali poderta charin

¿IMAMANDA shuj ali ángel Diablo Satanás tucushcata yaringuichu?... Paica paitalla adorachunmi munarca. Chaimi Taita Diospa contra tucurca. ¿Shuj angelcunapashchu Diablopa lado tucurca?... Ari. Ashtaca angelcunami Diablopa lado tucurca. Paicunatami Bibliapica ‘Satanaspa angelcuna’ nin (Apocalipsis 12:​9).

¿Chai nali angelcunaca Taita Diospi crinllu?... Bibliapica demoniocunapashmi Taita Diospi ‘crin’ nin (Santiago 2:19). Pero cunanbica, demoniocunaca Taita Diosta manllanmi. Paicuna nalita rurashcamanda Taita Dios castiganata yachashpami manllan. ¿Ima nali cosascunatata demoniocunaca rurarca?...

Bibliapica ninmi, angelcunaca jahua cielopi causanata saquishpami, cai alpaman shamurca nin. Paicunaca cai alpapi juyailla huarmicunatami ricurca. Paicunahuan parejo puñungapami munarca. Chaimi demoniocunaca humano gentecuna tucushpa cai alpaman shamurca (Génesis 6:​1, 2; Judas 6). Shuj jari shuj huarmi parejo puñunamandaca ¿imatata yachangui?...

Parejo puñuna nishpaca na igual puñunamandallachu parlajun. Sino relaciones sexualta charinatami nijun. Chaimi huarmicunapa vijsa ucupica shuj huahuagu viñai callarin. Taita Diosca solo cazadocunallami shina puñuchun munan. Chaimi huahuagu nacijpica taitapash y mamapash huahuagutaca cuidanga. Pero angelcunaca na pihuanbash parejo puñunachu carca. Prohibidomi carca.

Angelcunaca gentecuna humano tucushca jipami cai alpapi huarmicunahuan relaciones sexualta charirca. Y chaimi chai huarmicunaca huahuacunata charirca. Chai huahuacuna viñashpaca jatun jatungunami tucurca, gigantecunami carca. Chaicunaca malo malocunami carca. Shuj gentecunataca macanllami carca. Chaimi Taita Diosca chai gigantecunatapash y tucui nali gentecunatapash tucuchingapaca ninanda tamiachirca. Pero Noetaca shuj arcata rurangui nircami. Chai arcaca jatun barcoshna cajami carca. Taita Diosca ali gentecunata salvangapami chai arcataca rurangui nirca. Alipacha Yachachij Jesusca, ninanda tamiajpi ima pasashcataca yarinami canguichi nircami (Génesis 6:​3, 4, 13, 14; Lucas 17:​26, 27).

Ninanda tamiajpica ¿imatata nali angelcunaca rurarca? ¿Yachapanguichu?... Yaripai, nali angelcunaca gentecunashna tucushpami cai alpaman shamurca. Paicunaca gente cuerpota saquishpami cutin ángel tucushpa jahua cieloman tigrarca. Pero jahua cieloman tigrashpaca ñana Taita Diospa angelcuna caita usharcachu. Chaimandami paicunaca Satanaspa angelcuna tucurca. Demoniocunami tucurca. Y paicunapa gigante huahuacunaca ¿imata tucurca?... Taita Diosta na cazuj gentecunahuan igualmi ninan manllanai tamiapi huañurca.

Ninan manllanai tamia tiashca jipaca, demoniocuna cutin gentecunashna tucuchunga Taita Dios nunca más na saquircachu. Demoniocunata ricuitaca na ushanchichu. Pero paicunaca gentecuna nalicunata rurachunmi munan. Y como paicunaca ña cai alpaman shitai tucurca, cai alpapica ashtaca problemacunatami ruran.

Pero ¿imamandata demoniocunataca na ricui ushanchi? ¿Yachanguichu?... Paicunaca espiritucunami can. Chaimi paicunata ricuitaca na ushanchi. Pero demoniocunaca ciertopachami tian. Bibliapica ninmi, Diablo Satanasca paipa demoniocunapa ayudahuanmi ‘cai [alpapi] causajcunataca umachijun’ (Apocalipsis 12:​9, 12).

¿Diablo y paipa demoniocunaca ñucanchitapashchu engañaita ushan?... Ari, na cuidadota charijpica ñucanchitapashmi engañanga. Pero paicunataca na manllanachu canchi. Alipacha Yachachij Jesusca nircami, ‘Diabloca na ñucataca imatapash rurai ushangachu’ ( Juan 14:30).

