Jesusca sábado punllapimi jambirca

Fariseocunaca Jesusta na ricunayachishpami imamandapash juchachishpa prezo churangapaj munanajurca. Paicunaca, samana punlla sabadopi Jesusca na jambinachu can ninajurcami. Shuj sábado punllaca shuj ciego jarigu ñanbi culquita mañashpa tiajujtami Jesusca ricurca. Chaimi Jesusca paipa discipulocunataca: Taita Diosmi paipa podertaca cai runagupi ricuchinga nirca. Shina nishca jipami Jesusca, tucahuan alpata turuyachirca. Na ricuita ushaj runagupa ñavipi chai turuta javishpami, Siloam piscinashnalla pushtupi maillarigri nishpa cacharca. Tigramushpaca cai runaguca ñami ricuita usharca.

Chaipi caj gentecunaca ninanda manllarishpami cashna ninajurca: ‘¿Nachu cai runaguca, culquita mañashpa tiajun carca?’ “Paishnallamari ninajurcami”. Chaimi chai jarica cashna tigrachirca: Ari, ñucami nacirishca horasmandapacha ciego carcani nirca. Chaita ricushpami gentecunaca: “¿Imashinata ricuitaca usharcanguiyari?” nishpa tapunajurca. Chaimi ima pasashcata tucuita paicunaman parlajurca. Chaimandami chai jaritaca fariseocunahuan parlachun pushanajurca.

Chai jarica fariseocunamanga: ‘Jesusmi turuta rurashpa, ñuca ñavipi javishpa, Siloam piscinashnalla pushtupi maillarigri nishpa cachahuarca’. “Chaiman rishpa ñavita maillashpaca, ñapash ricurcanillami” nirca. Chaita uyashpami fariseocunaca: Chai runa samana punllapi chashna alichishpaca napacha Taita Diosmanda shamushcachu canga nirca. Cutin shujcunaca: Chai runa Taita Diosmanda na shamushca cashpaca, imapash unguihuan gentecunataca na jambita ushanmanllu carca ninajurca.

Chai fariseocunaca chai ali tucushca runapa taitamamata cayashpami: ¿Caichu cangunapa churi? ¿Imashpata cunanga ña ricujun? nishpa tapunajurca. Fariseocunaca, maijanbash Jesuspi feta charijpica sinagoga huasimanda llujchishpa cachanami can nishcarcami. Chaita manllashpami chai jaripa taitamamacunaca: ‘Na yachapanchica, paitallata tapupaichilla’ nircami. Chaimi chai runagutaca fariseocunaca ashtahuanmi tapunajurca. Shina tapuchinajujpimi chai jarica: Ña nircanica, pero cangunaca na uyanguichica. ¿Imashpata cutin cutin nichun munanguichi? nirca. Shina nijpimi fariseocunaca ninanda culirashpa chai jaritaca llujchishpa cacharca.

Chai jipami Jesusca chai jarita ricungapaj rishpaca: ¿Mesiaspi cringuichu? nishpa tapurca. Shina nijpimi: Pipacha cajta yachashpaca paipica crimanmi nirca. Chaimi Jesusca: Ñucami Mesías cani nirca. Jesusca ¿imashinata chai ciego jarigutaca juyashcata ricuchirca? Jesusca chai jarita jambishpa, paipi feta charichunbashmi ayudarca.