BIBLIAMANDA TAPUICUNA
Bibliaca ¿Taita Diospa Shimichu can?
Bibliaca Taita Diospa Shimimi can. Minishtirishca cajpimi Bibliataca shuj shuj shimicunapi ashtaca millón copiacunata llujchishca. Bibliapi ali consejocunami gentecunataca ali causachun ayudan. (1 Tesalonicenses 2:13; 2 Timoteo 3:16, liipangui.)
Gentecunaca caya huatacuna ima pasanataca na yachai ushanchichu. Shinapash Bibliaca jipa punllacunapi ima pasanataca alimi intindichin. Caina huatacunapillami mar Muerto nishca ladolla cuevapica Isaías libropa shuj copiata tarirca. Isaías libropa copiataca Jesús naciringapaj 100 huatacuna yali faltajpillatami escribirca. Chai libropica nijurcami Babilonia llactaca tucuchi tucungami nishpa. Chai shimicunaca Jesús nacirishcamanda ashtaca huatacuna jipami pactarirca (Isaías 13:19, 20; 2 Pedro 1:20, 21, liipangui.)
Bibliataca ¿picunata escribirca?
Bibliataca 40 gentecunami escribirca. Bibliata escribi tucuchingapaca casi 1.600 huatacunatami pararca. Taita Dios yuyachijpimi Bibliataca callarimanda tucurigacaman shujlla yuyaihuan escribirca, na pandarircachu. (2 Samuel 23:2, liipangui.)
Shinapash Bibliata escribichunga ¿imatata Taita Diosca rurarca? Huaquinbica angelcunatami cacharca. Cutin huaquinbica muscuipi cuendami ricuchin carca imata escribinata. Huaquinbicarin imata escribinata yachachunga paicunapa umapimi yuyaicunata churan carca. Taita Diospa yuyaicunata escribishpapash gentecunaca paicuna agllashca shimicunahuanmi escribirca. (Apocalipsis 1:1; 21:3-5, liipangui.)