Paicunaca na cai pachamanda canllu
“Na cai pachamanda cajpimi, cai pachapajtalla rurashpa causajcunaca millanayachirca” (JUAN 17:14).
Cai shimicunata nishpaca Jesusca ¿imatata ningapaj munarca? Jesusca politicapi o cai mundopa ruraicunapi na chapurimandami cai pachamandaca na canichu nirca. Jesusca “ñuca mandana llactaca, na cai pachapi tiajunllu. Cai pachata ñuca mandana cajpica, ñucata servijcunami Judea llactapi causajcuna ñucata ama japichunga, paicunahuan macanajunman carca. Ashtahuangarin ñuca mandana llactaca, na cai pachapi tiajunllu” nircami (Juan 18:36). Jesusca paipa catijcunataca Bibliapi mandashcashna causachunmi yachachirca (Mateo 20:25-27).
Jesusta punda catijcunapa ejemplo. Alipacha estudiashca Jonathan Dymond jarica, Jesusta catijcunamandaca cashnami nirca: “Paicunaca llaquichi tucuna cashpapash, carcelpi churai tucuna cashpapash o huañuna cashpapash guerramanga nimamanda na ringapaj munarcachu” nircami. Shinallata Jesusta catijcunaca llaquichi tucuna cashpapash politicacunapi o cai mundopa ruraicunapipash nimamanda na chapurircachu. Paicunaca shujcunashna nali cosascunata na rurashpa, Bibliapa yachachishcacunata pactachishpami causan carca. Chaimandami apóstol Pedroca, “cunanga paicunashna imapash cachun nalita ruranata saquishcata ricushpaca manllarishpa, cangunataca rimashpa llaquichinajun” nircami (1 Pedro 4:4). Alipacha estudiashca Will Durant jarica, “chai tiempopica gentecunaca paicuna munashcashnami imatapash rurashpa causanajurca . Shinapash Jesusta catijcunaca paicunapa causaihuanmi chaishuj gentecuna nalita ruranajushcata ricuchirca” nircami.
Cai nishcacunataca ¿picunata cunanbica pactachin? Jesusta catijcuna paicunapa crishcacunamanda politicapi o guerrapi na chapurinamandaca New Catholic Encyclopedia nishcapica cashnami nin: “Taita Diostalla sirvini nishpa politicapi o guerracunapi na chapurinaca na justo canllu” ninmi. Gentecunapa derechocunata difindij African Rights nishca organizacionga, “1994 huatapi Ruanda llactapi gentecunata huañuchinajujpica, tucuilla iglesiacunamandaca testigo de Jehovacunallami na participarca” ninmi.
Alemania llactapi gentecunata huañuchishcamanda parlashpaca, colegiomanda shuj profesorca cashnami nirca: “Chaipi ashtaca gentecunata huañuchishcata yachaj chayashpaca, ¿imamandashi ni pipash imatapash rurashpa na jarcarca?” nircami. Shinapash Museo Conmemorativo del Holocausto de Estados Unidos nishcapi ima pasashcata tapungapaj rishca jipami chai profesorca, “cunanmi Alemania llactapi gentecunata huañuchinajujpica, na tucuicuna participashcata yachaj chayani” nishpa escribirca. Paica testigo de Jehovacuna paicunapa crishcacunata difindimanda chai guerrapi na participashcatami yachaj chayarca.
¿Picunata punda Jesusta catijcunashnallata Jesuspa mandashcata causaipi pactachishpa catin? U.S. Catholic nishca revistapica, “católico religionmanda mayoría jovengunaca, nara cazarashpallata pacta causanamanda Bibliapi imata yachachishcataca na cazushpami causan” ninmi. Shinallata shuj sacerdote imata nishcatapashmi ricuchin. Sacerdoteca “iglesiaman cazarangapaj shamushca gentecunamandaca mayoriami pacta causanajushpa ña cazarangapaca shamun” nishcami. Shinapash The New Encyclopædia Britannica nishcapica “testigo de Jehovacunami tucuipi aliguta causangapaj esforzarin” nishcami.