Diablomi Jesusta pandachigrijurca

Bautizarishca jipaca Jehová Diospa espíritu santota chasquishpami, Jesusca desiertoman rirca. Desiertopi cashpaca 40 punllacunata na micushca caimandami ninanda yarjachijurca. Chaimi Diabloca Jesusta pandachingapaj shamushpa: “Diospa churi cashpaca, cai rumicunata tandaman tigrachiyari” nirca. Shina nijpimi Jesusca cashna tigrachirca: “Taita Dios escribichishca shimipica nijunmi, gentecunaca tandata micushpallaca na causai ushangachu. Sino Jehová Diospa shimita pactachishpami causai ushanga” nircami.

Jesustaca, Jerusalén llactapi tiaj Taita Diospa templo huasi jahuamanmi Diabloca aparca. Chaipimi Jesustaca nirca: “Diospa churi cashpaca, caimanda ucuman shitari. Porque Taita Dios escribichishca shimipica nijunmi: Canda cuidangapami paica paipa angelcunata cachamunga”. Chaimi Jesusca nirca: “Taita Dios escribichishca shimipica caitapashmi nijun: ‘Jehová Dios ayudajta o na ayudajta ricungapallaca na imatapash rurajunachu cangui nijunmi’” nirca.

Chai jipa Diabloca: “Jesustaca shuj jatun jatun urcu jahuaman apashpa, cai alpapi tiashca tucui llactacunata y chai llactacunapi ima tiashcatapashmi Diabloca ricuchirca”. Chai jipaca Diabloca: “Ñuca ñaupapi cungurishpa shuj viajetallapash ñucata adorajpica, tucui caicunatami canmanga cusha” nircami. Chaimi Jesusca: “Satanás caimanda rita rihuai. Porque Taita Dios escribichishca shimipica, ‘Jehová Diostami adorana cangui. Paitallami sirvina cangui nijunmi’” nirca.

‘Shina nijpimi Diabloca, Jesuspa ladomanda anchurishpa rirca. Chaimi angelcuna shamushpa Jesusta ayudanajurca’. Chai jipallami Jesusca Taita Diospa Reinomanda ali villaicunata villachi callarirca. Jehová Diosca cai alpapi villachichunmi Jesustaca mandarca. Jesús yachachishcata ninanda uyanayachishpami gentecunaca tucui ladocunaman catin carca.