Ñucallami ashtahuan importante cani yarcanimi

ÑUCA PUNDA CAUSAI:

Ñuca huahua cajpica ñuca familiaca Alemania llacta lodalla Leipzig llactapimi causarca. Chai llactaca Polonia y República Checa llactacunamandaca ladollami can. 6 huatacunata charijpimi ñuca taitapa trabajomanda Brasil llactaman causangapaj rircanchi, jipamanga Ecuador llactamanbashmi rircanchi.

14 huatacunata charijpimi ñuca taitacunaca cutinllata Alemania llactapi estudiachun cachahuarca, chaipica ñana ñuca taitacunahuan carcanichu, chaimandami ñucallata cuidarina carcani. Jipamanga ñuca munashcatami rurai callarircani. Ñuca rurashcacunamanda shujcuna imata pensanatapash na importahuanllu carca.

Ñuca 17 huatacunata charijpimi ñuca taitacunaca Alemania llactapi causangapaj tigramurca. Callaripica paicunahuanmi causajurcani, pero ñuca munashcata ruranata gushtaimandami paicuna imata nijpipash cazungapaca na munarcani. Chaimandami 18 huatacunata charishpaca huasimanda llujshishpa rircani.

Cushilla causangapaca imatata rurana cani yashpami siempre preocuparin carcani. Chaimandami shuj gentecuna imata pensajta uyangapaj shuj organizaciongunapi investigarcani. Shinapash jipamanga cai alpapi tiashca tucui juyailla cosascunata gentecuna nara huaglichijpillata tucuita ricushpami aprovechana cani yashpami pensarcani.

Shuj motocicletata randishpami África llactaman rircani. Shinapash moto huaglijpimi Europa llactaman trigrana tucurcani. Pero motota ña arreglashpaca Portugal playamanmi rircani. Chaipi cashpaca motota saquishpa barcopirapash viajanatami dicidircani.

Huaquin jovengunaca océano Atlántico nishcatami barcopi yalingapaj munanajurca paicunahuan ringapami paicunapa grupopi yaicurcani. Chai jovenguna purapica ñuca huarmigu tucuna Lauriepashmi paicunahuan carca. Islas del Caribe nishcacamanmi barcopi rircanchi. Asha tiempotaca Puerto Ricopimi carcanchi chai jipami Europaman tigrarcanchi. Ñucapash Lauriepash shuj barcota randishpa chaipi causangapajmi munarcanchi. Quimsa quillacunatami mascanajurcanchi shinapash Alemania llactamanda soldadocunaca ñucapash soldado cachunmi apahuarca.

Quince quillacunatami barcopi soldado shina trabajarcani. Chai tiempopimi Lauriehuan cazararcani. Ishcandicunallatami mundo enterota viajashpa catingapaj munarcanchi. Ñucata soldado shina nara apajpillatami ñucaca shuj uchilla barcoguta randishca carcani. Cai barcopi soldado shina trabajajushca tiempopica chai uchilla barcotaca shuj jatunlla barcomanmi tigrachircanchi. Ñucanchicunaca chai barcopi causashpa mundo enterota viajangapajmi munarcanchi. Soldado shina trabajanata ña tucuchigrijushpami testigo de Jehovacunata rijsircanchi. Paicunahuanga Bibliamandami yachajui callarircanchi.

BIBLIAMI ÑUCA CAUSAITA CAMBIARCA:

Callaripica ñuca causaipica na ashtaca cambiocunata rurana canichu yarcanimi porque ñuca causajushca huarmihuanga cazarashcami carcani y tabacota chupanatapashmi saquishca carcani (Efesios 5:5). Ashtahuanbash mundo enterota viajashpa Taita Dios rurashcacunata ricunaca alimi cai yarcanimi.

Shinapash ñuca causaipica cambiocunataca ruranarami carcani, por ejemplo ñucaca siempremi ñuca munashcata ruran carcani orgullosopashmi carcani y ñuca imacunatalla rurashcata shujcunaman villanatami gushtan carcani. Bueno ñuca causaipica ñucami ashtahuan importante carcani.