Demoniocunaca ¿ima nali cosascunata rurachunda munan? Pensaripai, cai alpaman shamushpaca ¿ima nali cosascunatata demoniocunaca rurarca?... Ninan Manllanai Tamia nara tiajpica, paicunaca huarmicunahuanmi parejo puñushpa relaciones sexualesta charirca. Chaitaca paicunaca na ruranachu carca, prohibidomi carca. Demoniocunaca gentecuna Taita Diosta na cazushpa pihuanbash relaciones sexualesta ninandami cushijun. Shinaca ¿picunallata parejo puñuna can?... Ari, alimi contestarcangui, solo cazadocunallami parejo puñushpa relaciones sexualesta charina can.

Cunanbica ashtaca joven cuitsacuna y huambracunami aunque malo cajpipash, parejo puñushpa relaciones sexualesta charinata yachan. Bibliapica jaricuna charishca partemandapashmi parlan. Chaitami pene nin (Levítico 15:​1-3). Cutin huarmicunapa partetaca vagina ninmi. Jehová Diosca solo cazadocunalla parejo puñushpa chai partecunata utilizachunmi, chai partecunataca rurarca. Jehová Diosta na cazushpa nalicunata rurajpica, demoniocunaca ninandami cushijun. Por ejemplo, Jehová Diosca jari huahuagucuna y huarmi huahuagucuna paicunapa partecunata japirishpa o tacarishpa pugllachunga na munanllu. ¿Chaicunata rurashpa demoniocunata cushichingapachu munangui?...

Demoniocunaca, Jehová Dios millanayachishca shuj nali cosascunatapash gentecuna rurachunmi munan. ¿Chai nali cosascuna ima cajta yachanguichu?... Shujcunata ninanda llaquichina (Salmo 11:​5). Millai gentecunaca grosero, fiña fiñacunami can. Shujcunataca macanllami. Pero shinapash yaripai, demoniocunapa huahuacuna, gigantecunami shina nali nalicuna carca.

Demoniocunaca gentecunatapashmi manllachinata yachan. Huaquinbica huañushca gentecunashnallami tucun. Chai huañushca gentecunashnallami parlaj tucun. Shinami gentecunataca, huañushcacuna causashpa catijta crichin. Shinallata causajuj gentecunahuan huañushcacuna parlajtapashmi crichin. Chaimi ashtaca gentecunaca fantasmacunapi crin.

Shinaca Diablo y paipa demoniocuna ama engañachunga cuidadota charinami canchi. Bibliapica ninmi: ‘Satanasca punchapamba angelshna tucunllami. Shina cajpimi, Satanaspajta rurajcunapash [alita] rurajcunashnalla tucun’ (2 Corintios 11:​14, 15). Pero demoniocunaca nalicunami can. Ñucanchicunapash paicunashna cachunga ¿imatata ruran? Ricupashun.

Gentecunaca ¿imacunata ricushpata millai canata, prohibido cajpipash parejo puñunata yachajun o fantasmacunapi crin?... ¿Nachu televisionbi, videojuegocunapi, Internetpi o cuento librocunapi yachajun? Chai cosascunaca ¿Taita Diosman quimirichun ayudanllu? ¿O Diabloman y paipa demoniocunamanllu quimichin? ¿Imatata pensangui?...

¿Picunata nali cosascunata ricuchun y uyachun munan?... Diablo y paipa demoniocunami gentecuna nalicunata ricuchun y uyachun munan. Shinaca ¿imatata rurana canchi?... Jehová Diosta sirvichun ayudaj cosascunatallami liina, uyana y ricuna canchi. Pensaripai ¿ima ali cosascunatata rurai ushanchiman?...

Ali cosascunata rurashpaca demoniocunataca na manllanachu canchi. Jesusca demoniocunata yalimi poderta charin. Shuj punllaca, manllarishpami demoniocunaca, ‘¿ñucanchita tucuchingapachu shamurcangui’ nishpa Jesustaca tapurca (Marcos 1:24). ¿Nachu demoniocunata Jesús tucuchijpica ninanda cushijushun?... Shina pasangacamanga, Jehová Diospa ladopi y paipa ladopi cashcamanda Jesús ñucanchita cuidanataca seguromi cana canchi.