Jehová Diosta adorana templo

Rey Salomón Israel llactata mandai callarijpica Jehová Diosca cashnami tapurca: ¿Imatata cuchun munangui? Chaimi Salomonga: “Ñucaca, chairalla viñai huambrami cani. Imagutapash nara yachapanichu”. ‘Can agllashca gentecunata mandangapaj ali yuyaita carahuai’ nirca. Shina nijpimi Jehová Diosca: ‘Can mañashcashnami ali yuyaita canman cusha. Chashna alipacha yuyaita charij runaca na tiangachu. Shinallata charij tucunatapashmi cusha’. ‘Ñucata na saquijpica canba causana punllacunatapash mirachishami’ nirca.

Salomonga Jehovapa templo huasita shayachingapaca orota, culquita, ali caspicunata, ashtahuan ali rumicunatami utilizarca. Ashtaca jaricuna, huarmicunapash ali ali trabajashpa templo huasitaca 7 huatacunapi tucuchirca. Jipamanga chai templo huasi Jehovapa cashcata ricuchingapami altar jahuapi sacrificiocunata churashpa, Salomonga altar ñaupajpi cungurishpa: Jehová Dioslla cai templota yali ashtahuan jatundami miricipangui. ‘Shina cajpipash Jehová Dioslla canda sirvij, canba ñaupajpi caparishpa mañajujta uyashpa ricupangui’ nishpa mañajurca. ¿Imatata yuyangui? ¿Chai templo huasitaca Jehová Diosca alicachircacha? ¿Salomón mañashcataca Jehová Diosca uyarcacha? Jehová Diosta ‘mañashpa Salomón tucuchijhuanmi, jahua pachamanda nina urai shamushpa Diosman cushca tucuilla rupachinatapash, animalcunapa aichatapash, tucuillata rupachirca’. Shinami Jehová Diosca chai templo huasita alicachishcata ricuchirca. Israelitacuna chaita ricushpaca ninandami cushijunajurca.

Rey Salomón alipacha yachaita charishcataca Israelmanda tucui llactacunapi, shuj caru llactacunapipashmi ninan rijsishca carca. Chaimi gentecunaca imapash problemacunapi ayudachun nishpa rey Salomonbaman rinajurca. Saba shuti llactata mandaj reinapashmi Salomón ciertopacha ali yachaita charishcata ricungapaj rirca. Chaimi chai reinaca ‘na tigrachi ushanalla tapuicunata’ rurarca. Shinapash Salomón chai tapuicunata ali contestajpica chai reinaca: ‘Ñuca caiman nara shamushpaca, na crijurcanichu. Ñuca can alipacha yachajushca cajtaca, ashtahuan yalitami ricujuni’. Canba Dios Jehovami candaca bendiciashca nirca. Israelpi gentecunaca aliguta, cushillami causanajurca. Shinapash chai causaica ñallami tucurigrijurca.