Shuj punllaca Mateo capítulo 5​manda 7​camanmi liircani chai textocunapi cushilla causanamanda Jesús imata nishcataca na intindircanichu. Por ejemplo shuj textopica yarjachinshna, yacunayachinshna causaj gentecunami cushilla causan nircami (Mateo 5:6). Chaimandami ñucaca pipash yarjachijushpa o yacunayachijushpaca imashinata cushilla causai ushan nishpa tapurircani. Pero Bibliata yachajushpa catishpami Taita Diosmanda yachajuna munaimanda tucuicunallata yarjachinshna, yacunayachinshna causanajushcata cuenta japircani. Taita Diosmanda yachajuna munaita charishcataca tucuicunallatami cuenta japina capanchi. Jesús nishcashnami can, Jesusca “Diosmanda yachajungapaj, paicunapaj shungupi ninanda munajcunaca, ninandami cushijun” nircami (Mateo 5:3).

Ñucapash ñuca huarmigupash Alemania llactapimi Bibliamanda yachajui callarircanchi. Shinapash jipamanga Francia llactamanmi causangapaj rircanchi cutin jipamanga Italia llactamanmi rircanchi. Maiman rishpapash siempremi Testigocunahuanga tuparin carcanchi. Testigocunamandaca randimanda ninanda juyarijta tucuicuna shujllashna cajtami ninanda gushtarcani. Mundo enteropi shujlla organización cajtami cuenta japircani (Juan 13:34, 35). Tiempohuanga ishcandimi bautizarircanchi.

Bautizarishca jipapash ñuca causaipica cambiocunata rurashpa catinarami carcani. Ñucapash ñuca huarmigupash África mar yacuta océano Atlántico nishcatapash barcopi rishpa Estados Unidosman chayangapami dicidishca carcanchi. Ña mar yacuta rinajushpa ñuca huarmihuanlla cashpami ñucanchicuna Jehová Dioshuan compararijpica ñucanchicuna nima na cashcata cuenta japircani. Barcopi rinajushpaca ashtaca tiempotami charircani. Chaimandami Bibliata liingapaj aprovecharcani ashtahuanbachaca Jesuspa causaimanda liinami ninanda ayudahuarca. Jesusca jucha illaj cashpapash, ali ali cashpapash gentecuna paitalla alicachishpa ricuchunga na munarcachu. Jesuspa causaipica paipa Taitami ashtahuan importante carca.

Jesuspa ejemplopi pensarinami ñuca munashcatalla ruranapa randica Diospa Reinota pundapi churana cashcata cuenta japichun ayudahuarca (Mateo 6:33). Estados Unidos llactaman chayashcandimi ñana ashtahuan viajana cashcata dicidircanchi chaipa randica Jehová Diosta sirvinapimi ashtahuan ocuparircanchi.

¿IMA BENDICIONGUNATATA CHASQUIPASHCANI?

Pundapica ñucapillami pensarin carcani. Ñuca imata dicidishpapash tucui ali llujshinataca na seguro carcanichu pero cunanga Jehová Diospa ayudahuanga ali decisiongunatami agllai ushani (Isaías 48:17, 18). Shinallata cunanga ñuca causaipi Jehová Diosta adorana cashcata shuj gentecunapash Jehová Diosta rijsichun ayudana cashcataca alimi yachani.

Bibliapa consejocuna ñucatapash ñuca huarmigutapash ayudashcamandami cushilla causanchi. Shinallata shuj ushigutapashmi charipanchi paipashmi Jehová Diosta rijsishpa Jehová Diostaca ninanda juyan.

Ñucanchi causaipica siempremi problemacunaca ricurishca. Shinapash Jehová Diosca siempremi ayudajushca. Chaimandami aguantashpa catingapaj Jehová Diospi confiashpa catingapaj munapanchi (Proverbios 3:5,6).