¿Jesusca nali runataca jahua cielopimi causangui nijurcachu?

Biblia en Quichua de Imbaburapi nishca shinaca paipa ladopi huarcushca nali runataca Jesusca nircami: “Na llullashpami, candaca cashna nini: Cunanllatami, paraíso juyailla llactagupi ñucahuan cangui” nishpa (Lucas 23:43). Shinapash shuj Bibliacunaca cai textopica ninmi: “Mana llullajunichu. Cunanllatami candaca nini: Paraisopica ñucahuanmi cangui” nishpa. Jesusca chai nali runataca ¿cunanllatami ñucahuan jahua cielopi causaringui nijurcachu?

Jahua cielopi causagringapaca ¿imata minishtirin? Jahua cielopi causagringapaca yacuhuanbash espíritu santohuanbash bautizarinami minishtirin. Shinami Jesuspa catijcuna, Diospa huahuacunapash tucun (Juan 3:3, 5). Diospa mandashcacunatapash cazushpami causana can. Shinallata na shuhuashpa, alita rurashpa, shujcunata llaquishpami causana can (1 Corintios 6:9-11). Ashtahuanbash cai Alpapi huañungacamanmi Diostalla Jesustalla cazushpa causana can (Lucas 22:28-30; 2 Timoteo 2:12). Chaicunata pactachishpallami, huañushpaca jahua cielopi causagringapaj causachi tucunga. Shinami huaranga huatacunata Jesushuan cai Alpata mandanga (Apocalipsis 20:6).

Jesuspa ladopi caj nali runaca huañuchijmi carca (Lucas 23:32, 39-41). Shinapash aligumanmi Jesustaca nirca: “Can mandangapaj shamushpaca, ñucata yarihuangui” nishpa (Lucas 23:42). Shinapash ima horapash na bautizarircachu, Diospa espíritu santohuanbash na agllashcachu carca. Paipa causaipica nalitalla rurashpami causarca. Shinaca ¿chai nali runatapashchu Jesusca jahua cielopi paipa ali catijcunahuan igual mandachun nijurca? (Romanos 2:6, 7.)

Pensaripashunchi. Pipash quiquinba culquita shuhuashcanman. Shuhuashcamanda nali sintirishpa perdonahuai nijpi, quiquin perdonashcanguiman. Shinapash ¿quiquinba almacenda ricuriachun o quiquinba familiata cuidachun paita minganguimanllu? Paipi na confiashcamandaca na paiman minganguimanllu. Shinaca, jahua cielopi causangapaj rijcunapash alitalla rurajcunami cana can. Jahua cielopi mandajushpaca Diospa mandashcacunata aliguta catishpa mandajmi cana can (Apocalipsis 2:10). Jesuspa ladopi caj nali runaca, Jesustaca aligumanmi nirca, ñucata ama cungahuanguichu nishpa. Shinapash jipaman pai alita ruranataca na yachai usharircachu.

Shinaca ¿Jesusca chai nali runataca cunanllatami Paraisopi ñucahuan cangui nijurcachu? Na chaita nijurcachu. Jesusca na chai ratochu jahua cieloman rirca. Paica quimsa punllacunatami “alpa ucupi pambashca” carca (Mateo 12:40; Marcos 10:34). Shinallata Taita Dios causachishcamanda 40 punllacuna jipami Jesusca jahua cieloman rirca (Hechos 1:3, 9).

Shinaca ¿imamandata Jesusca chai nali runataca Paraisopimi cangui nirca? Paica, Jesús mandajujpi cai Alpa ña paraíso cajpimi causaringa (Hechos 24:15; Apocalipsis 21:3, 4). Paraíso ima cajta intindingapaj, paraisopi causangapaj imata ruranata yachangapaj munashpaca testigo de Jehovacunahuan parlapangui.