Pircapi escribishca shimicunaca ¿imata can?

Jipa huatacunamanga Belsasar runami Babilonia llactapi rey shina mandai callarirca. Shuj tutaca mil yali gentecunata invitashpami shuj jatun micuita rurarca. Chai llactamanda ashtahuan importante gentecunami chaipi carca. Rey Belsasarca Jerusalenbi Jehovapa templo huasimanda Nabucodonosor apashca oro copacunata llujchichunmi mandarca. Belsasarpash, pai invitashca gentecunapash chai oro copacunapi ufiashpami, yanga dioscunata adoranajurca. Chaipimi na yashcapi ‘shuj maqui dedocuna ricurirca’. Chai maquica, pircapimi na intindirinalla shimicunata escribijurca.

Chaita ricushpami Belsasarca ninanda manllarishpa magiata rurajcunata cayachun cacharca. Paicunataca: ‘Chai pircapi escribishca tiajujta, maijanbash liishpa ima nijujta villajpica’, ‘ñuca mandajuj llactapica ishcaipa jipa mandaj cachunmi churasha’ nirca. Chai alipacha yachajushcacunapash ‘chai escribishca ima nijujta villaitaca na ushanajurcachu’. Chaimi reina shamushpaca: “Danielta cayailla. Paica, chai escribishca ima nijujtapash villangallami”. Paimi Nabucodonosorpa muscui ima cajta villarca nirca.

Chaimi Danielca reypaman rirca. Belsasarca Danieltaca: ‘Cai escribishcata can liishpa, chai escribishca ima nijujtapash villajpica, canba cungapipash oro cadenatami churachisha. Ñuca mandajuj llactapipash, ishcaipa jipa mandaj cachunmi churasha’ nirca. Shina nijpimi Danielca: ‘Ima alicunata carangapaj munashcataca, quiquinballata saquipailla’. ‘Ñucaca chai escribishca ima nijujtapash villashallami’. Canba taita Nabucodonosortaca jatun tucushca cashcamandami Jehová Diosca pai mandanata quichushpa, humilde canata yachachirca. “Tucui chaicunata yachashpapash” Jehová Diosta ‘na cazushpa, jatun tucushpami paipa huasimanda copacunata apamushpa chai copacunapi vinota ufiarcanguichi’. Chaimandami cai shimicunata escribishca: MENÉ, MENÉ, TEKEL, PARSÍN nishca shimicunami tiajun. Chai shimicunaca caitami ningapaj munan, medos nishca persa nishca gentecuna Babilonia llactata mishajpimi, canga ñana rey cagringui nirca.

Babilonia llactaca pipash na mishai ushanashnallami ricurirca. Chai llactaca jatun jatun pircacunahuan caimanda, yacu chaupipi caimandami chai llactaca alipacha cuidashca carca. Shinapash chai tutallatami medos nishcacuna, persa nishca gentecunaca Babilonia llactata llaquichirca. Ciro shuti reymi chai yacucunata shuj ladota cachashpa Babilonia punguman chayaita usharca. Shina chayajpimi pungucunaca pascashca cajta ricurca. Ciropa soldadocuna Babiloniaman yaicushpami chai llactata mishashpa, chaimanda reytapash huañuchirca. Shinami rey Ciroca Babilonia llactata mandai callarirca.

Ciro ña shuj huatata mandajushpaca: ‘Jerusalenbi ñucapa templo huasita cutin shayachigri’ nishpami Jehová Diosca mandahuarca. Judío puracunamanda maijanbash ayudangapaj munashpaca rinallami canguichi nirca. Chaimandami Jerusalenda tucuchishca jipa 70 huatacuna yalijpi judiocunaca paicunapa llactaman cutin tigraita usharca. Shinami Jehová Diospa nishcaca pactarirca. Shinallata rey Ciroca oro copacunata, culquihuan rurashca copacunata, Nabucodonosor Jehová Diospa templo huasimanda apashca shuj cosascunatapashmi tigrachirca. ¿Ciro shuti reyta utilizashpa Jehová Dios paipa llactata ayudashcata cuenta japircanguichu?